DILI (TOP) – Ministru Finansas (MF) Fernando Hanjam iha plenária Parlamentu Nasionál (PN) katak, governu husu tan autorizasaun ba PN hodi halo transferénsia extraordináriu husi fundu petrolíferu ho montante tokon $286,8, tanba tokon $250 ne'ebé antes ne'e autoriza uluk ona, la sufisiénte atu finansia governu hodi rekoopera ekonomia ne'ebé kauza husi surtu virus corona (covid-19) iha rai-laran.
"Iha transferénsia extraordináriu husi fundu petrolíferu dahuluk ho montante tokon $250 liuhusi lei nú. 2/2020 iha 6 Abril, reseita sira ne'e só permite de'it finansiamentu regular administrasaun públiku nian to'o fulan agostu, tinan finanseiru 2020, signifika ida ne'e la sufisiente hodi to'o iha Orsamentu Jeral Estadu (OJE) 2020 tama iha vigor, tanba ne'e iha nesesidade governu hakat fali mai iha PN, hodi husu tan autorizasaun transferénsia extraordináriu husi fundu petrolíferu ba daruak nian ho montante tokon $286,8," dehan Ministru Finansas (MF) Fernando Hanjam iha plenária Parlamentu Nasionál, Segunda 22 Juñu 2020.
Governante ne'e afirma, levantamentu refere atu garante saldo tezouru hodi labele menus husi tokon $200.
"Levantamentu ida ne'e atu garante kontinuidade funsionamentu instituisaun estadu nian, asegura pagamentu obrigasaun, legál no kontratual ne'ebé mak estadu asume ona no garante saldo tezouru hodi labele menus husi tokon $200," nia dehan.
Nia afirma, montante ba transferénsia extraordináriu husi fundu petrolíferu daruak nian mak tokon $286,8.
"Montante ne'e governu propoin mak tokon $286,8. Tokon $86,6 soma hamutuk ho Tokon $250, autoriza tuir lei númeru 2/2020 ekivale ba montante tokon $536,8 husi rendimentu sustentavel estimadu. Nune'e, husi montante transferénsia refere sei transfere hotu ba saldo tezouru nian no iha flexibilidade ba governu iha nia ezekusaun tantu Dotasaun Orsamentu Temporáriu (DOT) no mós Fundu Covid-19," nia esplika.
Nia dehan, iha forma hanesan, governu mós aprezenta mai PN atu altera lei nú. 2/2020, ne'ebé kria fundu Covid-19, hodi inklui iha artigu 5 kona-ba finalidade ba fundu Covid-19 nian, médida ekonómiku no protesaun sosiál hodi resposta ba konsekuénsia ekonómiku ba médida prevensaun no kombate Covid-19 no krize ekonomia mundiál ne'ebé provoka husi pandemia.
Alende ne'e, integra mós iha finalidade fundu Covid-19 nian, médida espesífiku ba apoiu rezilensia nian, sósiu ekonómiku komunidade rural sira ne'ebé hetan menus husi atividade ekonómiku ne'ebé implika husi médida kontensaun pandemia ninian. Inklui mós finalidade fundu nian iha despeza funsionamentu respetivu fundu nian no Sentru Integradu Jestaun Krize (SIJK) ne'ebé asume funsaun koordenasaun estratéjia nasionál no kombate Covid-19.
