“Juventude FRETILIN Ambeno” keixa ona Lugu

Joven nain 6 halo konferénsia ba imprensa kontra Lugu iha restaurante Jade iha Pantai Kelapa, Dili Segunda 01 Juñu 2020. Foto The Oe-Kusi Post/Marcelino Bata.

DILI (TOP) – “Juventude FRETILIN Ambeno” hato’o petisaun ba orgaun soberanu tolu (3) hodi kontra Prezidente Autoridade ba Rejiaun Administrativu Espesial Oe-Kusi Ambeno (RAEOA), José Luis Guterres “Lugu” ho rajaun abandona nia serbisu durante fulan 7 ona hafoin simu posse iha fulan Novembru tinan 2019.

Parte balun konsidera konteudu petisaun ne’ebé joven nain 6 sarani a’an reprezenta povu Oe-Kusi Ambeno ne’e hafalun metin ho politika, tanba ejijensia ne’ebé sira hato’o ba orgaun soberanu sira, no hato’o ba públiku la seluk, la le’et mak hanesan de’it ho eijensia husi asosiasaun REINO ne’ebé antes ne’e ameasa halo revolta hasoru Lugu bainhira la kumpre nia promesa sira hodi involve Ambeno oan sira iha postu Sekretariu Rejional sira no seluk tan, maibé Agustinho Caet konsidera REINO ne’e asosiasaun partidaria.

Notisia relevante: Caet: REINO ne’e “asosiasaun partidaria”

La’ós Caet de’it mak sarani REINO ne’e nu’udar liman-ain partidu ida nian, maibé rezidente bairo Masi, Vincencio Cono mós kondena REINO durante tinan lima (2015-2019) toba dukur hela maske povu Ambeno sira hasoru hela problema boot.

Notisia relevante: “povu terus tinan 5, REINO nonok de’it”

Maske parte balun konsidera joven nain ne’en (6) nu’udar juventude FRETILIN Ambeno, maibé joven sira ne’e deklara katak, sira reprezenta povu Oe-Kusi Ambeno tomak, maibé realidade hatudu povu Ambeno tomak seidauk fó lejitimidade ba joven sira ne’e hodi halo petisaun kontra Lugu, no mós atu halo deklarasaun ne’ebé nakonu ho intensaun politika.

“Ami reprezenta povu Oe-Kusi Ambeno,” hateten Nilton Rodrigues Pereira liu husi konferénsia imprensa ne’ebé hala’o iha restaurante Jade, Pantai Kelapa, Segunda 01 Juñu 2020.

Entretantu, José Tefa ne’ebé durante tinan 5 kontra maka’as eis Prezidente Autoridade RAEOA, Mari Bim Amude Alkatiri oras ne’e kontinua kontra tan Lugu ho ejijensia sira kuaje hanesan de’it ho ezijensia REINO nian. Ezijensia sira iha pontu 16 no asina husi ema nain 100, no deklara ba públiku liu husi konferénsia ba imprensa iha Restaurante Jade Praia dos Coqueiros, Segunda 01 Juñu 2020.

Pontu dahuluk katak, durante assume kargu hanesan Prezidente Autoridade, José Luis Guterres rejeita atu hela iha uma Estadu no deside ba hela fali iha uma privadu. Terseiru, durante fulan hitu, laiha eskritóriu permannete atu hala’o enkontru, maske eskritóriu Prezidente Autoridade nian iha kampaun autoridade RAEOA, Oebau abandonadu no nunka uza maibé uza fali sala enkontru hodi asina dokumentu sira.

Kuartu, durante fulan hitu José Luis Guterres falla atu nomeia sekretáriu rejionál sira, maibé nomeia no halo fali kontratu ba tékniku sira, inklui asesór barbarak, husi Dili no selu ho saláriu boot, tékniku no asesór hirak ne’e lor-loron la servisu, maibé kada fulan manan osan boot, maski povu okeusi halerik tanba hamlaha.

Kintu, mekanizmu halo kontratu, ba tékniku no asesór sira, la tuir prosedimentu legál, no ignora lei funsaun públiku, no dekretu lei, kona-ba kontratu traballu no termu sertu.

Sestu, Prezidente autoridade promete atu promove Ambeno oan sira hodi assume kargu iha gabinete RAEOA, maibé, realidade lori fali ema husi Dili no munisípiu seluk mak halo servisu iha Oe-Kusi Ambeno ho salariu mesak boot de’it, maibé la halo servisu.

Sétimu, durante fulan hitu, simu ona mandatu nu’udár Prezidente Autoridade, maibé José Luis Guterres la tau matan no la sériu atu jere obra boot sira husi fronteira sakato to’o ponte noefefan.

Oitavu, Prezidente Autoridade laiha kapasidade atu jere administrasaun tuir knaar idaidak nian iha RAEOA,ezemplu tuir loloos fahe fos no super mie ne’e kompeténsia no responsabilidade diresun solidariedade sosiál RAEOA nian, maibé, durante ne’e Prezidente Autoridade ho nia tékniku ho asesór sira mak distribui fali fos ba komunidade.

Nono, Durante ne’e nunka konvoka enkontru ho estrutura kargu diresaun no xefia iha RAEOA.

Désimu, hatuun billete aviaun ZEESM-TL, ho folin $25 kada ema, ba viajen Dili-Oekusi, maibé, sakrifika fali Orsamentu Jerál Estadu hodi halo fali manuntensaun ba aviaun refere. Aktu ida ne’e konsidera mall jestaun.

Désimu Primeiru, ezekuta Orsamentu duadésimu arbiru de’it, gasta osan arbiru no la tuir regra finanseiru, ne’ebé hatuur nanis ona.

Désimu segundu, kontratu no selu asesór prinsipál Ricardo Nheu, ho osan $7.000 kada fulan, no Francelino Freitas, ho osan $6.500 kada fulan, atu halo promosaun no mobiliza invetsimentu ba RAEOA, maibé, realidade seidauk iha investimentu kiik oan ida no hela de’it iha Dili hodi goza de’it povu nia osan.

Désimu Terseiru, kontrata asesór senior ba asuntu politika, Romeo Moises ho osan $5.000 kada fulan, maibé hela permanente iha Dili, no tuir loloos RAEOA la presija Asesór Politika.

Désimu kuartu, Prezidente RAEOA iha xefe gabinete rua, ida servisu iha Oecusse no ida seluk servisu iha Faról Dili ho saláriu boot maibé volume servisu kiik.

Désimu Kintu, kontrata Zezinho Gusmão hanesan adjuntu koordenadór no asesór legal ba servisu koorporativu no jestaun ba área aeroportu no navegasaun ho osan $6.500 kada fulan, maibé fulan hitu ona aviasaun ZEESM-TL nunka tun iha Oecusse.

Désimu Sestu, Husu ba Primeiru Ministru Taur Matan Ruak, atu indika no disponibiliza ekipa integradu ida, husi órgaun kompetente hodi halo auditóriu ba servisu hotu inklui ezekusaun Orsamengu Jerál Estadu iha RAEOA.

Antes ne’e, Sosiedade Sivíl Rejiaun Administrativa Espesiál Oecuse Ambenu (RAEOA), diskontente ho Prezidente Autoridade José Luis Guterres, no hato’o mós preokupasaun hanesan, ne’ebé husu ba governu sentrál atu hasai Luis Guterres husi Oecusse.  

Prezidente Autoridade RAEOA, José Luis Guterres "Lugu". Foto Media RAEOA. 

Kona-bá kestaun hirak ne’e, The Oe-Kusi Post (TOP) tenta halo ona konfirmasaun ba Lugu, no informasaun ne’ebé TOP asesu husi nia gabinete katak oras ne’e Lugu sei konsentra de’it ba serbisu, tanba antes ne’e nia fó ona esplikasaun klaru ba ezijensia hirak ne’ebé joven nain 6 ne’e kopia tutan husi ezijensia REINO nian.

Antes ne’e Lugu katak, nia tenke la’o ba-mai Dili hodi halo negosiasaun ho governu sentral atu oinsa bele transposta nesesidade báziku sira inklui kombustivel ba rai ketan ne’e, tanba medidade Estadu emerjénsia durante ne’e prejudika tebes Ambeno oan sira atu asesu ba ai-han no nesesidade seluk tan. No, kona-bá assuntu sekretariu rejional sira durante ne’e seidauk bele halo nomeasaun, tanba kestaun Orsamentu Jeral Estadu (OJE) 2020 laiha no depois mosu tan situasaun politika iha rai-laran.

Marcelino Bata
Author: Marcelino BataEmail: Este endereço de email está sendo protegido de spambots. Você precisa do JavaScript ativado para vê-lo.

PUBLISIDADE