Oekusipost.com Dili – Observador politika husi Universidade de Dili (UNDIL), Hugo Lorenço konsidera Prezidente Repúblika (PR), Francisco Guterres Lu Olo falla iha “étika” komunikasaun iha enkontru ho koligasaun foun ne’ebé lidera husi Kay Rala Xanana Gusmão.
Koligasaun foun ba governu dasia ne’e kompostu husi partidu CNRT, KHUNTO, PD, UDT/FM no PUDD ba hasoru ona PR iha loron Sesta 6 Marsu 2020, maibé laiha rezultadu pozitivu, tanba PR husu koligasaun hodi priese rekezitu balun.
“Ha’u hanoin etikamente ne’e fallansu husi Prezidente Repúblika tanba Prezidente mak konvida partidu sira ne’ebé forma governu dasia ne’e,” hatete Observador politika Hugo Lorenço ba jornalista sira iha nia knaar fatin kampus UNDIL Maskarinhas Dili, Sesta 9 Marsu 2020.
Tuir nia katak, bainhira koligasaun foun ba hasoru PR ne’e labele trava, maibé ida hatudu momoos katak laiha komunikasaun ne’ebé di’ak entre PR ho lider partidu politiku sira.
Nia dehan, koligasaun foun ne’ebé lidera husi Kay Rala Xanana Gusmão ba hasoru PR depois laiha rezultadu pozitivu ne’e hatudu mensajen ne’ebé la di'ak ba sosiedade.
Akademista ne’e hatutan, PR tenke uza lei inan mak husu ba koligasaun foun atu priense rekezitu sira, maibé kuandu uza lei oan mak husu atu priense rekezitu sira ne’e prezidente foti sala desizaun ona.
Nai dehan, rezultadu enkontru entre PR ho partidu koligasaun foun sira ne’e kontinua hanaruk impase politika no loke dalan ba eleisaun antisipada daruak nian.
Hugo hatete, impase politika ne’ebe kontinua la’o ne’e tanba lider sira mak hadau malu ba poder ekonómia, ne’e mak lider sira lakohi tuur hamutuk atu rezolve situasaun ne’e.
“Ha’u hare situasaun ne’e lider sira mak hakarak hadau malu ba poder ekonomia ne’e mak sira hakarak hanaruk impase ne’e,” hatutan Hugo.
Akademista UNDIL ne’e hatete, ho interese poder ekonómia ne’ebé maka’as, ne’e mak lider partidu politiku sira lakohi rende ba malu iha situasaun hanesan ne’e.
Entretantu, antes iha loron 7 Fevereiru 2020 Prezidente partidu CNRT, Kay Rala Xanana Gusmão hatete katak desijaun justu no demokrátiku liu mak eleisaun antisipada, maibé rezultadu enkontru lider nasionál sira konkorda malu katak eleisaun antisipada nu’udar dala ikus nian. Liga ba kestaun ne’e, sekretariu jeral partidu FRETILIN, Mari Alkatiri mós lakohi atu PR nia mandatu durante tinan 5 desidi eleisaun antisipada dala barak, maibé deklarasaun iha ikus ne’e katak FRETILIN oras ne’e prontu hela atu ba eleisaun ohin ka aban mós di’ak hela. (*)
