DILI – Projetu moru protesaun ne’ebé lokaliza iha Ailok-Laran abandonadu besik tinan tolu (3) dezde tinan 2024 to’o ohin loron seidauk finaliza.
Tuir informasaun ofisial ne’ebé The Oe-Kusi Post (TOP) asesu husi postajen Komissáriu Adjuntu nain-rua husi Komisaun anti-Korupasaun (CAC), Rosário Salsinha Araújo no Miguel Acácio Faria, hamutuk ho Ekipa Unidade Inspesaun no Monitorizasaun (UIM) katak, foin lalais ne’e, hala’o monitorizasaun ba projetu moru protesaun iha Aldeia Timor Kmanek no Aldeia Rui Naclecar, Suku Bairo-Pite, Postu Administrativu Dom Aleixo.
Iha observasaun terenu, ekipa identifika katak projetu moru protesaun ne’ebé lokaliza iha Ailok-Laran ne’e abandona hela dezde tinan 2024 to’o ohin loron. Alende ne’e, kondisaun armajen ne’ebé uza hodi rai materiál no ekipamentu empreza nian mós hetan estragu totál.
Iha vizita ne’e, ekipa mós identifika totál projetu hamutuk 8 iha área refere, Projetu 2 Abandona hela, Projetu 4 Finaliza ona 100%, Projetu 2 Sei la’o hela (on going).
Komissáriu Adjuntu Miguel Acácio Faria, hateten katak objetivu husi monitorizasaun ne’e mak atu buka hatene informasaun ne’ebé loloos, kridível, no bazeia ba faktu ne’ebé iha terenu.
CAC hakarak hatene tanba sá projetu ne'e para no saida mak sai kestaun prinsipál," dehan Komissáriu Adjuntu Miguel Acácio.
CAC liuhusi ekipa monitorizasaun husu ona ba Ministériu Obras Públikas (MOP) atu aprezenta dokumentu kontratu husi projetu refere. Ida-ne’e importante tebes atu CAC bele halo análize kle’an kona-ba durasaun tempu, orsamentu, no responsabilidade empreza nian, nune’e mós atu komunidade bele asesu ba informasaun ne’ebé transparente.
Komissáriu Adjuntu Rosário Salsinha Araújo hateten katak CAC sei la nonok bainhira haree projetu ne’ebé uza osan estadu maibé abandona hela.
CAC ninia prezensa atu deteta komprimentu sira tuir BOQ, Dezenu no kontratu sira atu nune labele fo prejuisu ba estadu wainhira iha implementasaun mak hamosu risku korupsaun mak entidade relevante sei assume responsabilidade afirma Rosário
Iha biban hanesan, empreza sira mós fó ona promesa ba CAC katak sei finaliza servisu sira-ne’e iha loron 5 fulan-Maiu tinan ne’e.
Partisipa mós iha monitorizasaun ne’e, Xefe Suku Bairo-Pite, Xefe Aldeia no autoridade lokál sira hodi akompaña ekipa CAC hodi haree besik kondisaun iha terenu.
