DILI (TOP) – Rezultadu husi viabiliza governu atual iha posibilidade boot hodi habadak mandatu no destinu Prezidente Autoridade ba Rejiaun Administrativu Espesial Oe-Kusi Ambeno (RAEOA) no Zona Espesial ba Ekonómia Sosial Merkadu (ZEESM), José Luis Guterres ‘Lugu’, tanba Arsenio Paixão Bano rona ona lia-fuan murak barak, no mós simu ona orientasaun husi Primeiru-Ministru, Taur Matan Ruak kona-ba oinsa rai ne’e bele la’o ba oin.
Lugu simu posse husi Primeiru-Ministru, Taur Matan Ruak iha fulan Novembru tinan kotuk hodi asume kna’ar nu’udar Prezidente Autoridade ba RAEOA-ZEESM ba tinan 5, maibé hafoin akontese mudansa politika iha rai-laran, kargu Lugu nian ne’e “nakdoko” itoan, tanba kauza husi politika viabiliza governu atual. Maibé, se akontese duni mudansa ba kargu ne’e Lugu “sei sai” ho fuan moras.
Eis Ministru Traballu no Reinsersaun Komunitaria iha governu dahuluk FRETILIN, Arsenio Paixão Bano katak nia simu ona lia-murak (midar) husi Primeiru-Ministru, Taur Matan Ruak kona-ba oinsa rai ne’e bele la’o ba oin.
“Ha’u enkontru ho Primeiru-Ministru, ha’u kontente tanba Primeiru-Ministru bele iha tempu hasoru ha’u. Husu itoan kona-bá Oe-Kusi Ambeno. Rona mós orientasaun, rona mós lia-fuan murak barak husi Primeiru-Ministru atu ba oin ne’e rai ne’e atu la’o oinsa, ha’u so dehan de’it ba maluk Oe-Kusi oan sira para kalma, la presija hirus malu, dun malu. Husik ba Primeiru-Ministru ho nia gabinete mak hare assuntu ne’e,” hateten eis Sekretáriu Rejionál Edukasaun RAEOA ne’e ba jornalista sira iha Palásiu Governu, Dili Segunda 08 Juñu 2020.
Eis Prezidente Interinu RAEOA ne’e hatutan, nia simu orientasaun ho lista ida naruk tebes, maibé importante mak atu hatete dehan Oe-Kusi Ambeno tenke ba oin hanesan mós governu sentral tenke ba oin.
“Ha’u eis sekretariu rejional, ha’u eis titular, ha’u mós ema Oe-Kusi Ambeno, ha’u koñese Oe-Kusi Ambeno di’ak. Serbisu tinan lima ha’u mak halo estudu iha ne’eba, Mari Alkatiri mak hahu, no serbisu barak la’o, tanba ne’e mak Primeiru-Ministru bolu ha’u atu konversa itoan. Hakarak hatene tuir pontu situasaun, no depois hanoin atu hakat ba oin ne’e oinsa”.
Kona-ba atu “duni sai” Lugu husi Oe-Kusi Ambeno, eis deputadu FRETILIN ne’e lakohi fó komentariu, maibé entrega tomak ba PM, Taur ho nia gabinete mak sei tetu no hakotu.
“Aranju politika ne’e ha’u fó ba…ne’e la’os ha’u nia kompetensia. Aranju politika ne’e ita hatene ona, mudansa iha Parlamentu Nasionál, iha governu. Ne’e kompetensia Primeiru-Ministru. Ha’u labele ko’alia liu ida ne’e,” Bano esplika.
“Maibé, nu’udar pessoal katak soldadu prontu ne’e sempre, siap selalu. Hanesan ha’u eis titular, ha’u simu mós pensaun. Se negara, bahasa karik dehan kalau negara perlu iya siap jangan tolak kerja baik-baik. Serbisu didi’ak,” Bano hatudu nia firmeza no prontidaun.
Hafoin baku fila tiha meja Parlamentu Nasionál, deputadu husi bankada FRETILIN, Fabião de Olivera ezije ba governu tenke hasai ona Lugu husi Oe-Kusi Ambeno ho rajaun durante fulan 7 hela de’it iha Dili, maibé Lugu defende katak nia tenke la’o ba-mai Dili hodi halo liña koordenasaun serbisu ho nasionál bazeia ba alterasaun lei númeru 3/2014.
Notisia relevante: FRETILIN ezije governu tenke troka Lugu
Durante kampaña eleitoral ba eleisaun antisipada, eis protavos AMP, Taur Matan Ruak hakilar no promete iha kampu futebol Oe-Bau, Oe-Kusi Ambeno katak, bainhira AMP manan eleisaun, sei hasai Mari Alkatiri no Arsenio Bano husi Oe-Kusi Ambeno, realidade laiha. Promesa ne’e bosok de’it, tanba Alkatiri ho Bano sira nia mandatu mak remata to’o tinan lima (5), laiha ema ida mak hasai sira husi Oe-Kusi Ambeno.
Entretantu, tuir observasaun The Oe-Kusi Post (TOP) ba rezultadu implementasaun projetu pilotu ZEESM durante tinan lima (2015-2019) iha Oe-Kusi Ambeno konsentra de’it iha suku lima (5) iha villa, no suku 13 iha parte foho sai abandonadu tiha to’o ohin loron. Kondisaun real ba suku 13 ne’e laiha mudansa. La’os ida ne’e de’it, maibé mós hamosu diskriminasaun ba asesu serbisu iha administrasaun públika nian ne’ebé sira husi sub-rejiaun Pante Macassar mak hetan sorte di’ak no oportunidade barak liu kompara ho sira ne’ebé husi sub-rejiaun 3 hanesan Nitibe, Pasabe no Oe-Silo ladun hetan oportunidade maske sira mós mesak Ambeno oan de'it.
