DILI (TOP) – Governu liu husi reuniaun Konsellu Ministru sira ne’ebé lidera husi Primeiru-Ministru, Taur Matan Ruak nomeia hikas Arsenio Paixão Bano hodi troka José Luis Guterres ‘Lugu’ husi kargu Prezidente Autoridade ba Rejiaun Administrativu Espesial Oe-Kusi Ambeno.
Maske iha loron 30 Abril 2018, eis portavoz AMP atual PM Taur ne’e sarani Arsenio Bano nu’udar buan ida, maibé oras ne’e nomeia hikas ona hodi troka Lugu.
Ohin Konsellu Ministru aprova projetu rezolusaun rua ne’ebé aprezenta husi Primeiru-Ministru, Taur Matan Ruak. Projetu rezolusaun ida mak kona-bá nomeia Arsenio Paixão Bano hodi assume kargu nu’udar Prezidente Autoridade ba RAEOA, no ezonera Lugu husi nia kargu ne’e.
Desijaun ezonera Lugu ne’e akontese hafoin Bano ba hasoru PM Taur iha Palásiu Governu iha loron Segunda 08 Juñu 2020. No, durante sorumutu ne’e, Bano konfesa katak nia simu lia-murak (midar) barak husi PM Taur kona-bá oinsa atu lori Oe-Kusi Ambeno tenke ba oin nafatin.
Notisia relevante: Destinu RAEOA Bano ha’u simu ona lia murak husi PM Taur
Lugu simu posse husi Primeiru-Ministru, Taur Matan Ruak iha fulan Novembru 2019 iha Palásiu Governu hodi assume kargu nu’udar Prezidente Autoridade ba RAEOA no ZEESM-TL ba durasaun tinan 5, maibé Lugu afirma, nia sei sai ho laran moras no laran triste, bainhira akontese substituisaun ba nia pozisaun iha Oe-Kusi Ambeno.
Notisia relevante: Lugu sei sai ho fuan moras.
Durante kampaña eleitoral ba eleisaun antisipada, eis protavos AMP, Taur Matan Ruak hakilar no promete iha kampu futebol Oe-Bau, Oe-Kusi Ambeno katak, bainhira AMP manan eleisaun, sei hasai Mari Alkatiri no Arsenio Bano husi Oe-Kusi Ambeno, realidade laiha. Promesa ne’e bosok de’it, tanba Alkatiri ho Bano sira nia mandatu mak remata to’o tinan lima (5), laiha ema ida mak hasai sira husi Oe-Kusi Ambeno.
“Ha’u iha mehi ida, imi hatene ha’u nia mehi mak saida. Tinan kotuk, ha’u hamrik iha ne’eba, ha’u ko’alia saida. Ha’u hakarak Mari Alkatiri sai husi Oe-Kusi. Tanba nia halo terus liu ona imi. Ha’u moe fali, Ha’u uluk Prezidente mai vizita suku hotu-hotu. Imi balun hakuak ha’u tanis dehan maun, Mari hare ami la di’ak. Maibé, imi fila kotuk ha’u mai hatete ba imi fó kadeira 8 de’it kasian,” hateten eis portavoz AMP atual Primeiru-Ministru Taur Matan Ruak durante kampaña ba eleisaun antisipada iha kampu futebol Oe-Bau, Oe-Kusi Ambeno iha loron 30 Abril tinan 2018.
“Agora ne’e referendum kedua, sa tan ho avo Nana, alin Naimori. Imi tenke fó. Maibé, la’os avo Mari de’it mak ha’u hakarak nia sai, buan ida Oe-Kusi oan ha’u koñese naran Arsenio Bano, ha’u hakarak nia sai tan,” afirma Taur.
Entretantu, tuir observasaun The Oe-Kusi Post (TOP) ba rezultadu implementasaun projetu pilotu ZEESM durante tinan lima (2015-2019) iha Oe-Kusi Ambeno konsentra de’it iha suku lima (5) iha villa, no suku 13 iha parte foho sai abandonadu tiha to’o ohin loron. Kondisaun real ba suku 13 ne’e laiha mudansa. La’os ida ne’e de’it, maibé mós hamosu diskriminasaun ba asesu serbisu iha administrasaun públika nian ne’ebé sira husi sub-rejiaun Pante Macassar mak hetan sorte di’ak no oportunidade barak liu kompara ho sira ne’ebé husi sub-rejiaun 3 hanesan Nitibe, Pasabe no Oe-Silo ladun hetan oportunidade maske sira mós mesak Ambeno oan de'it.
