Oekusipost.com Dili - Dadus ofisial husi Ministériu Saúde no Organizasaun Mundial ba Saúde (OMS) katak to'o oras ne'e foin mak rezista ema estranjeiru ida positivu infetadu ona Coronavirus Disease (CorVid-19), maibé Ministru Negósiu Estranjeiru no Kooperasaun (MNEK), Dionísio Babo Soares konsidera enkontru entre Prezidente Repúblika (PR), Francisco Guterres Lu Olo ho Konsellu Superior Defeza no Seguransa (KSDS) ho Konsellu Estadu sériu.
"Konsulta entre Prezidente Repúblika nian ho Konsellu Estadu no Konsellu Seguransa ne'e mais do que sériu, la'ós sériu de'it, maibé, mais do que sériu", Dionísio katak ba jornalista sira hafoin partisipa enkontru Konsellu Superior Defeza no Seguransa iha Palásiu Prezidensial iha Ai-Tarak Laran, Dili Tersa 24 Marsu 2020.
Prezidente Repúblika, Francisco Guterres Lú Olo, prezide reuniaun Konsellu Superior Defeza no Seguransa (KSDS) hodi halo analiza hamutuk kona-ba pedidu husi Governu atu deklara Estadu Emerjénsia, liga ho CorVid-19.
Reuniaun Konsellu Superior Defeza no Seguransa nian hahú iha tuku 9 dadersan no termina iha tuku 11, maibé seidauk iha deklarasaun ruma konaba rezultadu enkontru.
Oras ne'e daudaun, Prezidente Repúblika kontinua hala'o enkontru ho membru Konsellu Estadu ne'ebé hahú iha tuku 11:10.
Membru Konsellu Superior Defeza no Seguransa ne'ebé partisipa iha reuniaun ne’e mak: Prezidente Repúblika Francisco Guterres Lú Olo, Primeiru Ministru Taur Matan Ruak, Ministru Negosiu Estranjeiru no Kooperasaun Dionísio Babo, Ministru Defeza no Seguransa Filomeno Paixão, Ministru Justisa Manuel Carceres, husi Parlamentu Nasionál, Aderito Hugo da Costa, David Dias Ximenes, Xefe Estadu Maior Jeneral F-FDTL Lere Anan Timur, Komisáriu PNTL Faustino da Costa, no José Manuel Fernandes ‘Nakfilak’ no Eis Primeiru Ministru no Ministru Saúde Rui Araújo no Infectologista Danina Coelho no Diretór Ezekutivu FONGTIL Daniel Santos. (*)
