DILI (TOP) – Xefe Gabinete Interino ba Prezidente Autoridade Rejiaun Administrativu Espesial Oe-Kusi Ambeno (RAEOA), Agustinho Caet “sarani” Asosiasaun Rede Informasaun Oe-Kusi Ambeno (REINO) ne’e, la’ós asosiasaun ida independente, maibé asosiasaun ida ne’ebé haksumik a’an hela iha “partidu boot” ida nia kalilin okos.
Maibé, Asistente Koordenador REINO, António Casenube klarifika no rejeita katak, REINO ne’e nu’udar asosiasaun ida mahon ba ONG lokal sira iha Oe-Kusi Ambeno, no nu’udar asosiasaun ida independente ne’ebé hamrik iha tinan 2008 hodi haklaken problema sosial sira iha rai-ketan ne’e.
Maske nune’e, entre Agustinho Caet ho rezidente bairo Masi, Vincencio Cono konsidera “Povu terus tinan 5, REINO nonok de’it”, REINO ne’e “lian-la’ek” tiha bainhira povu sira iha rai-k etan ne’e hetan problema boot durante mandatu eis Prezidente Autoridade RAEOA, Mari Bim Amude Alkatiri nian.
Notisia relevante: REINO ameasa revolta hasoru Lugu
Caet mós konkorda katak, tenke hela metin duni iha Oe-Kusi Ambeno, maibé situasaun politika atual mak obriga Prezidente Autoridade tenke la’o ba-mai Oe-kusi Ambeno-Dili hodi halo negosiasaun atu rezolve problema sosial sira ne’ebé durante ne’e akontese iha rai-ketan ne’e.
“Ita hotu hatene katak, ita nia orsamentu jeral Estadu la liu iha Parlamentu Nasionál iha 17 Janeiru 2020. Depois la kleur ita tama fali ba Estadu emerjénsia hamosu problema barak, entaun Prezidente Autoridade tenke la’o ba-mai halo negosiasaun ho governu sentral hodi bele rezolve problema hirak ne’e,” Caet hateten ba jornalista sira iha Hotel-Timor, Sabadu 16 Maiu 2020.
Nia rekoñese ezijensia balun husi REINO, maibé ezijensia sira ne’e laiha baze dadus.
“Ezijensia sira ne’e puramente nakonu ho deklarasaun politika”.
Nia sita esforsu ne’ebé durante ne’e Prezidente Lugu halo mak bainhira tama ba Estadu emerjénsia mosu desijaun oioin kona-bá movimentu transporte maritima rute Dili ba Oe-Kusi Ambeno. Kombustivel laiha, povu sira hasoru problema nesesidade báziku menus no problema seluk tan.
“Maibé, ho rezultadu movimentu la’o ba-mai, ikus mai konsege rezolve tiha kombustivel, no transporta nesesidade báziku sira ba Oe-Kusi Ambeno hodi fahe ba kbi’it la’ek sira,” Caet afirma.
Nia konsidera ezijensia REINO nian ne’e la pertenente, tanba maske durante ne’e OJE 2020 laiha, maibé serbisu administrasaun públika la’o normal hela hanesan fatin sira seluk iha rai-laran.
“Kona-bá promesa Prezidente Autoridade RAEOA hodi promove Ambeno oan sira, sei realiza bainhira orsamentu jeral estadu iha ona,” Caet esplika hodi hatan ba ezijensia REINO katak bainhira la realiza promesa ne’e, REINO sei organiza malu hodi halo manifestasaun hasoru Prezidente Autoridade Lugu.
