DILI (TOP) – Ministru Agrikultura no Peska (MAP) Pedro dos Reis husu tulun ba Parlamentu Nasionál, sosiadade sivil no media atu ajuda ba Orsamentu Jeral Estadu (OJE) tinan 2021.
"Tanba orsamentu billiaun 1.6 ne'e fahe ba 32, ami hetan kuaje 1.2% ba Ministériu Agrikultura no Peska ne'ebé mak iha pasta Ministru, vise Ministru no sekretáriu estadu,” hateten Ministru Agrikultura no Peska (MAP), Pedro dos Reis ba jornalista sira iha Palásiu Governu, Dili, Kuarta 09 Setembru 2020.
Ministru ne'e hatutan, durante serbisu ho osan DOT mós koko hadulas terenu foti levantamentu dadus, agora prosesu dezeñu liu husi tetu orsamentu 2021.
"Ami bele la'o hadulas tiha Timor-laran tomak, foti dadus obriga tékniku sira halo dezeñu no ba buat ki'ik oan sira ne'e ita hadia hotu, maibé se osan laiha ami labele halo buat ida. Ne'e mak obrigasaun ami nian," nia hateten.
Nia hatutan, total irigasaun 40 iha rai-lara atu hadia mós depende ba OJE. No, seidauk bele bo’ok irigasaun boot sira iha rai-laran, maibé promete sei halo dam hodi garante kontinuasaun halai natar ba natar nain-sira.
