DILI (TOP) - Rezultadu reuniaun Konsellu Ministru sira iha loron Kuarta, 13 Maiu 2026 desidi hodi taka temporaria ba ensinu arte marsiál no ritual sira iha teritóriu nasionál.
Tuir Komunikadu ba Imprensa husi Konsellu Ministru sira katak, Konsellu Ministru sira ona aprova projetu Rezolusaun Governu kona-ba medida sira atu hametin seguransa públika no prevene violénsia.
“Desizaun ida-ne'e mosu hafoin insidente violénsia sira ne'ebé rejista iha semana hirak ikus ne'e iha fatin oioin iha nasaun ne’e, ne'ebé envolve grupu joven sira no ho konsekuénsia maka'as ba integridade fízika sidadaun sira nian, ba propriedade privada, no mós ba estabilidade hosi komunidade sira ne'ebé afetadu. Insidente sira-ne'e sai grave liu iha loron 10 fulan-maiu, iha Mehara, Postu Administrativu Tutuala, Munisípiu Lautein, ne'ebé konfrontu ida envolve grupu joven sira ne’ebé bele halo sidadaun ida mate,” konteudu rezultadu reuniaun Konsellu Ministru sira iha loron Kuarta, 13 Maiu 2026.
Komuikadu ba Imprensa ne’e sita Governu nia pozisaun kondena ho forma klara no makaas ba aktu destruisaun hotu-hotu ba sasán ne’ebé halo ema lakon vida, ofensa ba integridade fízika sidadaun sira-nian ka estragu propriedade privada, la haree ba sé mak autór ka ninia razaun sira.
Entre medida sira ne'ebé aprova ona, Governu reafirma suspensaun temporáriu, iha territóriu nasionál tomak, atividade koletiva ensinu, aprendizajen no prátika arte marsiál no arte ritual sira, nune'e mós taka fatin sira ne'ebé uza hodi hala’o atividade hirak-ne'e. Medida ida-ne'e iha karater exepsionál, proporsionál, no preventivu, ho objetivu atu hapara uzu aproveitamentu hosi atividade sira-ne'e nu'udar dalan ida hodi organiza aktu violentu sira.
Rezolusaun Governu ne’e mós determina reforsu operasaun patrullamentu husi Polísia Nasionál Timor-Leste iha territóriu nasionál tomak, liuliu iha área no oráriu ho konsentrasaun boot tebes husi joven sira ka ho istória violénsia nian, no mós husu kolaborasaun husi lider komunitáriu, liuliu Xefe Suku no Xefe Aldeia sira, hodi relata situasaun sira kona-ba suspensaun atividade ne’ebé relasiona ho arte marsiál no arte rituál.
Autoridade munisípiu sira, Rejiaun Administrativa Espesiál Oe-Kusi Ambenu no Autoridade Administrativa Ataúro nian tenke garante atu hatutan kedas informasaun sira-ne’e ba autoridade polísia kompetente sira. Rezolusaun ne’e mós determina atu autoridade polísia sira kontinua no aselera investigasaun ne’ebé la’o hela relasiona ho insidente violénsia ne’ebé verifika tiha ona, no atu ninia autór sira tenke responsabiliza tuir lei.
Antes ne’e, Portavoz PNTL Suprendidenti Xefe Policia, Joao Belo dos Reis hateten, Komandu Polisia Nasional Timor Leste (PNTL) munisipiu Lautem rejista ona kazu homesidu agravadu ne’ebé akontese iha aldeia Poros, suku Mehara, postu administrativu Lospalos, munisipiu Lautem ho númeru NUC:0028/26.LACIC no sei aprezenta ba Ministériu Públiku Baucau.
Kazu ne’e rezulta Vincencio de Jesus Fernandes lakon vida no joven Rivaldo Caetano Lopes hetan kanek, no polisia detein ona joven nain 10 ho naran inisiál LRH, DdSB, MBS, MF, MB, AF, RF, MG, IDC no LP inklui membru Falintil-Forsa Defeza Timor Leste (F-FDTL) nain ida.
Portavoz PNTL Suprendidenti Asistente Joao Belo dos Reis esplika, kronolojia husi kazu Mehara ne’e deskonfia no iha kontaminasaun ho lala’ok prátika arte marsiál tanba grupu ne’ebé mai husi Asalaino ne’e ho antesedente arte marsiál.
