AMBENO (TOP)- Xefe suku hamutuk 18 iha Rejiaun Administrativu Espesial Oe-Kusi Ambeno (RAEOA) loke ona sira nia konta bankaria iha Banku Nasionál ba Komersiu Timor-Leste (BNKTL) hodi bele simu subsidiu osan $200 husi governu.
Dadus uma kain tuir Etatal RAEOA katak hamutuk 20.331. Prosesu halo konta bankaria ne’e halo ona iha loron Segunda 08 Juñu 2020 iha banku BNKTL sukursal Oe-Kusi Ambeno.
"Ami simu orientasaun husi Ministério Administrasaun Estatal (MAE) dehan mai loke konta bankaria hodi bele simu subsidiu osan ne’e," xefe suku Naimeko, Marcos Liu Abi hateten ba The Oe-Kusi Post iha Oe-Kusi Ambeno, Segunda 08 Juñu 2020.
"Sira haruka ami rejistu dehan osan subsidiu familiar sei transfere liu husi konta bankaria suku idak-idak nian, tanba ne'e mak ohin ami mai, atu selu rejistu konta bankaria ne’e mós husi governu, ami mai loke de’it," Abi esplika.
Iha loron Segunda 01 Juñu 2020, Ministério Finansas liu husi Sekretáriu Tékniku Komisaun Jestaun Fundu Covid-19 valida dadus no konklui ona transferénsia subsidiu uma kain ba banku BNKTL, nune'e Ministériu Solidariedade Sosial no Inkluzaun (MSSI) bele fiksa kalendáriu hodi hahu halo pagamentu ba faze dahuluk. No, total osan transferénsia ne'e ho montante $59.623.800, ne'ebe korresponde ba pagamentu subsidiu fulan-rua nian hamutuk $200 ba kada uma kain hamutuk 298.199 iha munisipiu 12 la inklui Oe-Kusi Ambeno, tanba Ministériu Finansas sedauk simu konta bankaria husi Oe-kusi Ambeno.
