DILI (TOP) – Jornalista Estajiáriu na’in 10 tuir ezame kompeténsia hodi bele hetan Karteira Profesional husi Conselho de Imprensa de Timor-Leste (CITL), iha salaun enkontru CITL, Quintal Boot, Dili.
Tuir informasaun ne’ebé The Oe-Kusi Post (TOP) asesu iha Pájina Ofisial Conselho de Imprensa Timor-Leste katak, jornalista estajiáriu na’in 10 iha loron Tersa, 02 Dezembru 2025, tuir ona ezame kompeténsia hodi bele hetan Karteira Profesional husi Conselho de Imprensa de Timor-Leste (CITL).
Jornalista hirak ne’e mós finaliza ona sira nia etapa estájiu profesionál iha órgaun no meiu komunikasaun sosiál sira no tuir mós kolókiu públiku durante loron 10 iha Conselho de Imprensa.
Ezame kompeténsia ne’e fahe b aparte rua mak hanesan ezame hakerek no orál ka entrevista. Jornalista na’in 10 mai husi mídia estatal ajénsia notisioza TATOLI.IP no RTTL, EP, mídia privadu sira (G-RTV, Media Mudansa, The Dili Weekly, Radiu Liberdade, GMN-TV) inklui jornalista husi Aaénsia notisioza LUSA.
Jornalista estajiáriu na’in 10 mak hanesan Joanita da Silva Corte-Real (RTTL, EP), Domingos M. Moreira Soares (G-RTV), Camilio de Sousa (TATOLI.IP), Maria Auxiliadora F. Ximenes (TATOLI.IP), Maria Angelita Sandi Belo (Media Mudansa), Celestina Soares de Oliveira (The Dili Weekly), Felisidade da Costa Ximenes (TATOLI, I.P), Octavia Maria de Rosa (Radiu Liberdade), Jacinta Lemos (GMN-TV), Domingos da Piedade Freitas (LUSA).
Haktuir iha lei komunikasaun sosiál artigu 13 kona-ba hala’o profisaun iha Alinea 1 haktuir kondisaun atu hala’o profisaun jornalista nian maka abilitasaun ho nia títlu rasik hanaran karteira professional, ne’ebé Conselho de Imprensa mak fó no renova.
Iha artigu 14 kona-ba asesu ba profisaun haktuir Asesu ba profisaun jornalista nian hahú hosi estájiu obrigatóriu ida, no remata ho aproveitamentu, ho durasaun fulan sanulu resin ualu, fulan sanulu resin rua no fulan neen, ba ema ne’ebé iha ensinu sekundáriu, iha lisensiatura iha área ne’ebé de’it no iha lisensiatura iha área komunikasaun sosiál nian.
