DILI (TOP) – Prezidente Partidu CNRT, Xanana Gusmão husu ba foin sa’e sira, atu aprende nafatin, hodi lori Rai ne'e ba oin.
" Atu hari'i konsiénsia joven sira. Buka matenek ne'e konsiensia partisipa harii nasaun nia vida. Iha sira nia liman, jerasaun foun, ikus mai futuru Timor nian, destinu Timor nian iha sira nian liman, iha institusaun ruma, sempre dehan aprende sai matenek, maibé tenke buka partisipa, hahú husi hanoin. Kunadu iha hanoin ona, ne’e mós kategoria partiasaun ida ona ba hanoin ba nasaun nia future,” hateten Xanana hafoin fó tomada pose ba membru Klibur Profisional partidu CNRT nian 380 iha sede Nasionáll partidu CNRT iha bairro dos Grilhos, Dili, Sábadu, 04 Fevereiru 2023.
Prezidente Partidu CNRT, Kay Rala Xanana Gusmão hato'o orientasaun politika ba membru Klibur Profisional hamutuk nain 380 ne'ebé foin simu posse iha sede nasionál partidu nian iha bairro dos Grilhos, Dili, Sánadu, 04 Fevereiru 2023. Foto TOP/Raimundos Oki.
Nia husu mós ba foinsa’e sira, atu kontribui hanoin kritiku no rasionál, hodi apoia dezenvolvimentu Nasionáll.
“Kuandu hanoin ona ka analiza realidade ida, nia partisipa ona, la iha liu vontade atu hanoin, ne’e buka oportunidade ba nia a’an de’it," esplika Xanana.
Xanana konsidera, Klibur Profissionál - KP sei dezempeña papél imporante, atu deskuti dezenvolvimentu seitór importante sira.
" KP, ha'u kontente tanba barak tan, imi barak sei joven, imi sei kontinua dalan ne'ebé partidu loke ona, KP bá edukasaun, kultura, saúde no buat barak. Koko deskuti, husi saúde deskuti, saida mak loos no saida laloos, edukasaun deskuti, hodi fo hanoin bá partidu hodi serbii di'ak liu tan" tenik Xanana.
Tuir Xanana, atu lakon ka manan iha eleisaun Klibur Profissional tenke funsiona nafatin hodi atende ba prosesu dezentralizasaun.
“Klibur no diresaun sira seluk, tenke kaer metin prinsipiu Partidu nian, biar Xanana la iha, Partidu tenke funsiona nafatin, hodi hanoin “pensamentu kritiku”. Ita iha konsiénsia kona-ba importánsia estrutura CNRT, ita foin 16 anos, signifika katak, nu'udar partidu sei Labarik, buka nafatin bá faze atu luta, too tinan 22 no 23 partidu organiza di'ak liu tan," katak Xanana.
Klibur Profissional tenke preparadu ba dezentralizasaun
Klibur Profissionál sei atende mós prosesu dezentralizasaun ne'ebé inisia durante governasaun CNRT iha dahat no dalima, maske dadaun ne'e falla iha mandatu governasaun atual.
"Ita mak inisia prosesu dezentralizasaun, sira balun ansi muda naran (Distritu ba Munisípiu) dezentralizasaun iha kuartu governu no kintu governu, haré tiha ona katak problema hotu ba governu sentrál, susar teb-tebes, tanba ne'e halo dezentralizasaun tan imi sei dezempeña funsaun iha dezentralizasaun," rekorda Xanana.
Komandante em Chefe das FALINTIL ne’e avalia katak, durante implementasaun Planu Estratejiku Dezenvolvimentu Nasionál – PEDN ne’ebé inisia iha governasaun CNRT mós falla.
Nia mós enkoraja Klibur Profissionál atu koñese realidade kada Munisipiu, buka hatene povu nia moris no povu nia matan been.
Prezidente Partidu CNRT, Kay Rala Xanana Gusmão fó posse ba membru Klibur Profisional hamutuk nain 380 ne'ebé foin simu posse iha sede nasionál partidu nian iha bairro dos Grilhos, Dili, Sánadu, 04 Fevereiru 2023. Foto TOP/Raimundos Oki.
"Koñese ita nia rai realidade iha área ida-idak, iha dezentralizasaun iha ona hanoin katak sei tau Assembleia Munisipál, imi mak tenke prepara-an, tanba sei iha eleisaun Assembleia Munisipál. Hanoin problema ida-idak, ko'alia ba malu, iha Munisípiu ne'e ko'alia ida-idak hodi fó hanoin bá Partidu hodi aprezenta ba povu iha eleisaun hodi lori ba oin" fundamenta Xanana.
"Ami mai tanba hakarak reforsa CNRT tanba sai na’in ba Veteranu sira, partidu boot ona, ami hakarak mai reforsa, ita presija servisu iha fim-de- semana, atu halo dezenvolvimentu, tanba durante tinan lima la iha dezenvolvimentu" hateten reprezentante husi afiliadu sira.
Xanana fó benvindu ba afiliadu sira, maibé fundamenta katak, la hanoin atu sobu partidu seluk, maibé afiliadu sira mak fiar ba CNRT nu’udar solusaun diak ba nasaun no povu nia vida.
"Ami simu ho liman rua, kontente la'ós tanba sobu partidu seluk, la’e liu, simu liman-rua tanba mai hamutuk partidu ida ne'e, lalika hanoin katak, ita sobu partidu la’e, ami simu tanba imi fiar ba partidu ida ne'e" afirma Kay Rala Xanana Gusmão.
Prezidente Partidu CNRT, Kay Rala Xanana Gusmão fó posse ba membru Klibur Profisional hamutuk nain 380 ne'ebé foin simu posse iha sede nasionál partidu nian iha bairro dos Grilhos, Dili, Sánadu, 04 Fevereiru 2023. Foto TOP/Raimundos Oki.
Sekretáriu Jerál Partidu CNRT, Dato Sri Francisco Kalbuadi Lay dezafia profissionál sira ne'ebé simu posse, atu servisu makas hodi garante vitória CNRT iha eleisaun.
"Hahú agora, tomada de posse dezde uluk, servisu, apelu ba hotu sira hotu-hotu, tun ba kraik serbisu, ida-idak nia nia fatin servisu ba NUREF, SELKOM hodi relata ba Avo, sira mesak funsionáriu iha Ministériu oi-oin no profissional de'it, ba oin tenke servisu, parabens ba ema hotu," tenik Dato Sri Kalbuadi Lay.
Alkansu ba kadeira 33 sei tulun aprovasaun kuadru legal iha sira Parlamentu Nasionáll hodi korriji erro sira ne'ebé komete husi Exekutivu atual no submete ba Xefe Estadu atu promulga.
Author:Raimundos OkiWebsite:https://www.oekusipost.comEmail:Este endereço de email está sendo protegido de spambots. Você precisa do JavaScript ativado para vê-lo.
