DILI (TOP) – Rezidente aldeia Oe-Baha, suku Bobometo, Francisco Loka konsidera joven nain 7 ne’ebé hatama petisaun kontra Prezidente Autoridade ba Rejiaun Administrativu Espesial Oe-Kusi Ambeno, José Luis Guterres “Lugu” ne’e la’ós reprezenta povu Ambeno tomak, maibé reprezenta partidu politika balun.
Entretantu, joven nain 7 hatama ona petisaun ba orgaun soberanu tolu hanesan ba governu, Parlamentu Nasionál, no Prezidente Repúblika kontra no ezije ba orgaun soberanu hirak ne’e tenke hasai Lugu husi Oe-Kusi Ambeno ho rajaun durante fulan 7 abandona nia serbisu.
Notisia relevante: Juventude FRETILIN Ambeno keixa ona Lugu
Konferénsia imprensa kontra Lugu husi joven nain 7 ne’e akontese hafoin deputadu husi bankada FRETILIN, Fabião de Oliveira levanta assuntu ne’e iha sesaun plenaria Parlamentu Nasionál iha loron Segunda 01 Juñu parte dadersan.
Notisia relevante: FRETILIN ezije governu tenke troka Lugu
Kona-ba kestaun ne’e, Loka konsidera joven nain 7 ne’e nu’udar Ambeno nia oan sira, no iha direitu duni atu hato’o sira nia opiniaun. “Maibé, sira ne’e la’ós reprezenta povu Oe-Kusi Ambeno tomak. Ha’u repete, sira la’ós povu Oe-Kusi Ambeno tomak. Sira ne’e reprezenta grupu, tanba sira iha intensaun ruma,” hateten Loka via kontaktu telemovél ba The Oe-Kusi Post (TOP), Tersa 02 Juñu 2020.
Nia mós konsidera joven hirak ne’e hanesan atu buka oin de’it, ba sa tuir nia katak atu reprezenta povu Ambeno ne’e tenke iha baze legal ida, no tenke hetan lejitimidade husi povu Oe-Kusi Ambeno tomak mak bele deklara ba públiku katak reprezenta sira.
Nia esplika, prosesu atu reprezenta povu Oe-Kusi Ambeno ne’e tenke desidi liu husi forum ida hili reprezentante mak foin bele reprezenta ba deklara assuntu ruma iha nasionál. “Ha’u la konkorda bainhira ita nia maun-alin sira…sim klaru sira iha direitu duni, maibé se bainhira ba iha nasionál atu hatun ida ne’eba, hateten a’at ida ne’e, ha’u pessoalmente, ha’u la konkorda”.
Antes ne’e parte balun mós konsidera joven nain 7 ne’e la’ós reprezenta povu Oe-Kusi Ambeno tomak, maibé reprezenta fali “Juventude FRETILIN Ambeno”, no Frans Loka mós konkorda ho kestaun ne’e. “Klaru, ne’e klaru duni”.
The Oe-Kusi Post tenta ona halo konfirmasaun ho José Tefa, maibé lakohi fó komentariu. “La presija, laiha tempu,” hateten Tefa.
Francisco Loka hatutan, la’ós de’it la reprezenta povu Oe-Kusi Ambeno, maibé la reprezenta mós juventude Oe-Kusi Ambeno, tanba tuir nia katak, atu reprezenta juventude sira iha Oe-Kusi Ambeno mós tenke desidi liu husi konferénsia juventude sira mak foin bele ba deklara a’an iha Dili.
Loka konsidera pozisaun José Tefa nian hodi halo konferénsia imprensa iha Dili ne’e nakonu ho interese ruma. Nia mós rekoñese Lugu durante fulan 7 nia laran ne’e labele halo buat ida ho rajaun Orsamentu Jeral Estadu (OJE) ba tinan ida ne’e laiha. Nia dehan, durante ne'e Lugu uja de’it osan duodesimu hodi finansia atividade administrasaun públiku sira iha Oe-Kusi Ambeno, no osan duodesimu ne’e mós lei la fó dalan atu halo mega projetu sira.
“Ita hotu bele iha planu di’ak, maibé kuandu orsamentu laiha, ita labele halo buat ruma,” nia esplika.
“Kuandu orsamentu laiha ne’e, buat ne’ebé mehi ne’e sei la realiza”.
Tanba ne’e, nia husu katak husik lai ba Lugu kumpri lai nia mandatu tinan 5 tuir konfiansa ne’ebé Primeiru-Ministru, Taur Matan Ruak depozita nia konfiansa ba nia, no depois remata nia mandatu mak bele halo avaliasaun. Entretantu, tuir dadus Estatal Oe-Kusi Ambeno versaun Maiu 2020 katak total uma kain iha Oe-Kusi Ambeno hamutuk 20.331, la’ós ema nain 100 de’it ne’ebé sai proponente ba petisaun kontra Lugu.
