DILI (TOP) – Prezidente Parlamentu Nasionál (PPN), Aniceto Guterres rekoñese, iha duni grupu joven ida hato’o petisaun ba nia kona-bá kritika sira hasoru Prezidente Autoridade ba Rejiaun Administrativu Espesial Oe-Kusi Ambeno (RAEOA), José Luis Guterres “Lugu”, maibé petisaun ne'e "tama sala kuartu", tanba kestaun ne’e kompetensia governu nian, la’ós kompetensia Parlamentu Nasionál.
PPN, Aniceto simu petisaun husi “joven partidariu Ambeno” iha nia gabinete iha loron 28 Maiu liuba.
“Maibé, ha’u hateten ba sira katak, buat hotu tenke la’o tuir ninia dalan, tanba ida ne’e kompetensia governu nian, liuliu Primeiru Ministru Taur Matan Ruak, atu hola desizaun,” hateten PPN, Aniceto ba jornalista sira hafoin remata sorumutu ho Prezidente Repúblika, Francisco Guterres “Lú Olo” iha Palásiu Prezidensial iha Ai-Tarak Laran, Dili Kuarta 03 Juñu 2020.
Dezeju atu “duni sai” Lugu husi Oe-Kusi Ambeno ne’e boot tebes, tanba hafoin deputadu husi bankada FRETILIN, Fabião de Oliveira husu no ezije kestaun ne’e iha sesaun plenaria Parlamentu Nasionál iha Segunda 01 Juñu dadersan, iha parte lorokraik joven sira ne’e mós halo kedas konferénsia ba imprensa katak tenke hasai ona Lugu husi Oe-Kusi Ambeno ho rajaun ne’ebé hanesan deputadu Fabião de Oliveira nian, FRETILIN ezije governu tenke troka Lugu. Joven sira ne’e ho fiar a’an no tebe-retek katak, sira reprezenta povu Oe-Kusi Ambeno, maibé parte balun inklui Francisco Loka konsidera Petisaun kontra Lugu la’ós reprezenta povu Ambeno tomak, maibé sira reprezenta grupu partidu politika ida.
Eis xefe bankada FRETILIN ne'e hatutan, komisaun espesializada Parlamentu nian sei ba halo fiskalizasaun ba planu no programa iha RAEOA, no mós sei husu instituisaun relevante sira atu halo auditoria mak foin rekomenda ba governu hodi foti desijaun.
Entretantu, alterasaun dahuluk ba Lei nú. 3/2014, 18 Juñu, ne’e la muda estatutu RAEOA-ZEESM, maibé muda de’it prosesu tomada pose ba Prezidente Autoridade RAEOA iha ne’ebé uluk Prezidente Repúblika mak fó pose maibé agora Primeiru-Ministru mak sei fó pose.
Alterasaun lei ne'e mós hatuur RAEOA nu'udar órgaun ida autónomu iha jestaun, maibé la’ós autonomia hanesan podér lokál ida. Podér lokál aban bainrua sei iha ninia órgaun ne’e eleitu hosi povu depois nia iha órgaun fiskalizadór ida no iha asembleia ida para atu kontrola.
Hafoin alterasaun ba lei ne'e, ikus mai Primeiru-Ministru, Taur Matan Ruak mak nomeia, no fó posse ba José Luis Guterres "Lugu" hodi asume kargu Prezidente Autoridade ba RAEOA-ZEESM TL, la'os hanesan lei uluk Prezidente Repúblika mak fó posse.
Lei foun ne'e katak, Prezidente Autoridade submete ba iha governu, no presija halo serbisu liña ministerial sira iha nasionál, no relatóriu sira mós submete ba iha governu, la'ós ba fali Prezidente Repúblika.
