SANTA ROSA (TOP) – Primeiru-Ministru, Taur Matan Ruak fó posse ba José Luis Guterres “Lugu” hodi assume kargu Prezidente Autoridade ba Rejiaun Administrativu Espesial Oe-Kusi Ambeno (RAEOA) iha Novembru 2019, maibé dala barak hala’o serbisu ne’e iha munisipiu Dili de’it.
Asoaisaun Rede Informasaun Oe-Kusi (REINO) nu’udar sentru ba sosiedade sivil sira iha Oe-Kusi Ambeno katak Lugu durante ne’e vizita Oe-Kusi Ambeno iha semana nia rohan de’it, no maioria la hela hakmatek iha rai-ketan ne’e.
“Presidente Autoridade RAEOA, Sr. Jose Luis Guterres, desde simu pose iha fulan Novembru 2019 to’o agora, hela permanente iha Dili no fim de semana mak mai Oe-kusi hodi hare liu deit depois fila fali ba Dili,” hateten Koordenador REINO, Martinho S. C. Neno liu husi konferénsia ba imprensa iha Santa Rosa, Oe-Kusi Ambeno, Sesta 15 Maiu 2020.
Hafoin simu posse, Lugu halo ona promesa katak pozisaun sira liliu Sekretáriu Rejional sira sei fó prioridade ba Ambeno oan sira, maibé faktu balun hatudu ekipa asesor sira ne’ebé oras ne’e serbisu hamutuk ho Lugu maioria husi fatin seluk ho salariu mesak boot de’it, Ambeno oan sira sika le’et no hetan mak salariu ki’ik. Asesor balun ne’ebé antes ne’e loron-kalan mete de’it jogu bola guling, futu manu, kuru-kuru sai mós asesor di’ak ida ba Lugu ho saláriu kuaje $50000 resin kada fulan.
Asesor Lugu nian iha RAEOA maioria titipan husi partidu politiku sira hanesan husi partidu CNRT, PLP, Khunto. Kuaje maioria sira lahatene atu halo serbisu saida.
Tanba ne’e REINO husu ba Lugu kona-bá Sekretáriu Rejional sira labele akontese tan hanesan asesor sira ne’ebé la kualifikadu, maibé tama hotu hodi kasa osan de’it, lahatene halo serbisu, no lahatene atu halo serbisu saida.
“Karik laiha resposta positivu ba ami-nia ezizensia, ami sei mobiliza masa hodi halo manifestasaun hasoru Presidente Autoridade,” REINO ameasa Lugu.
“Presidente Autoridade la kumpri promesas kona ba atu promove Oe-cusse oan sira, maibe realidade lori ema servisu barak mai husi Dili”.
"T uir ami nia observasaun durante fulan 7 simu ona mandate nudar Presidente Autoridade uza eskritoriu de’it hodi asina dokumentu”.
Kona-bá kestaun lahela metin iha Oe-Kusi Ambeno, antes ne’e Lugu ho diplomasia de’it katak, hala’o serbisu iha Dili mós di’ak hela. No kona-bá salariu asesor sira ne’ebé boot no balun inkapasidade, maibé Lugu defende nafatin hodi dehan saláriu boot ne’e di’ak, tanba dignifika Timoroan sira.
Lugu mós dehan ona katak, nomeasaun ba kargu sekretáriu rejional sira iha ona faze negosiasaun.
