DILI (TOP) – Mosu reasaun reziste entre komunidade balun iha Kaikoli hodi tuda hasoru kareta ambulansia ne’ebé esforsu atu ba tula pasiente Covid-19 iha fatin ne’e.
Tuir informasaun balun ne’ebé The Oe-Kusi Post (TOP) asesu husi Sala Situasaun katak, Tersa 9 Marsu 2021 oras tuku 10 kalan Sentru Jestaun Krize orienta ekipa ambulansia hodi ba tula pasiente positivu Covid-19 ida iha área Kaikoli, no bainhira kareta ambulansia tama to’o besik sede suku Kaikoli nia oin, komunidade balun iha área halo reasaun kontra hasoru kareta ambulansia ne’e liu husi tuda.
Nune’e, kareta ambulansia mós halai fila hodi ba tama fali iha Sala Situasaun nia laran, no pessoal militar balun iha Sala Situasaun ne’e mós halo kontaktu kedas ba membru PNTL sira hodi apoiu seguransa ba ekipa ambulansia bele evakua pasiente positivu Covid-19 ba sala izolamentu hodi hetan tratamentu intensivu liutan.
Ho situasaun mosu rezistensia husi komunidade sira fó posibilidade ba governu sei uja dalan obrigatóriu hodi evakua pasiente Covid-19 ne’e husi Kaikoli.
Iha parte seluk, ekipa ambulansia konsege no susesu evakua pasiente Covid-19 iha área Taibesi, no komunidade inklui pasiente Covid-19 iha área Taibesi ne’e koopera tebes hodi la halo rezistensia hanesan akontese iha área Kaikoli.
Entretantu iha loron 9 Marsu 2021 oras tuku 11:30 dadersan, Vise-Kordenadóra Forsa-Tarefa ba Prevensaun no Mitigasaun Surtu Covid-19 iha Timor-Leste, CIGC-SS, Odete da Silva Viegas hodi Sala Situação-Sentru Integradu Jestaun Krizi nia naran, katak hafoin deteta kazu foun rua iha bairru BTN II, Tasi Tolu, Suku Madohi, Postu Administrativu Dom Aleixo, to’o horseik ekipa konjunta saúde buka-tuir nafatin kontaktu-besik sira husi kazu rua ne’e.
Odete hatutan, husi ezersisiu ida ne’e, deteta tan kazu 9 husi kontaktu-besik ho kazu husi sidadaun ida-ne’ebé nu’udar funsionáriu administrasaun públika iha SEFOPE. No kazu pozitivu ida ne’ebé husi Bebonuk ne’ebé relata iha loron 8 Marsu liuba, , husi kazu ida ne’e mós ekipa konjunta saúde halo kedas rastreiu iha loron ne’e kedas, husi rezultadu rastreiu ne’e iha deteta tán kazu 1 iha Bebonuk.
Nia esplika, iha sorin seluk ekipa konjunta saúde halo mós rastreiu iha fatin risku iha Óspital Nasional Guido Valadares deteta kazu 3. Kazu 3 iha Óspital Nasionál ne’e professional saúde na'in ida ho nia-oan na’in rua ligadu ho kazu ida-ne'ebé deta iha BTN II, Dom Aleixo, Dili.
Kona-ba rezultadu screening swab mass ka rastreiu seletivu massa iha Dili katak konsege foti ona amostra hamutuk 471 iha loron 8 Marsu. Husi númeru ne’e mai husi nain 28 husi SEPFOPE, nain 137 husi Ministériu Transporte no Komunikasaun, nain 46 husi TIC, nain 51 husi Bebonuk, nain 82 husi Ministériu Finansas, nain 3 husi HNGV, no nain 124 husi Gabinete Primeiru-Ministru.
Dadus jeral iha loron Tersa 9 Marsu 2021 oras tuku 11:30 hatudu, kazu foun hamutuk 13, kazu rekoperadu mamuk, no kazu ativu hamutuk 48.
Ho situasaun ne’e, Odete afirma, Timor-Leste seidauk iha ema ne’ebé mak mate no ema ne’ebé ho moras grave.
“Ida ne’e hatudu susesu ida ne’ebé mak di’ak tebes ba Timor-Leste nomos ba povu tomak. Atu bele hetan susesu ne’ebé mak di’ak ita presiza kontribuisaun koletivu ida atu nune’e ita bele hapara transmisaun lokál iha ita-nia rai-laran”.
Nia husu mós ba estidades hotu-hotu populasaun ka komunidade atu bele kumpri medida prenvensaun Covid-19. Husu ba populasaun iha Dili laran tomak atu nafatin kalma, lalika pániku, hela deit iha uma bainhira laiha nesesidade atu halo movimentu bá-mai, pratíka nafatin medida sira hanesan;
- Uza máskara
- Fase liman bebeik ho sabaun ka dezinfetante ruma
- Bainhira kumprimenta malu, lapresiza kaer-liman, bensa-liman, rei-malu ka haku’ak malu
- Evita halibur malu barak, no
- Hamri’ik ka tur dook husi ema seluk, mínimu metru ida ho balu.
