DILI (TOP) – Prezidente Partidu CNRT, Kay Rala Xanana Gusmão la konkorda ho planu governu liu husi Ministériu Estatal ne’ebé planeia atu realiza eleisaun parlamentar entre iha fulan Agustu ka Setembru, no apela ona ba Prezidente Repúblika, José Ramos-Horta tenke marka ona loron eleisaun ne’e iha Maiu tinan ida ne’e, la’os atu adia fali.
Iha loron Sesta, 03 Fevereiru 2023 horas tuku rua lorokraik, ekipa CPN partidu CNRT ne’ebé lidera husi Prezidente CPN CNRT, Kay Rala Xanana Gusmão akompaña husi nia vise-prezidente partidu sira hanesan Virgilio Simit, Gil da Costa “Oan Soru”, Sekretariu Jeral Partidu CNRT, Dato Sri Francisco Kalbuadi Lay, adjuntu sekretariu jeral, Jacinto Rigoberto, deputada Bisoi hasoru malu ho Prezidente Repúblika, José Ramos-Horta hodi hato’o CNRT nia pozisaun kona-ba kalendariu eleisaun parlamentar iha tinan ida ne’e.
Prezidente Partidu CNRT, Kay Rala Xanana Gusmão ho nia estruturan CPN sira halo audiensia ho Prezidente Repúblika, José Ramos-Horta kona-ba markasaun loron eleisaun parlamentar iha tinan ida ne'e iha Palásiu Prezidensial iha Ai-Tarak Laran, Dili, Sesta, 03 Fevereiru 2023. Foto TOP/Raimundos Oki.
Prezidente Partidu CNRT, Kay Rala Xanana Gusmão hateten, nu’udar ema hotu hatene katak, oras ne’e dadauk, Prezidente Repúblika iha hela kalendariu ida ba audiensia ho partidu politika sira hotu molok Prezidente Horta dekreta loron ba eleisaun parlamentar iha tempu badak.
“Ne’ebé ami hato’o ami nia hanoin, Prezidente mós ko’alia kona-ba ida ne’e, hare ba situasaun barak ne’ebé ami hare katak, ami halo apelu ida ba Prezidente katak, iha prinsipiu eleitoral kada tinan lima, se iha tinan 2018 hala’o eleisaun iha fulan Maiu, siklu eleitoral ne’e iha Maiu 2023 tenke halo eleisaun,” Xanana hateten ba jornalista sira hafoin remata audiensia ho Prezidente Repúblika, José Ramos-Horta iha Palásiu Prezidensial iha Ai-Tarak Laran, Dili, Sesta 03 Fevereiru 2023.
Xanana hatutan, partidu CNRT mós rona membru governu balun ko’alia kona-ba eleisaun parlamentar ne’e atu halo iha fulan Agustu ka Setembru tinan ida ne’e, no depois CNRT rasik konvoka reuniaun CPN nian hodi hare katak, karik governu iha razaun hodi dehan katak, adia tan eleisaun ne’e ka oinsa.
Prezidente Partidu CNRT, Kay Rala Xanana Gusmão ho nia estruturan CPN sira halo audiensia ho Prezidente Repúblika, José Ramos-Horta kona-ba markasaun loron eleisaun parlamentar iha tinan ida ne'e iha Palásiu Prezidensial iha Ai-Tarak Laran, Dili, Sesta, 03 Fevereiru 2023. Foto PR/Eujevio Pereira.
“Maibé, ami sente katak, dehan la’e. Laiha razaun ba atu adia tanba, iha konstituisaun dehan mandatu tinan lima (5). Tanba ne’e mak Prezidente rona tiha ona ami nia opiniaun, tanba ne’e mak agora ita hein de’it Prezidente bainhira mak marka loron eleisaun parlamentar nian,” hateten Xanana.
Sekretariu Jeral Partidu CNRT, Dato Sri Francisco Kalbuadi Lay kumprimenta Prezidente Repúblika, José Ramos-Horta iha Palásiu Prezidensial iha Ai-Tarak Laran, Dili, Sesta, 03 Fevereiru 2023. Foto TOP/Raimundos Oki.
“Comissão Política Nacional, Partido CNRT, hakarak fó hatene katak violensia ne’ebé mosu, mai husi grupu oi-oin iha sosiedade laran no bele haré katak governu rasik la preokupa liu ho buat sira ne’e. Tanba ne'e, la iha razaun atu Ministro tau fali problema violênsia nian, hanesan fali katak, iha Setembru, violênsia sei la mosu, tanba deputadu sira simu nafatin sira-nia saláriu, hodi mós deputadu sira la lakon benefisiu no priviléziu ne’ebé sira simu hela,” Xanana afirma.
Partidu Libertasaun Popular hakarak iha eleisaun kualidade
Maske partidu CNRT apela ba Prezidente Horta atu tenke marka loron eleisaun parlamentar 2023 iha fulan Maiu, maibé audiensia Partidu Libertasaun Popular (PLP) ho Prezidente Horta iha parte dadersan nian hato’o sira nia preokupasaun kona-ba preparasaun governu nian ba eleisaun parlamentar ne’e seidauk mazimu, tanba ne’e PLP hato’o ba Prezidente Horta se bele karik adia tan loron eleisaun ne’e hodi bele fó biban ba governu atu halo preparasaun ida di’ak, nune’e bele iha eleisaun ida ne’ebé ho kualidade.
PLP mos fó opiniaun atu iha eleisaun ne’ebé la’o ho kualidade liu husi preparasaun di’ak liu husi mobilizasaun lojístika no enkudramentu legál.
“PLP nia opiniaun husi eleisaun jerál ida ne’ebé mosu iha tinan 20 restaurasaun independénsia, ita hakarak eleisaun ida ne’ebé la’o ho kualidade ne’ebé rekere ita nia preparasaun sira di’ák iha lojístika no kuadru legal sira ne’ebé guia operasionalizasaun prossesu eleisaun sira no rekursu umanu ne’ebé bele operasionaliza sistema sira ne’ebé hodi fó andamentu ba eleisaun jerál ne’ebé tuir mai,’’ hateten II Vise-Prezidente PLP, Deometrio Do Amaral de Carvalho ba jornalista sira iha Palásiu Prezidensial iha parte dader nian.
“PLP mós iha esperansa katak ho Xefe Estadu atuál hanesan líder ne’ebé simu premiadu nóbel ba páz no koñesidu iha mundu nune’e hakarak iha nia prezidénsia hamosu eleisaun ida ne’ebé trankuilu, akontabilidade no demostra lideransa sira hotu nia interlizénsia ba prossesu ne’e rasik. Iha preparasaun ne’ebé forte tuir lei partidu polítiku nian no sei hala’o kongressu iha tempu badak ne’e,” esplika Deometrio.
Author: The Oekusi PostWebsite:https://www.oekusipost.comEmail:Este endereço de email está sendo protegido de spambots. Você precisa do JavaScript ativado para vê-lo.
www.OeKusiPost.com nu’udar plataforma media online iha Oe-Kusi Ambeno, Timor-Leste ne’ebé aprezenta notísia iha área oioin iha teritóriu nasionál.
Rua. Numbei, Oe-Kusi Ambeno
Mobile: +670 7723 4114
Email: info (at) OeKusiPost.com
