DILI (TOP) – Governu liu husi reuniaun Konsellu Ministru (KM) sira desidi ona hodi foti tan osan hamutuk millaun 122,3 atu uja ba fulan ida ne’e inklui atu halo pagamentu ba impréstimu sira.
Rezultadu reuniaun KM ne’ebé The Oe-Kusi Post asesu iha portal ofisial governu nian katak, projetu deliberasaun kona-ba atu foti tan osan ne’e mai husi Ministru Finansa, Fernando Hanjam.
“Husi valór despeza hirak ne’ebá, valór ne’e inklui mós dolar Amerikanu millaun 3,3 hodi halo pagamentu ba Nakroma II no millaun hitu dolar Amerikanu hodi asegura pagamentu subsídiu estraordináriu, ho 60% hosi remunerasaun, iha ámbitu medida hodi fó apoiu ba empregu,” esplika rezultadu reuniaun KM, Kuarta 03 Juñu 2020.
Ministru Finansa aprezenta Proposta Lei, ne’ebé aprova ona iha Konsellu Ministru kona-ba autorizasaun hodi realiza transferénsia estraordinária hosi Fundu Petrolíferu no mós alterasaun dahuluk ba Lei n.º 2/2020, loron-6 fulan abril nian, ne’ebé kria fundu Covid-19.
Reseita hirak ne’ebé mai hosi reseita fiskal no saldu ezekusaun orsamentál hosi tinan kotuk nian, ne’ebé komplementa hosi transferénsia estraordináriu hosi Fundu Petrolíferu, autorizadu hosi Lei nº. 2/2020, loron-6 fulan abril nian, la sufisiente atu finansia atividade regular Administrasaun Públika nian, aleinde fulan agostu nian no montante ne’ebé atribui ba Fundu KOVID-19 hatudu katak la kobre despeza tomak ne’ebé previstu tuir medida prevensaun no kombate ba pandemia KOVID-19.
Diploma ida-ne’e ho objetivu atu fó autorizasaun atu realiza transferénsia estraordináriu hosi Fundu Petrolíferu ba Orsamentu Jerál Estadu ho valór 286. 800. 000 dolar Amerikanu hodi garante kondisaun finanseiru sufisiente ba funsionamentu normal Administrasaun Públika to’o loron ne’ebé aprova ona Orsamentu Jerál Estadu nian ba 2020. Proposta Lei ne’e mós sei hetan alterasaun dahuluk hosi Lei nº. 2/2020, loron-6 fulan abril nian, ne’ebé autoriza hodi realiza transferénsia estraordinária hosi Fundu Petrolíferu iha tinan finanseiru 2020 no kria Fundu KOVID-19, ho objetivu atu klarifika katak finalidade hosi Fundu ne’e sei finansia mós medida ba apoiu ekonómiku no protesaun sosial hodi hatán ba konsekuénsia ekonómika kona-ba medida prevensaun no kombate ba moras KOVID-19 no krize ekonómika mundiál ne’ebé provoka hosi pandemia nomós despeza ba funsionamentu fundu ne’e rasik.
Konsellu Ministru mós aprova Proposta Lei, ne’ebé aprezenta hosi Ministru Finansa, ba alterasaun dahuluk ba Lei nº. 14/2009, loron-21 fulan outubru nian, kona-ba Estatutu Remuneratóriu ba Titulár Kargu Polítiku sira.
Ho alterasaun ida-ne’e, ba Vise-Ministru ka Sekretáriu Estadu sira ne’ebé substitui kargu nuudar Ministru hodi ezerse sira-nia funsaun, ba períudu liu fulan tolu, tenke simu remunerasaun ne’ebé koresponde ba kargu Ministru nian hahú hosi loron ne’ebé hahú ezerse funsaun tuir rejime substituisaun nian to’o nia mandatu ramata. Diploma ida-ne’e hahú produz nia efeitu iha loron ne’ebé VIII Governu Konstitusionál simu posse.
