DILI (TOP) – Prosesu politika iha nivel nasionál kuaje hatudu momoos de’it, maibé iha Oe-Kusi Ambeno sei uja nafatin movimentu politika la’o tuir rai-okos (klandestina) hodi "keixa" ba malu kona-bá prezensa Prezidente Autoridade ba Rejiaun Administrativu Oe-Kusi Ambeno (RAEOA), José Luis Guterres "Lugu" iha Oe-Kusi Ambeno.
Ijemplu husi kestaun ne’e mak, hafoin destituisaun ba Prezidente Parlamentu Nasionál (PPN), Arão Noe de Jesus da Costa Amaral hodi hili fali deputadu Aniceto Guterres, grupu rua sarani sira nia a’an reprezenta povu Oe-Kusi Ambeno mai Dili hodi hato’o ida-idak nia "keixa" (aspirasaun).
Grupu dahuluk ne’ebé inklui veteranu balun no kuaje mesak katuas de’it ba hasoru Prezidente Partidu CNRT, Kay Rala Xanana Gusmão iha sede partidu CNRT iha bairro Grillos Dili.
Tuir observasaun The Oe-Kusi Post (TOP) ba grupu sira ne’ebé ba iha sede partidu CNRT iha loron Sábadu 23 Maiu 2020 iha oras tuku 7 kalan hafoin Kay Rala Xanana Gusmão halo konferénsia ba imprensa kona-bá destituisaun PPN iha tempu ne’eba.
Informasaun balun ne’ebé TOP iha katak grupu ne’e mai atu husu apoiu Kay Rala Xanana Gusmão nian kona-bá pozisaun Prezidente Autoridade Rejiaun Administrativu Espesial Oe-Kusi Ambeno (RAEOA), José Luis Guterres “Lugu” ne’ebé hahu “nakdoko” itoan ligadu ba mudansa politika atual iha rai-laran, maibé deputada CNRT, Lucia Taeki katak, grupu ne’e mai la’ós hasoru de’it Kay Rala Xanana Gusmão, maibé hasoru mós Primeiru-Ministru, Taur Matan Ruak.
“Sira mai atu hato’o de’it situasaun jeral iha Oe-Kusi Ambeno,” hateten deputada Lucia ba The Oe-Kusi Post iha Parlamentu Nasionál, Segunda 25 Maiu 2020.
“Sira agora iha ne’e hela. Tuku 2 agora sei hasoru tan Primeiru-Ministru,” nia afirma.
Entretantu, grupu daruak mak kompostu ema nain lima ba hasoru fali Prezidente Parlamentu Nasionál, Aniceto Guterres iha Parlamentu Nasionál iha loron Kinta 28 Maiu 2020.
“Representante povo Oe-Kusi Ambeno halo reunião ho Presidente Parlamento Nacional. Representante povo Oe-Kusi Ambeno, Jose Tefa ho nia equipa, halo reunião ho Presidente do Parlamento Nacional, Aniceto Longuinhos Guterres Lopes, acompanha hussi Vice Secretária da Mesa, Regina Freitas, iha loron 28 fulan maio tinan 2020, iha Gabinete Presidente Parlamento Nacional,” esplika media Parlamentu Nasionál liu husi pájina ofisial Parlamentu Nasionál, Kinta 28 Maiu 2020.
“Durante reunião, representante povo Oe-Kusi Ambeno apresenta preocupação sira ne’ebé povo Oecússi enfrenta durante ne’e, inclui presença Presidente da Autoridade RAEOA, ne’ebé tuir sira ladún fó atenção. Tanba ne’e povo Oecússi, hussu ba Presidente do Parlamento Nacional atu canaliza preocupação sira ne’e ba Governo hodi responde."
"Presidente do Parlamento Nacional simu preocupação hirak ne’e no sei orienta comissão competente atu observa no fiscaliza situação refere.”
Grupu sira ne’ebé ba hasoru PPN, Aniceto Guterres sira nia preokupasaun ne’e kuaje hanesan ho preokupasaun REINO nian ne’ebé deklara ba públiku iha loron Sesta 15 Maiu 2020 hhodi ameasa revolta hasoru Lugu bainhira nia la hela metin iha Oe-Kusi Ambeno, no la realiza nia promesa sira atu involve Ambeno oan sira iha Sekretáriu Rejional sira.
Notisia relevante: REINO ameasa revolta hasoru Lugu
Grupu ne’e mós tuir informasaun balun ne’ebé iha katak, sira halo ona apontamentu hodi ba hasoru tan Prezidente Repúblika, Francisco Guterres “Lú Olo” iha tempu ruma.
Prezidente Autoridade RAEOA, José Luis Guterres katak, durante ne’e nia rona polemika sira kona-ba nia kargu iha Oe-Kusi Ambeno, maibé seidauk simu informasaun formal rona husi Primeiru-Ministru, Taur Matan Ruak kona-bá nia kargu iha Oe-Kusi Ambeno. Maibé, politikamente mak akontese mudansa ba nia kargu, Lugu deklara katak sei sai ho laran triste no fuan moras.
Notisia relevante: Lugu sei sai ho fuan moras.
