Arsenio Bano: ha’u la rai odiu ba ema ida

Prezidente Autoridade ba RAEOA fó hela diskursu bainhira foin tun husi ro ferry Berlin Nakroma iha portu Iwao Kita Hara, Mahata Sesta 19 Juñu 2020. Foto ID FB JGc M. D'Cruz Salu.

AMBENO (TOP) – Atu dezenvolve rai-ketan Oe-Kusi Ambeno ba oin, Prezidente Autoridade ba Rejiaun Administrativu Oe-Kusi Ambeno (RAEOA), no Zona Espesial ba Ekonomia Sosial Merkadu (ZEESM), Arsenio Paixão Bano husu ona ba Ambeno oan sira atu serbisu hamutuk.

Hafoin tun husi ro ferry Berlin Nakroma iha loron Sesta 19 Juñu 2020 oras tuku 7 dadersan, Bano promete ba Ambeno oan sira katka nia uma nakloke oras 24 nia laran hodi atende sira nia preokupasaun, no sei la hirus ema ida.

“Kuandu loron manas sa’e ona ne’e ha’u hakarak laiha ona problema ho ema ida, tanba ha’u hakarak serbisu. Jadi kuandu ha’u hirus ema ida ne’e sempre la to’o 24 jam, tanba ha’u lakohi stress loron tomak hanoin ema ida. Ne’e ha’u nia estilu. Ha’u la rai odiu ba ema, tanba ha’u la odiu ema, tanba ha’u hakarak kalan toba ne’e mehi ha’u nia fen, ha’u nia oan sira, la’os mehi be ida ha’u hirus nia ne’e,” hatete Bano iha portu Iwao Kita Hara, Mahata, Oe-Kusi Ambeno Sesta 19 Juñu 2020.

“Entaun, ita lalika iha problema ba malu, Oe-Kusi oan sira, ita lalika iha problema ba malu, tanba ita nia objetivu mak lori Oe-Kusi dezenvolvimentu la’o ba oin,” Bano afirma.

Bano hatutan, to’o oras ne’e seidauk troka nia númeru telemovél, no nia uma mós seidauk muda, sei nafatin iha Padimau. Tanba ne’e nia husu ba Ambeno oan sira katak bainhira presija nia bele kontaktu de’it ba nia númeru telemovél ka bele ba direita nia uma hodi hato’o saida mak presija hato’o.

“Ha’u nia númeru kontaktu telemovél sei nafatin, uma mós seidauk muda rezidensia Fulolo, ka Padimau nakloke oras 24 prontu atende imi nia preokupasaun saida deit. Manda mensajen telefone ha’u sei atende tanba desde uluk kedas ha’u nia prinsipiu mak ida ne’e”.





“Ha’u sempre laiha problema ho ema to’o tempu naruk, tanba ha’u lakohi perde tempu hodi aplika de’it odiu no vingansa tanba de’it ema ida-rua nia problema, di’ak liu fokus liu hala’o serbisu ba povu iha rai Oe-Kusi Ambeno ba oin hanesan mós ho governu sentral,” Bano promete.

Nia mós husu ba Ambeno oan sira atu para ona insulta malu iha plata forma media sosial sira, tanba tuir nia katak hahalok ne’e sei la kontribui ba prosesu dezenvolvimentu iha rai-ketan ne’e, maibé lakon tempu de’it.

“Ha’u husu ho haraik a’an ba ita boot sira ba ita Oe-Kusi hotu, para ona ho insulta malu odiu vingansa tanba ita nia objetivu ida de’it mak serbisu ba Oe-Kusi, ida ne’e deit maka hau husu”.

“ita lalika iha problema ba malu, ha’u nia maluk Oe-Kusi sira lalika iha problema malu tanba ita nia objetivu mak lori dezenvolvimentu la’o ba oin, ita nia objetivu mak lori ema atu mai investe osan iha Oe-Kusi”.

Maske husu atu labele odiu no halo vingansa ba malu, maibé Bano mós husu ba funsionariu tomak iha RAEOA inklui sekretariu rejionál sira atu serbisu ho didi’ak, no se mak halo serbisu ho di’ak merese hetan respeitu, maibé se mak la halo serbisu ho responsabilidade no la halo serbisu ho di’ak sei troka fali ho ema seluk.

“Ha’u atu dehan de’it mós katak Prezidenti Autoridade iha kompetensia rekomenda no hapara sekretariu rejionál sira, entaun iha tinan rua ka tinan ida sekretariu rejionál ida la serbisu ho seriu bele troka tau fali ema seluk,” Bano promete.

Nia hatutan, ba Oe-Kusi Ambeno nia di’ak, nia sei la uja sentimentu hodi foti desijaun ba sira ne’ebé la hatudu komportamentu di’ak no la hatudu prestasaun serbisu di’ak, maibé sei aplika regra sira ho rigor.

“Ha’u la uza perasaan barak liu, iha ne’e ha’u hatete de’it buat ida ba funsionáriu no diretor sira, se mak serbisu ha’u respeitu nia, nia sei serbisu ba oin. Se mak la serbisu ha’u sei halo prosesu ba nia tanba interese ne’e Oe-Kusi mak tenki ba oin, labele ema ida ema rua ninian,” Bano promete no ameasa ba sira ne’ebé aban-bain rua la halo serbisu ho di’ak.

Nia hatutan, nia rasik sei la lakon buat ida, tanba nia fila ba Oe-Kusi Ambeno hodi husik hela nia familia sira iha rai do’ok (iha Austrália) ne’eba fila ba Oe-Kusi Ambeno hodi dezenvolve rai-ketan ne’e ba oin.

“Ha’u mós la lakon buat ida tanba ha’u mai husik hela ha’u nia familia iha rai dook ne’eba, hakarak fila-fali mai Oe-Kusi atu serbisu ba Oe-Kusi, ne’ebé ha’u lalakon buat ida kuandu hau’ aplika regras hira ne’e bainhira Oe-Kusi ba oin,” Bano esplika.

Bano promete, nu’udar primeiru Prezidenti Autoridade Oe-Kusi oan, sei halo mudansa ba dezenvolvimentu di’ak iha Oe-Kusi no apela kedas ba povu Ambeno katak se mak sei asume pasta membru autoridade tenke serbisu ho responsabilidade, neutralidade no tranparensia ba povu tomak.

Entretantu, iha parte lorokraik, Bano hamutuk ho lia-nain sira husi suku 18 halo seremónia ritual iha Oe-Sonaf (Oe-Sono), Oe-Kusi Ambeno.

Abilio Elo Nini
Author: Abilio Elo NiniWebsite: www.oekusipost.comEmail: Este endereço de email está sendo protegido de spambots. Você precisa do JavaScript ativado para vê-lo.
Reporter
Reporter base in Ambeno, Oecusse.

PUBLISIDADE