DILI (TOP) - Universidade Nasional Timor Lorosa’e (UNTL), liuhusi Faculdade de Ciências Sociais e Políticas (FCSP) serbisu hamutuk ho Japan International Cooperation Agency (JICA) estabelese ona sentru Formasaun Lian Japanés iha Kampus Caicoli, Díli.
Tuir informasaun ne’ebé The Oe-Kusi Post (TOP) asesu husi Pájina Ofisial UNTL katak, estabelesementu sentru lian Japonés iha kampus Caicoli ne’e atu fasilita liu-tan estudante UNTL sira hodi bele hetan asesu bolsu estudu ba Japaun.
Tanba ne’e, tuir Dekanu FCSP UNTL, Alarico da Costa Ximenes katak, Sentru Formasaun Lian Japaun ne’e la’ós ba estudante FCSP de’it, maibé loke ba estudante husi fakuldade hotu iha UNTL.
“Programa ne’e implementa liuhusi kooperasaun entre UNTL, Waseda University, Embaixada Japaun no JICA atu fó oportunidade bolsa estudu ba estudante sira. Lian Japaun iha poténsia ekonómika, importante ba joven Timoroan. Espera estudante sira bele aproveita oportunidade atu aprende hodi prepara an ba futuru", esplika Dekanu Alarico ba media UNTL iha Kampus FCSP, Caicoli-Díli iha loron 22 Maiu 2026.
Iha fatin hanesan, Pontu-Fokal Programa Mestre Janio Tilman hateten, ideia atu estabelese refere, hahú husi diskusaun entre UNTL no Embaixada Japaun iha Timor-Leste, iha tinan 2025 atu hametin kooperasaun akademika no kultura entre nasaun rua.
“Liuhusi komunikasaun no koordenasaun ne’ebé hala’o durante tinan 2025, UNTL no Embaixada Japaun konkorda atu hahú atividade preparatória ba estabelesimentu Centro Estudos Japonés iha UNTL. Atividade ne’ebé implementa mak kursu Língua Japanés, sai hanesan pasu inisiál atu prepara estudante sira kona-ba lingua kultura japonés", dehan Mestri Janio.
Sentru Língua Japoneza hanesan sentru akadémiku ida hodi promove estudu, peskiza no troka koñesimentu entre Timor-Leste no Japaun. Aleinde ne’e hametin liután kooperasaun entre UNTL no instituisaun edukativa sira iha Japaun. Sei fó oportunidade ba estudante, dosente sira atu dezenvolve kooperasaun internasionál no partisipasaun akadémika iha rejiaun Asia no ASEAN.
