Oekusipost.com Dili – Prezidente Repúblika (PR), Francisco Guterres Lu Olo finaliza ona enkontru Konsellu Superior Defeza no Seguransa no Konsellu Estadu, maibé seidauk iha desijaun finál ba Estadu emerjénsia, tanba tenke hetan autorizasaun husi deputadu sira iha Parlamentu Nasionál mak foin loke dalan ba Prezidente hodi foti desijaun.
Nune’e, Xefe Kaza Sivíl Prezidénsia Repúblika, Francisco María de Vasconcelos hatete, PR, Francisco Guterres Lu Olo, sei haruka proposta Estadu Emerjénsia ba Parlamentu Nasionál (PN), hodi husu autorizaun molok desidi Estadu Emerjénsia.
Nia hatutan, PR simu pedidu husi governu kona-bá desidi Estadu emerjénsia iha loron Segunda 23 Marsu 2020 iha oras tuku 12:45 meudia. Bainhira Prezidente simu tiha pedidu ne'e, Prezidente konvoka kedan reuniaun ba Konsellu rua, ne'ebé realiza Duni iha loron ohin.
Enkontru ne’e, iha dader Konsellu Superior Defeza no Seguransa, no tuir fali mak Konsellu Estadu. PR konvida mós Ema tékniku na'in rua, maka doutór Rui Maria de Araújo ho dotora Daninha Coelho hodi fó mós opiniaun ba Konselleiru sira hodi hatutan ba PR molok foti desijaun ruma,
“Ohin duni, ka tarde liu aban, sei haruka ba Parlamentu Nasionál, tanba ne'e urjente, no kleur liu mak aban, no Prezidente Repúblika sei haruka ba Parlamentu Nasionál hodi husu autorizasaun molok foti desijaun," nia hatete ba jornalista sira iha Palásiu Prezidensiál iha Ai-Tarak Laran, Dili Tersa, 24 Marsu 2020.
Nia afirma, bainhira PN autoriza, Prezidente sei dekreta Estadu emerjénsia.
Entretantu, Reuniaun Konsellu Superior Defeza no Seguransa nian hahú iha tuku 9 dadersan no hotu iha oras tuku 11, no enkontru ho membru Konsellu Estadu hahú iha tuku 11:10 remata iha tuku 13:05.
Membru Konsellu Superior Defeza no Seguransa ne'ebé partisipa iha reuniaun ne’e mak: Prezidente Repúblika Francisco Guterres Lú Olo, Primeiru Ministru Taur Matan Ruak, Ministru Negosiu Estranjeiru no Kooperasaun Dionísio Babo, Ministru Defeza no Seguransa Filomeno Paixão, Ministru Justisa Manuel Carceres, husi Parlamentu Nasionál, Aderito Hugo da Costa, David Dias Ximenes, Xefe Estadu Maior Jeneral F-FDTL Lere Anan Timur, Komisáriu PNTL Faustino da Costa, no José Manuel Fernandes ‘Nakfilak’.
Membru Konsellu Estadu ne’ebé partisipa iha reuniaun ne’e maka, Prezidente Repúblika Francisco Guterres Lú Olo, Primeiru Ministru Taur Matan Ruak, Prezidente Parlamentu Nasionál Arão Noe, eis Prezidente Repúblika José Manuel Ramos Horta. Parlamentu Nasionál: Eduardo de Deus Dusae’, Aurora Ximenes, José Cornelio Guterres, Árcangelo de Jesus Gouveia Leite, José dos Santos ‘Naimori Bucar’, konvida mos Eis Primeiru Ministru no Ministru Saúde Rui Araújo no Infectologista Danina . Kay Rala Xanana Gusmão la partisipa iha enkontru Konsellu Estadu ne’e.
