DILI (TOP) - Governu liu husi Vise-Primeiru-Ministru (VPM) no Ministru Koordenadór ba Assuntu Ekonómiku (MKAE), Ministru Turizmu no Ambiente (MTA), Francisco Kalbuadi Lay hala’o diskusaun ho Korporasaun Finansa Internasionál kona-ba oinsa atu hadia no hametin liu-tan dezenvolvimentu setór ekonómia liliu setór privadu sira iha Timor-Leste.
“Ohin ha’u ho ekipa tomak husi MAKE hanesan Vise-Primeiru-Ministru mai hasoru malu ho maun David Freedman hanesan Country Representative, ho mana Keiko, ne’ebé ami diskuti kona-ba kooperasaun iha futuru,” esplika Vise-PM hafoin remata diskusaun ho membru grupu Banku Mundial ne’e iha Lecidere-Dili, Tersa, 17 Marsu 2026.
“Ita hatene katak, buat lubuk ida mak serbisu hamutuk tiha ona entre IFC ho governu. Liu husi diskusaun ohin ne’e ba futuru sei serbisu hamutuk liliu iha parte finanseiru nian, no mós atu fortifika liu tan setór privadu sira,” afirma Vise-PM.
Korporasaun Finansa Internasionál (IFC) hanesan membru ida hosi Grupu Banku Mundiál no instituisaun dezenvolvimentu globál boot liu ne'ebé foka ba setór privadu iha merkadu emerjente sira.
Diskusaun ne’e partisipa mós husi Reprezentante Rezidente Grupu Banku Mundiál ba Timor-Leste, David Freedman.
Iha fatin hanesan, Diretóra Divizaun IFC nian ba Sudeste Aziátiku no Illa Pasífiku sira, Keiko Miwa hateten, foin ba dala uluk hala’o diskusaun kona-ba assuntu ne’e ho Vise-Primeiru-Ministru no sente onradu tebes.
“Ne’e ba dahuluk halo diskusaun ho Vise-PM. Ha’u rasik sente onradu tebes. Ohin ami tur hamutuk ho Vise-PM diskuti kona-ba troka ideia no perspetiva kona-ba dezenvolvimentu iha Timor, liliu dezenvolvimentu iha setór privadu, setór turizmu, mikro, médiu pequena empresa, agrikultura, setór finanseiru no setór sira seluk tan,” esplika Keiko.
Keiko hatutan, liuhusi diskusaun ne’e konkorda katak, sei hametin parseria hamutuk ho Governu Timor-Leste, no ba oin buka oinsa bele koopera hodi dezenvolve setór privadu no mós ekonomia tomak.
Keiko Miwa hanesan Diretóra Divizaun ba Indonézia, Kamboja, Repúblika Demokrátika Populár Lao nian, Myanmar, Illa Pasífiku, Papua Nova Guiné no Timor-Leste iha Korporasaun Finansas Internasionál (IFC), membru ida hosi Grupu Banku Mundiál. Bazeia iha Jakarta, nia asume knaar ida-ne'e iha loron 1 fulan-Janeiru tinan 2026.
Keiko Miwa, nasionál Japaun nian, lori esperiénsia lideransa nian durante dékada rua iha Grupu Banku Mundiál. Desde tama iha instituisaun iha 2001, nia fornese ona lideransa estratéjiku no supervizaun iha rejiaun oioin, serbisu nu'udar Jerente Nasaun Banku Mundiál nian iha Lao PDR, Jerente Prátika ba Edukasaun iha Ázia Súl, no Diretora Prátika Globál Edukasaun nian. Nu'udar Diretora Rejionál ba Dezenvolvimentu Umanu iha Médiu Oriente no Áfrika Norte, nia lidera resposta COVID-19 iha Rejiaun.
Foin lalais ne'e, nia serbisu nu'udar Diretora Divizaun ba rejiaun Áfrika Oeste—ne'ebé kobre Cabo Verde, Gámbia, Guiné Bissau, Mauritánia, no Senegal, iha ne'ebé nia lidera preparasaun no implementasaun ba enkuadramentu parseria nasaun sira Grupu Banku Mundiál nian no hametin parseria sira ho governu sira no setór privadu hodi avansa dezenvolvimentu sustentável no investimentu privadu. Nia tau matan ba karteira investimentu biliaun $6 iha nasaun lima.
Keiko Miwa nu’udar PhD iha Polítika Edukasionál no Estudu Administrativu sira hosi Universidade Estadu Nova Iorke nian iha Albany.
Iha parte seluk, TradeInvest Timor-Leste (TITL), iha loron Kinta, 12 Marsu 2026 mós simu delegasaun ofisiál Hong Kong hosi Jakarta, Indonezia hodi diskute kona-bá fortalesementu relasaun ekonómika no promove oportunidade investimentu entre nasaun rua. Enkontru ida ne’e importante atu rona ideia no diskute potensia koopersaun no oportunidade atu atrai investimentu estranjeiru mai Timor-Leste.
Delegasaun Hong Kong liderada hosi Diretora Jerál Hongkong Economic and Trade Office, Libera CHENG, akompaña hosi Deputy Director ba área Commercial Relations iha Hong Kong Economic and Trade Office, Stanley Wan, no reprezentante husi Invest Hongkong. Enkuantu ekipa husi TradeInvest, Lideradu hosi Diretór Relasaun Esterna no Marketing, Roberto Lai ne’ebé akompaña hosi Diretór Diresaun Promosaun Investimentu, Sr. Ezaquiel Babo hamutuk ho jestor sira.
Durante Sorumutu ne’e, parte rua diskute kona-bá asuntu importante sira hanesan, promosaun investimentu, fasilitasaun negósiu, no oportunidade kooperasaun iha setór estratéjiku sira ne’ebé bele kontribui ba dezenvolvimentu ekonómia Timor-Leste. Reuniaun ne’e mós sai hanesan oportunidade atu hametin relasaun institusionál entre parte promosaun investimentu hosi Hong Kong no Timor-Leste.
Liu husi sorumutu ne’e mós, parte rua iha esperansa katak bele loke dalan ba kolaborasaun forte, hodi fó benefísiu ba komunidade negósiu no kontribui ba kresimentu sustentável iha rai rua.
