DILI (TOP) – Deputadu Fabião de Oliveira husi Bankada Frente Revolusionário de Timor-Leste Independente (FRETILIN) husu no ezije ba governu liu husi reuniaun Konsellu Ministru iha tempu ruma, tenke desidi ona hodi hasai Prezidente Autoridade ba Rejiaun Administrativu Espesial Oe-Kusi Ambeno (RAEOA), José Luis Guterres “Lugu”, tanba hafoin simu posse iha Novembru 201 9 , ladun hela metin iha Oe-Kusi Ambeno.
"Prezidente Autoridade atual, José Luis Guteres, simu tiha tomada de posse husi Primeiru Menistru Taur Matan Ruak ba Rejiaun administrativu Espesial Oe-Kusi Ambeno (RAEOA), la hatudu sentidu de partensia hanesan lideransa ida," deputadu Fabião levanta kestaun ne’e iha sesaun plenaria Parlamentu Nasionál iha Dili, Segunda 1 Juñu 2020.
"Tanba Ambeno oan sira kestiona fulan 7 ona laiha kontinuasaun programa ba iha RAEOA no ZEEMS nian, ne'ebé Mari Alkatiri rai hela," deputadu no atual mane foun Oe-Kusi Ambeno ne’e esplika.
Deputadu FRETILIN atual mane foun Oe-Kusi Ambeno, Fabião de Oliveira.
Mane foun Oe-Kusi Ambeno ne’e konsidera Lugu nia prezensa iha Oe-Kusi Ambeno nu’udar prezidente seremonial de’it.
"Ha'u hatete ida ne'e, tanba Prezidente Autoridade atual so ba de’it atu halo inagura ba konstrusaun sira ne'ebé mak ONG sira hala'o ona, maibé seidauk iha planu ida ne'ebé feitu atu kontinua programa RAEOA no ZEEMS nian," nia esplika.
Nia hatutan, tuir loloos Lugu tenke kontinua programa sira ne’ebé rai hela husi Alkatiri, la’ós ba atu kestiona fali obra Alkatiri nian, maibé Lugu mós durante ne’e katak sei kontinua duni obra sira ne’ebé di’ak no sei halo buat foun.
"Ha'u hanoin laiha kontribuisaun ba iha estadu ida nee iha futuru tanba Programa REAOA no ZEEMS ne'e programa integradu iha konsensu nasional la'os programa individual ho nune'e Prezidente Autoridade foun, atu ba kompleta no kontinua obra la'os atu ba kestiona fila-fali obra sira ne'ebé mak uluk Autoridade Prezidente Mari Alkatiri halo tiha ona," akresenta nia.
Fabião deklara, Ambeno oan sira ne’ebé durante ne’e hetan afetadu husi implementasaun projetu pilotu Zona Espesial ba Ekonomia Sosial Merkadu (ZEESM) iha Oe-Kusi Ambeno hetan hotu ona kompensasaun, maibé realidade seluk hatudu sei iha uma kain balun mak kuaje tinan 5 resin ona seidauk hetan kompensasaun ruma.
“Se karik Prezidente Autoridade atual inkapasidade atu lidera RAEOA di’ak liu, rekomenda ba Konsellu Ministru sira para atu foti desizaun bele nomeia fila-fali Prezidente Autoridade foun atu bele ka’er fila-fali RAEOA no ZEEMS hodi kontinua programa ne'ebé ho rasional no konsensu politika iha Parlementu ida ne'e.”
Deputadu Fabião levanta assuntu ne’e, hafoin grupu ida kompostu husi ema nain 5 ne’ebé hasoru Prezidente Parlamentu Nasionál, Aniceto Guterres iha loron Kinta 28 Maiu 2020.
Entretantu, antes ne’e Prezidente Autoridade ba Rejiaun Administrativu Espesial Oe-Kusi Ambeno (RAEOA), José Luis Guterres “Lugu” katak, nia asina kontratu ho governu ba durasaun tina lima, maibé se nia sai ohin ka aban ne’e nu’udar konsekuensia husi nomeasaun politika.
Author: Marcelino BataWebsite:https://www.oekusipost.comEmail:Este endereço de email está sendo protegido de spambots. Você precisa do JavaScript ativado para vê-lo.
Jornalista
Jornalista TOP.
Bandu atu simu envelope ka sasan ruma husi fonte informasaun sira.
