DILI (TOP) — Deputadu husi bankada CNRT, José Vírgilio Rodrigues Ferreira korize deputadu husi bankada FRETILIN, Antoninho Bianco katak, iha tempu rezistensia mak defende partidu FRETILIN karik labele sai Pak Camat iha Tutuala.
“Se ko’alia kona-ba FRETILIN iha rezistensia ha’u labele assume kargu Camat. Se ita defende FRETILIN labele sai Camat, ita ko’alia loloos hanesan ne’e,” deputadu CNRT, José Vírgilio Rodrigues Ferreira hateten kestaun ne’e bainhira haksesuk malu iha plenária Parlamentu Nasionál, Tersa 31 Janeiru 2023.
Hatan ba kestaun ne’e eis Pak Camat Tutuala atual deputadu FRETILIN, Antoninho Bianco katak, bainhira nia assume kargu nu’udar Camat ka Administrador ba Postu Administrativu Tutuala iha tempu Indonézia mós nia hatene, tanba saida mak tenke sai Camat iha tempu ne’eba.
“RDTL povu nian maibé labele haluha katak RDTL ne’e proklama husi FRETILIN depois mak halo rezistensia, depois reafirma referendum, no inisiu primeiru lejislatura FRETILIN mak harii duni Estadu ida ne’e ho konstituisaun ne’e,” responde deputadu Bianco.
“Ita boot RDTL ne’e, povu nian maibé sé mak proklama unilateral ne’e FRETILIN rezistensia ne’e hotu tiha reafirma husi referendum depois inisiu ne’e primeiru instala husi FRETILIN lidera governu inklujaun."
Iha fatin hanesan deputadu husi bankada Partidu Demokratiku (PD) António da Conseição husu ba deputadu sira ko’alia asuntu ida ne’ebé mak defende ema hotu-hotu no defende unidade ninian depois evita reklama istoria FRETILIN nian.
“Ha’u agora tuur iha Partidu Demokratiku (PD) mais ha’u ativista pasadu no ema barak bele lori naran FRETILIN ida mós. Tanba de’it dehan ita hotu hakarak ukun rasik aan,” nia hateten.
“Ita reklama dehan bebeik katak, iha pasadu ninian de’it ne’e, favor ida lalika sente eroi demais ho istoria povu ninian ho ema hotu-hotu ninia terus, labarik sira ne’ebé mak inosente sira nian. que ema barak rona hatene ne’ebe lalika koalia ba ida,” nia hateten.
Nia akresenta, ko’alia fali ba buat ida ne’ebé mak responsabilidade ba povu Timor-Leste tanba ida ne’e mak justisa se la’e, buat hotu hotu injustu, no imoral.
