OE-BAU (TOP) – Estudante no funsionariu públiku inklui sidadaun sira seluk ne’ebé ba pasa ferias loron Santu Natal 2020 no tinan foun 2021 iha Rejiaun Administrativu Espesial Oe-Kusi Ambeno (RAEOA) oras ne’e labele fila ba kapital nasaun, tanba hafoin deklarasaun Estadu emerjensia bandu movimentu transporte maritima ba rai-ketan ne’e.
Ho kestaun ne’e, estudante sira iha Oe-Kusi Ambeno ezije ona ba Prezidente Autoridade RAEOA Arsenio Paixão Bano hodi buka solusaun atu oinsa bele fasilita sidadaun hirak ne’e bele ba Dili. No, tuir informasaun balun ne’ebé The Oe-Kusi Post asesu katak, transporte maritima sei hala’o hikas atividade hanesan baibain iha loron 18 Janeiru 2021, maibé informasaun ne’ebé seidauk iha nia klareza loloos.
“Ohin ami tama lori karta hato’o ba maibé sira iha gabinete laran ne’e dehan labele, agora prezidente autoridade okupadu loos, ne’e maka sira haruka ami sai mai ona, rezultadu mos ami lahatene,” hateten reprezentante estudante Oe-Kusi Ambeno Jose Mala ba TOP iha Oe-Kusi Ambeno Kinta 7 Janeiru 2021.
Maibé, ikus mai Bano klarifika, nia halo tuir de’it desijaun Estadu emerjensia ne’ebé deklara sai ona husi Prezidente Repúblika Francisco Guterres Lú Olo iha Dezembru tinan kotuk.
“Ita tenki kumpri rezolusaun guvernu nian, ita hein bainhira muda rezolusaun maka ita foin halo viajen, ne’ebé iha 18 Janeiro ro hahu halo ona operasaun, transporte hetan ona autorizasaunkrta ne’ebé maka autoridade haruka ba Primeiru-Ministru hetan ona autorizasaun,” Bano klarifika.
