DILI (TOP) – Ministériu Edukasaun Juventude no Desportu (MEJD), apoiu motorizada lima (5) ba Oe-Kusi Ambeno.
Ministra Edukasaun Joventude no Desportu, Dulce de Jesus hateten, material ne'ebé atu tulun Edukasaun Rejiaun Oe-Kusi hanesan máskara, kadeira no motorizada lima (5) atu fasilita estudante sira nia prosesu aprendizajen lor-loron.
"Ministériu Edukasaun Juventude no Desportu hamutuk ho Edukasaun Rejiaun Oe-Kusi Ambeno, ami hamutuk hodi entrega materiais hanesan motorizada lima, máskara no kadeira hodi reforsa espesaun serbisu iha RAEAO antes abertura fali prosesu aprendizajen ba estudante sira," Ministra Dulce hateten ba jornalista sira liu husi konferénsia ba imprensa iha nia serbisu fatin Vila-Verde, Dili Tersa 09 Juñu 2020.
Governante ne’e hatutan, ministériu edukasaun iha nós kriteria ne'ebé atu regula estudante sira hodi halo tuir kriteria ne'ebé hato'o ona husi guvernu Timor-Leste durante Estadu emerjénsia ba iha kada eskola ida-idak antes estabelese fali prosesu aprendizajen.
"Ami sei halo preparasun ba prosesu aprendizajen ba esdaunte sira iha teritoriu laran, ba material hirak ne'ebé ami oferese ba edukasaun Rejiaun Oe-Kusi Ambeno, ami hein katak iha Oe-Kusi Ambeno bainhira estudante sira halo tuir kriteria hirak ne'e,” hatutan Dulce.
Nia dehan, husi edukasaun Oe-Kusi Ambeno bele halo sertifikadu hodi hato'o ba MEJD depois mak husi ministériu haruka fila karta ida ba Ministériu Saúde atu sira bele halo verifikasaun katak, eskola ida ne'e priense ona kriteria ne'ebé rekreta husi ministériu saúde.
Ministra ne’e hatutan tan katak, husi embaixada Austrália apoiu osan dolar Amerikanu rihun atus rua ($200.000), máskara 200.000 ba MEJD hodi fasilita estudante sira durante prosesu aprendizajen. MEJD asina ona dokumentu ida ne'ebé mak hetan ona apoiu husi Global Education/ Global facilidade edukasaun ho fundu ida ho naran aselera Covid-19 ho montante $3.5 milhões ba prevensaun Covid-19 kada eskola ida-idak iha Timor-Leste tomak, inklui aula aprendizajen hodi akumula estudante sira iha prosesu aprendizajen durenta Estadu emerjénsia.
Alende ne'e mos, MEJD sei oferese tanki bee ba eskola ida-idak atu estudante sira bele fase sira nia liman atu nune'e estudante sira no profesor sira bele asegura aan ba moras Covid-19.
Iha fatin hanesan, inspektora Jeral MEJD, Maria Gusmão Manuela hateten, ekipa husi inspetor jeral entrega motorizada 5 inklui material prevensaun covid-19 ba Prezidente Autoridade Rejiaun Administrativa Espesial Oe-Kusi Ambeno ho nia ekipa tomak, hodi reforsa atividade prosesu aprendizajen ba esdaunte sira iha Oe-Kusi Ambeno.
"Motorizada hirak ne'e sosa tiha ona iha tinan lima kotuk, maibé depois de enkontru inspetor sira iha Oe-Kusi Ambeno hodi hala'o fila fali knaar sira nian, ha'u hanoin ne'e importante tebes atu nune'e ita bele hadi’a ita nia eskola sira iha baze, sei ita la tau matan ba sira, eskola sira bele iha difikuldade oi-oin, tan ne'e ita oferese ba sira atu sira bele halo atividade ho di'ak ba ita nia rai," hatete nia.
Nia hatutan, fasilidade sira ne'e uza didiak hodi hala'o knaar, no husu mós ba inspetor sira iha Oe-Kusi Ambeno atu uza didiak sasan hirak ne'e hodi fasilita atividade lor-loron nian.
Entretantu, Presidente Autoridade RAEOA, José Luís Guterres ‘Lugu’ haktuir, oportunidade ida ne'e atu reforsa papel edukasaun iha rai laran no liuliu iha RAEOA.
“Inspetor sira ne’ebe hare ita nia eskola sira iha RAEOA dala ruma transporte mak difikulta sira nia atividade,” hateten Lugu.
"Ha'u partilla de’it katak, labarik sira mak futuru nasaun nian, maibé dala barak ita haluha katak, profesor sira mak hanorin no fó kbiit ba ita nia alin estudante sira hodi utiliza sira nia matenek atu nune'e sira bele dezenvolve ita nia nasaun, iha ne'e mós ami valoriza tebes ba papel profesor sira, no mós ba osan ne’ebé mak iha kaisa, ami hakarak fó fali ba profesór sira atu halo buat hotu-hotu, atu kria sira nia kondisan sira nia família, tanba profesór sira lá iha kondisaun ne'ebé di'ak, ne’e ita bele iha problema," haktuir diplomata ne’e.
Nia dehan, autoridade RAEOA apresia tebes ba MEJD ne'ebé oferese ona material sira ne'e, husi edukasaun rejional simu ho di'ak no kuidadu atu nune'e bele fasilita estudante sira ne'ebé hala'o sira nia prosesu aprendizajen lor-loron.
