DILI (TOP) - Prezidente no Laureadu Nobel ba Pás, José Ramos-Horta, simu tan onra akadémika prestijiozu liu Doutor Honoris Kausa husi Universidade Charles Darwin, Austrália.
Onra ida-ne'e konfere ba Prezidente Ramos-Horta husi Honorável Trevor Riley AO KC Chanceler, durante serimónia graduasaun ne'ebé hala'o ba graduadu liu 2220 iha loron 14 fulan-Maiu tinan 2026 iha kampus Casuarina universidade nian iha Darwin.
Doutor Honoris Causa mak onra akadémika aas liu ne’ebé universidade sira fó iha mundu tomak, rekoñese pesoál sira ho méritu esepsionál no realizasaun durante moris tomak iha área sira hanesan pás, kultura, siénsia, no polítika.
Onra ne’e reprezenta rekoñesimentu internasionál profunda ba Prezidente nia kontribuisaun estraordináriu no sustentavel ba estabilidade rejionál no globál.
“Iha nia lideransa Prezidente Ramos-Horta kontinua defende papél universidade sira, akadémiku sira, no líder sira iha futuru hodi hametin instituisaun demokrátika, promosaun kooperasaun rejionál, no rezolve dezafiu globál sira ne’ebé kompleksu. CDU sente orgullu atu rekoñese ema ida-ne'ebé hatudu ona kompromisu durante moris tomak ba pás, demokrasia, no independénsia Timor-Leste. Ho CDU nia ligasaun ne'ebé kle'an no dura ho Timor-Leste, no ami-nia kompromisu atu haburas oportunidade iha Austrália Norte tomak, ida-ne’e rekoñesimentu ida ne’ebé apropriadu ba líder ida ne’ebé respeitadu internasionalmente,” afirma Profesora Fiona Coulson, Vise-Reitóra no Prezidente Interina.
Refleta kona-ba signifikadu husi onra ida-ne’e, Prezidente Ramos-Horta hateten:
“Ha’u iha onra atu rekoñese desizaun husi Universidade Charles Darwin hodi konfere mai ha’u Doutor Honoris Causa. Ha’u simu distinsaun ida-ne’e ho haraik-an no agradesimentu sinseru. Rekoñesimentu ida-ne’e hanesan omenajen ida la’ós de’it ba ha’u-nia viajen pesoál, maibé mós ba reziliénsia no aspirasaun povu Timor-Leste nian iha sira-nia persekusaun duradoura ba pás, paz, rekonsiliasaun, no dezenvolvimentu.”
Prezidente Ramos-Horta nia prezensa iha signifikadu partikulár ba graduadu, funsionáriu no parseiru sira husi Universidade Charles Darwin iha Northern Territory no área sira seluk.
