DILI (TOP) – Prezidente Autoridade ba Rejiaun Administrativu Espesial Oe-Kusi Ambeno (RAEOA) no Zona Espesial ba Ekonómia Sosial Merkadu (ZEESM), José Luis Guterres “Lugu” hateten, sei sai ho laran triste no fuan moras bainhira governu desidi muda nia sai husi Oe-Kusi Ambeno.
Lugu simu posse husi Primeiru-Ministru, Taur Matan Ruak iha fulan Novembru 2019 iha Palásiu Governu hodi assume kargu nu’udar Prezidente Autoridade ba RAEOA no ZEESM-TL ba durasaun tinan 5, maibé Lugu afirma, nia sei sai ho laran moras no laran triste, bainhira akontese substituisaun ba nia pozisaun iha Oe-Kusi Ambeno.
“Bele manan iha fatin seluk di’ak liu, bele di’ak liu, maibé ohin loron kuandu ha’u hare ona situasaun iha ne’eba, ha’u kala ho fuan moras, maibé moris mak ne’e, laiha problema ida,” Lugu hateten ba jornalista sira iha Farol-Dili, Tersa 26 Maiu 2020.
Bazeia ba mudansa politika atual ikus mai mosu polémika ida katak, governu "sei desidi" ema seluk husi "partidu FRETILIN" atu troka Lugu iha Oe-Kusi Ambeno, maibé Lugu klarifika katak to’o oras ne’e seidauk simu karta substituisaun formal ruma husi Pirmeiru-Ministru kona-bá assuntu ne’e.
“Ha’u, buat sira ne’e ha’u ba mós, tanba iha desijaun ida husi Primeiru-Ministru. Tuir lei ne’ebé iha, mandatu ne’e tinan 5, maibé iha politika ita hotu tenke preparadu katak, buat hotu bele muda. Ne’ebé ha’u hein kuandu Primeiru-Ministru dehan okay tempu to’o ona, ema seluk ba. Ne’e ita hotu hanesan Timoroan, ita hotu tenke simu buat ne’ebé ita nia governu desidi,” Lugu esplika.
“Maibé, ha’u bele dehan ba imi katak ha’u hare terus ne’ebé ferik no katuas sira iha, ha’u sei sai karik ha’u nia laran moras. Tanba ha’u iha oportunidade ida atu servi ba povu Oe-Kusi Ambeno, maibé oportunidade ne’e la to’o rohan, ne’ebé ita hanesan triste, maibé ita tenke simu buat ne’ebé ita nia governu halo desijaun.”
Nia hatutan, to’o oras ne’e nia seidauk simu karta ruma hosi governu.
“Seidauk, laiha. Primeiru-Ministru nunka dehan ba ha’u katak Lugu prepara a’an para mai fatin seluk, mai Dili ona. Primeiru-Ministru nunka dehan buat ida ne’e. Ema ko’alia barak, ha’u rona maibé ha’u responde ne’e ba buat ne’ebé ema ko’alia. Ne’ebé to’o agora Primeiru-Ministru hatene mós nia mak fó posse, nia hatene katak fó ba tinan 5, maibé lei sira ne’e hotu Konsellu Ministru sira bele desidi oin seluk, no mós ba parlamentu bele halo buat ruma.”
Entretantu, kampaña politika Aliansa Mudansa ba Progresu (AMP) ba eleisaun antisipa iha Oe-Kusi Ambeno, porta vóz atual Primeiru-Ministru, Taur Matan Ruak hakilar ho lian maka'as katak bainhira AMP manan eleisaun antisipada sei hasai Mari Alkatiri no Arsenio Bano husi Oe-Kusi Ambeno, maibé realidade la akontese, tanba ema nain-rua ne'e sira nia mandatu mak remata, la'ós AMP mak hasai.
