DILI (TOP) – Primeiru Ministru (PM), Taur Matan Ruak hateten, nia desijaun hodi ezonera José Luis Guterres husi kargu Prezidente Autoriedade Rejiaun Administrativa Espesiál Oekusse Ambeno no Zona Espesiál Ekonómika Sosiál Merkadu (RAEOA-ZEESM) tanba iha ona koligasaun foun, no iha mós konsensu husu koligasaun foun ne’e rasik.
"José Luis Guterres sai husi Oecusse Ambeno tanba iha ona konjuntura polítika foun. Nomeasaun uluk ne'e husi koligasaun tuan, maibé agora ne'e iha ona koligasaun foun," PM Taur hateten iha Palásiu Governu, Dili Sesta 12 Juñu 2020.
PM Taur mós esplika katak, bainhira iha ona konsensu foun, entaun tenke adapta ba situasaun, buka intende malu, nune’e bele rezolve problema sira ne'e la ho provokasaun ruma.
Entretantu, José Luis Guterres nomeia husi Konsellu Ministru ne'ebé ukun husi CNRT, PLP no KHUNTO, no hetan pose husi Primeiru Ministru (PM) Taur Matan Ruak iha Palásiu Governu loron 13 Novembru 2019 no ezonera husi Konsellu Ministru (KM) ne'ebé ukun husi Fretilin, PLP no KHUNTO iha loron 10 Juñu 2020.
