DILI (TOP) – Plata forma intendimentu ne’ebé asina husi partidu politika tolu hanesan KHUNTO, PLP no FRETILIN desidi ona sei la’o ses-malu ka ida-idak la’o ninian iha eleisaun parlamentar tinan ida ne’e, no depois eleisaun mak foin desidi atu la’o hamutuk fali.
Bainhira partidu CNRT sai husi Aliansa Mudansa ba Progresu (AMP) ne’ebé kompostu husi partidu tolu, CNRT, PLP no KHUNTO iha tinan 2019, no iha loron Kuarta, 22 Abril 2020, FRETILIN desidi hodi sai ai-tonka ba governu atual to’o tinan 2023. Husi kedas 2020 to’o ohin loron partidu tolu, FRETILIN, PLP no KHUNTO mak hamutuk ukun lesuk governasaun Primeiru-Ministru, Taur Matan Ruak ne’ebé nunka aprezenta programa governu nian ba Parlamentu Nasionál to’o ohin loron, maibé kontinua de’it programa governu AMP nian.
Konselleiru Másimu Partidu KHUNTO, José dos Santos Bucar hateten, partidu KHUNTO oras ne’e prepara metin-loos ona hodi hasoru eleisaun parlamentar ne’ebé sei akontese iha tinan ida ne’e, no KHUNTO sei la’o mesak hasoru eleisaun ne’e hodi ida-idak koko sukat ninia forsa politika rasik.
“KHUNTO nia preparasaun hasoru eleisaun parlamentár, ha'u sente prontu ona atu bele hasoru eleisaun parlamentár ida ne'e ho di'ak, tanba ne'e ita hotu-hotu rona de'it husi Xefe Estadu, bainhira mak Xefe Estadu dekreta data eleisaun,” Konselleiru Másimu Partidu KHUNTO, José dos Santos Bucar hateten ba jornalista sira hafoin remata enkontru ho Prezidente Repúblika, José Ramos-Horta iha Palásiu Prezidensial Ai-Tarak Laran, Dili, Kinta 02 Fevereiru 2023.
Kona-ba atu halo koaligasaun antes ho partidu politika sira seluk balun ka avansa mesak, tuir José Bucar katak, KHUNTO sei la’o mesak iha eleisaun parlamentar ne’e, no depois eleisaun mak bele tuur hamutuk fali ho PLP no FRETILIN.
“Polítika hotu-hotu halo polítika tanba ema hotu-hotu iha hanoin atu manán ka la manán tenke hato'o forsa ida ne'ebé fó fiar husi povu tanba ne'e tenke hatudu momoos, povu mak sei deside, no julga katak nia hakarak partidu ida ne'ebé, ne'eduni ema hotu-hotu la'o tuir sira vontade, hodi deside bainhira mak bele la'o hamutuk governu ne'e konforme sira ne'ebé manán maiória,” José Bucar esplika.
Atu asegura plataforma VIII governu atual, tuir José Bucar katak ba eleisaun agora ida-idak la'o ninian depois eleisaun hotu mak bele ko'alia.
Kona-ba kestaun ne’e, Sekretairu Jeral Partidu FRETILIN, Mari Bim Amude Alkatiri mós deklara ona iha Oe-Kusi Ambeno foin lalais katak, plataforma intendementu entre FRETILIN, PLP, no KHUNTO sei iha komprimisiu pre-eleitorál katak, eleisaun ida-idak la’o ho nia bandeira rasik, depois eleisaun mak sei hamutuk hodi ukun nafatin, maibé atu ukun nafatin oinsa bainhira povu la hili iha eleisaun parlamentar?
“Iha de’it komprimisiu pre-eleitoral signifika saída? Ba eleisaun ida-idak ho nia partidu, ida-idak ba ho nia bandeira, eleisaun hotu, depois de kontagen votu, sei hamutuk fali ukun nafatin,” hateten Alkatiri ba nia kamarada sira iha Arsenio Ban onia ofisina no restaurante Noi-Liko iha bairo Padimau, aldeia Sanane, suku Costa, sub-rejiaun Pante Makassar iha loron Sábadu, 28 Janeiru 2023.
Prezidente Partidu CNRT, Kay Rala Xanana Gusmão deklara on aba fatin barak durante ninia atividade konsolidasaun partidu nian katak, CNRT sei la’o mesak iha eleisaun parlamentar, no depois eleisaun mak la manan maioria absoluta, iha posibilidade bolu ka koaliga ho partidu politika ruma hodi avansa ba ukun ka formasaun governu.
