Covid-19: Positivu nain 3 iha Ambeno di’ak fali ona

OE-BAU (TOP) – Sidadaunnain 3 ne’ebé postivu moras virus corona (Covid-19) iha Rejiaun Administrativu Espesial Oe-Kusi Ambeno (RAEOA) iha loron 24 Dezembru 2020 di’ak fali ona hafoin hetan tratamentu intensivu iha sala izolamentu, maibé tuir informasaun balun ne’ebé The Oe-Kusi Post (TOP) asesu, polisia konsege ka’er tan ema hamutuk nain 27 husi aldeia Saben, suku Bobometo, postu Oe-Silo bainhira involve iha atividade tranzasaun illegal iha área fronteira.

Sidadaun nain 3 ne’ebé antes ne’e positivu Covid-19 iha Dezembru tinan kotuk hamosu dezitendimentu entre inan-aman ho parte autoridade. Husi parte inan-aman konsidera rezultadu teste laboratoriu ne’e nakonu ho motivu politika no falsu, maibé Prezidente Autoridade ba RAEOA Arsenio Paixão Bano klarifika, rezultadu teste nunka habosok ema, no afirma tan nia nunka politiza assuntu Covid-19 iha Oe-Kusi Ambeno.

Notisia relevante: Covid-19: husi Surabaya negativu to’o Ambeno maka positivu?

Maske nune’e, ikus mai positivu nain 3 ne’e di’ak fali ona iha loron Kinta 7 Janeiru 2021.

“Iha notisia di’ak atu hatete ba públiku katak positivu nain 3 agora sira alta tiha ona husi izolamentu,” hatetne Bano liu husi konferénsia ba imprensa iha Oe-Kusi Ambeno, Kinta 7 Janeiru 2021.

Maske rezultadu teste laboratoriu dala rua tutuir malu hatudu rezultadu negativu, maibé sidadaun nain 3 ne’e sei kontinua kumpri nafatin kuarentena obrigatoriu ba loron 14 tan.

“Sira nain 3 transfere tiha ona ba kuarentena obrigatoriu no sira nia rezultadu teste dala rua agora sai negativu, entaun ujestaun husi pareser mai husi mediku sira no frontliner covid-19 Oe-Kusi Ambeno nian husu para sira hetan loron 14 iha karantena obrigatoriu hanesan medidas prevensaun ba oin,” Bano afirma.

Abilio Elo Nini
Author: Abilio Elo NiniWebsite: www.oekusipost.comEmail: Este endereço de email está sendo protegido de spambots. Você precisa do JavaScript ativado para vê-lo.
Reporter
Reporter base in Ambeno, Oecusse.

PUBLISIDADE