Oekusipost.com Palaban – Autoridade Rejiaun Administrativu Espesial Oe-Kusi Ambeno (RAEO) planeia ona atu suspende provizoriu ba atividade rai-impre tsa osan husi kreditor sira ba fornesedor kréditu iha rai-ketan ne’e durante periodu Estadu emerjénsia.
Xefe Gabinete Prezidente Autoridade RAEOA, Agustinho Caet hatete, durante periodu Estadu emerjénsia husi fulan Marsu to’o Abril foin lalais, rezulta no prejudika sidadaun sira ne’ebé halo imprestimu osan iha fornesedor kreditu sira hasoru difikuldade hodi fó fali osan hun ho nia funan, tanba durante fulan tomak atividade ekonomia lokal la la’o, no kliente hirak ne’e mós lahetan rendimentu di’ak.
Ho kestaun ne’e, Caet planeia ona sei bolu fornesedor kreditu sira iha Ambeno hanesan Kaibauk, Credit Union, Mnatu Bitimo no seluk tan atu suspende provizóriu sira nia atividade rai no impresta osan iha Oe-Kusi Ambeno.
“Tamba durante tempu Estadu Emerjensia ne’e Guvernu bandu komunidade ka kliente barak atu labele halo movimentasaun ba-mai hodi buka osan, tanba ne’e bainhira fornesedor investimentu sira lakompriende ho situasaun ne’e bele fó impaktu negativu ba kliente sira nia fuan kreditu bele sa’e ba bebeik,” hateten Caet ba Oe-Kusi Post iha salaun Alfandega Palaban, Oe-Kusi Ambeno, Sesta 1 Maiu 2020.
“Iha tempu badak ami sei bolu ita nia fornesedor sira, ita enkontru depois ita hasai desizaun ida, maibé ha’u hanoin desizaun ne’ebé justu mak ne’e parte autoridade husu para sira suspende aktividade pagamentu ba kliente kada fulan durante periodu Estadu emerjénsia. Ita sei bolu para suspende,” Caet afirma.
Eis Xefe Gabinete MNEK ne’e, konsiente katak durante periodu Estadu emerjénsia fulan kotuk povu ki’ik sira la halo movimentu ba-mai hodi buka osan atu nune’e bele fo hikas (reimbolsa) osan ne’ebé sira impresta husi fornesedor kreditu sira iha Ambeno.
“Ha’u mós simu informasaun husi sira seluk. Ha’u hatene ezijensia husi kliente sira ne’e validu, tanba ligadu ho Estadu emerjénsia, ita hatene katak kuandu Estadu emerjénsia ema ne’ebé sira investor sira maioria negosiante sira ne’ebé sira persiza atu bo’ok a’an hodi bele buka osan atu ba selu iha banku sira. Agora se ida ne’e mak ita la foti asaun, entaun ne’e prezudika sira nia movimentu,” Caet esplika.
