AMBENO (TOP) – Ema hamutuk nain 55 iha Rejiaun Administrativu Espesial Oe-Kusi Ambeno (RAEOA) maka oras ne’e re-integra ona ho sira nia familia hafoin rezultadu teste hatudu negativu, no mós kumpri tiha ona kuarentena obrigatoriu durante loron 14 iha fatin kuarentena sira iha Ambeno.
Tuir informasaun ne’ebé The Oe-Kusi Post (TOP) asesu husi pájina ofisial ZEEMS TL, prosesu liberta ka re-intrega sidadaun karantina nain 55 ne’e hala’o iha loron 6 Janeiru 2021 husi Prezidente Autoridade ba RAEOA Arsenio Paixão Bano no, prosesu re-intrega sidadaun karantina sira iha Sentral Eletrika Inur Sakato partisipa husi membru autoridade sira ne’ebé hetan autorizasaun husi Arsenio Bano.
Husi sidadaun nain 55 ne’e fahe ba nain 33 husi kuarentena Hotel Oe-Upu, auto-kuarentena hamutuk ema 22, no mai husi kuarentena hotel Lifau iha ema nain 2, nain 7 husi rezidensia Domingos Salu, no ikus liu maka ema nain 13 husi Sentral Eletrika Inur Sakato.
Oras ne’e sei iha ema nain hamutuk nain 8 maka sei kontinua kumpri kuarentena obrigatoriu. Husi nain 8 ne’e, nain 5 maka kumpri kuarentena obrigatoriu iha Hotel Oe-Upun, no nain 3 ne’ebé pozitivu iha loron 24 Dezembru 2020 sei kontinua hela iha izolamentu iha Klinika Kurasaun RAEOA.
Presidente Autoridade RAEOA Arsénio Paixão Bano kontinua husu ba sidadadaun hotu iha Oe-Kusi Ambeno hodi kumpri nafatin medida prevensaun Covid-19 atu nune’e bele prevene aan husi moras da’et ne’e.
“Labele halibur ema barak, halo distansiamentu fiziku inklui sempre uza maskara no fase liman bebeik, labele halo movimentu hakat fronteira liu-liu labele hatama sasan illegal husi fronteira. Di’ak liu ita hamenus risku ba ita nia rai ketan ho kumpri saida maka autoridade no serbisu frontliners Covid-19 RAEOA halo,” Bano apela.
Autoridade mós autoriza ona loja sira bele hala’o sira nia atividade negósiu, maibé sidadaun sira maka tenke kumpre nafatin medida prevensaun Covid-19 hanesan mantein distansiamentu sosial, distansia fiziku, uja maskara bainhira sai ba merkadu no fatin ne’ebé de’it mós tenke uja nafatin, no labele halibur ema to’o nain 10.
Maibé, faktu hatudu atividade negósiu ne’ebé akontese iha merkadu Mau-Mate iha loron Tersa liuba barak maka seidauk uja maskara, laiha distansia sosial, no fiziku.
