DILI (TOP) – Eis Prezidente interinu RAEOA-ZEESM, Arsenio Paixão Bano hateten, rezidensia 7 (hitu) iha Fulolo ne’e nu’udar privasidade ema invidu nian, tanba atu aluga ka kontratu ne’e la presija fó sai ba públiku ho rajaun ema nia privasidade.
Kona-bá estatutu rezidensia hirak ne’e ema kontratu ka aluga, Bano katak se de’it mak hela iha rezidensia hirak ne’e tenke selu, maibé nia dehan ida ne’e assuntu privadu entre autoridade ho sira ne’ebé mak halo kontratu, tanba ida ne’e investimentu privadu ho ema privadu.
“Investimentu públiku privadu tenke respeita ema nia privasidade,” hateten Bano ba jornalista sira iha Palásiu Governu, Dili Segunda 08 Juñu 2020.
Notisia relevante: Deskonfia Rezidensia Fulolo “nakfilak ba rezidensia privadu”
“Se ha’u kontratu ho ema ida, ema ida selu ha’u ijemplu aluga ha’u nia uma, ha’u presija hatete hotu, la’e!,” Bano afirma.
Nia esplika, rezidensia Fulolo ne’e investimentu públiku privadu. Katak, osan ne’ebé mak investe iha Fulolo, osan ne’e tenke tama fali.
“Agora ba oin mak ita hare, maibé politika ba investimentu Fulolo mak hanesan ne’e. Kontratu ha’u haluhan tiha, maibé ne’eba ne’e investimentu públiku privadu husi…uluk ne’e fundu dezenvolvimentu espesial. Osan ne’ebé mak gasta tenke tama fali.
Nia esplika rezidensia hirak ne’e atu aluga ka kontratu ka oinsa depende ba autoridade iha Oe-Kusi Ambeno mak tenke halo.
Entretantu, uma ida iha foho leten liu oras ne’e halo ona moru haleu, no The Oe-Kusi Post tenta ona halo konfirmasaun ho eis Prezidente Autoridade RAEOA, Mari Alkatiri, maibé laiha resposta.
Tuir deliberasaun Númeru 13/2017 iha loron 14 Setembru, eis Prezidente RAEOA, Mari Bin Amude Alkatiri desidi bele aluga imóveis iha parke rezidensia Fulolo.
Entretantu, rezultadu auditoria husi Tribunal Kamara Kontas ho númeru prosesu 2/2016A/UDIT-S/CC kona-bá kontrusaun rezidensia sira iha Fulolo ne’e fó de’it (ajudikasaun direita) ba kompañia Sheng Construction ho valor kontratu $1,687,037 iha loron 30 Setembru 2015.
