AMBENO (TOP) - Partidu Congreso Nacionál de Reconstrução de Timorense (CNRT) kontinua konsolida ninia forsa iha Rejiaun Administrativa Espesiál Oe-Cusse Ambeno (RAEOA) hodi prepara forsa atu hasoru eleisaun parlamentar iha tinan ida ne’e.
Prezidente Partidu CNRT, Kay Rala Xanana Gusmão alerta ba estrutura masimu atu servisu makas hodi bele fó vitória ba CNRT bele manan absoluta iha rai-ketan Oe-Cusse Ambeno.
Xanana konsiente, maske CNRT tinan lima la envolve iha governu, maibé CNRT sempre hamutuk ho povu bainhira hasoru situasaun krusiál hanesan dezastre naturál, pendemia mundiál COVID-19 hodi sosializa informasaun ba povu tomak iha munisipiu no suku sira iha teritoriu nasionál no buka solusaun bainhira povu efrenta problema hamlaha iha susar nia laran.
Nia dehan, CNRT hamariik nu’udar partidu boot ida hamutuk ho povu atu manan tan iha eleisaun parlamentar, nune’e bele hadia naksalak no lakunas hirak ne’ebé akontese durante ne’e iha rai-laran.
“Ha’u mai atu fó forsa no enkonkoraja imi, tanba bainhira ita manan absoluta, ita sei hadia fallansu sira hotu iha Oe-Kusi to’o rai boot hodi hadia ita nia-rain no hadomi povu ida ne’e,” Xanana hateten durante eventu konsolidasaun no enkontru alargada ho estrutura partidu nian iha Oe-Kusi hodi halo preparasaun hasoru eleisaun parlamentar ne’ebé hala’o iha sede CNRT, Numbei, Oe-Kusi villa vila, Kinta 12 Janeiru 2023.
Xanana informa durante tinan lima ukun, governu atuál lideradu Taur Matan Ruak nunka halo buat foun ruma iha nasaun ne’e.
Konsolidasaun partidu CNRT ne’e partisipa direita husi deputadu Bankada CNRT na’in-21 no koordenador partidu nian husi munisipiu 13 hodi hamutuk ho estrutura CNRT iha Oe-Kusi Ambeno konsolida forsa CNRT iha postu ha’at hanesan Oe-Silo, Pasabe, Nitibe no Pantai Makassar.
Deputadu CNRT nian hotu- hotu ba Oe-Kusi Ambeno hodi hakbesik aan ba povu ko’alia programa partidu nian ba povu bele intende hodi fó fiar ba partidu iha eleisaun parlamentar iha tinan ida ne’e.
“Ami mai hotu iha ne’e, atu fó apoiu politiku moral, hodi fó apoiu ba imi iha eleisaun parlamentar ne’e ita tenki sapu rata tiha iha Oe-Kusi, mezmu iha Dili ne’eba ita nia forsa no fatin seluk tan,” nia informa.
Haree ba povu nia moris no dezenvolvimentu rai ida ne’e, ha’u kala tenki sai primeiru ministru. Se nune’e iha rai ida ne’e ita tenki sapu rata, tanba ita lakohi haree povu ida ne’e terus bebeik,” Xanana alerta.
