MAUNABEN (TOP) – Anin boot ne’ebé akontese iha loron Segunda 09 Janeiru 2023 konsege sobu rahun tiha eskola bázika filial Bi-Lete iha aldeia Maunaben, suku Cunha, sub-rejiaun Pante Makassar.
Xefi suku Cunha, Domingos Seco Caunan hateten, anin ho velosidade maka’as ne’e akontese maka’as iha aldeia Maunaben hodi konsege sobu rahun tiha eskola bazika ne’ebé ninia kondisaun mós grave kleur tiha ona, maibé ladun hetan atensaun husi edukasaun rejional Oe-Kusi Ambeno.
“Eskola ida ne’e ami harii iha tinan 2017 ami taka uza tali-tahan de’it, depois iha tinan 2018 autoridade RAEOA, liu husi Sekretariu edukasaun no solidariedade sosial konsege mai sukat atu hadia, maibé lakonsege hadia, to’o ohin loron, entaun horikalan anin huu kois de’it nia tenki monu, tanba nia kondisaun grave,” Xefe suku Domingos Seco Caunan hateten via kontaktu telemovel ba TOP, Segunda kalan.
Domingos Caunan hatutan, maske kondisaun eskola ne’e ladun di’ak no ladun hetan atensaun husi autoridade RAEOA nian, maibé tuir nia katak, durante ne’e pelu-menus fasilita netik eskola-oan sira iha área aldeia Maunaben hodi hetan asesu ba edukasaun. Tanba ne’e, politikamente maske membru autoridade RAEOA sira nia mandatu sura de’it fulan atu remata ona, maibé nia kontinua husu ba sira hodi tauk matan netik ba eskola ne’e atu bele tulun alin estudante oan sira hodi kontinua eskola.
“Ha’u husu de’it ba sekretariu rejiaun edukasaun no autoridade RAEOA, tenki hadia lalais, nune’e iha tempu badak estudante sira uza no hala’o prosesu aprendizajen, tanba ita hatene dadaun situsaun udan,” nia husu.
Eskola bázika Bilete ne’e iha estudante hamutuk nain 125 ho manorin nain sira nain 4.
The Oe-Kusi Post (TOP) halo ona esforsu hodi konfirmasaun assuntu ne’e ba diretor edukasaun RAEOA, Daniel Maunu, maibé lakohi fó komentariu ho rajaun la klaru.
Hafoin Arsenio Paixão Bano troka José Luis Guterres ‘Lugu’ hodi ba assume kna’ar nu’udar Prezidente Autoridade ba RAEOA iha tinan 2010 nia iha ambisaun maka’as hodi asesu edukasaun ba iha rai-ketan Ambeno.
Evidensia ida mak, iha loron 28 Jullu 2021, Prezidente Autoridade RAEOA, Arsenio Paixão Bano desidi hodi aloka osan hamutuk millaun ida resin (U$ 1.048.66.41) hodi halo konstrusaun ba eskola foun hamutuk 11, edifisiu eskola rua (2) no reabilitasaun ida (1), maibé eskola bázika filial Bi-Lete ne’ebé komunidade sira ho inisiativa rasik mak halo hodi taka ho tali-tahan de’it desde tinan 2017 nunka hetan atensaun to’o anin mak hu’u monu de’it iha loron Segunda 09 Janeiru 2023.
