DILI (TOP) — Observadór ba assuntu economia husi Universidade Dili (UNDIL), Alfredo dos Santos katak, Timor-Leste sei sai nasaun falladu bainhira governu kontinua extende hela de’it serka sanitária, maibé la prepara kondisaun atu hadia povu nia moris lorloron.
Nia hatutan, durante ne’e governu badinas tebes hodi halo Estadu emerjensia, no serka sanitária, maibé governu haluhan tiha hodi dezenvolve setor ekonomia ih arai-laran, tanba kuaje movimentu ekonomia iha rai laran paradu totál, kauza hosi polítika VIII governu konstitusionál ne’ebé lidera hosi Jenerál Taur Matan Ruak hamoris estadu emerjénsia no aplikasaun serka sanitária no mós konfinamentu obrigatóriu hodi bandu ema labele hala’o movimentu ho razaun atu salva ema hosi Covid-19.
“Apliasaun estadu emerjénsia, serka sanitária depois hamosu tan konfinamentu obrigatóriu, ne’e faze ida ne’ebé fó impaktu negativu tebes kresimentu movimentu ekonomia iha Timor Leste. Kondisaun hanesan ne’e maka husik hela, ita hein de’it ona tempu para povu iha rai ida ne’e monu ba situasaun ida frazil,” Alfredo hateten ba ba The Oe-Kusi Post (TOP) iha kampus UNDIL, Kuarta 26 Maiu 2021.
Nia hatutan, covid-19 ne’e iha duni maibé, tuir loloos governu la presiza halo Estadu emerjénsia hodi limita ema hotu ninia movimentu.
“Iha meius lubuk ida maka bele halo hodi prevene propagasaun pandemia ne’e maka tuir ka kumpri nafatin protokolu saúde mundíal nia orientasaun hanesan uja máskara, fase liman ho sabaun no distánsiamentu fizíku. Atu nune’e atividade ekonomia mikro mai kra’ik kontinua la’o nafatin hanesan baibain,” nia afirma.
Tanba ne’e, nia husu governu atu deside ho ulun malirin, maske Coivd-19 ne’e iha maibé, movimentu ekonomia husik ba kontinua moris hodi fó benefísiu ba povu no ba nasaun doben ida ne’e.
“La’ós la tauk Covid maibé, husik Covid iha ba, maibé fó oportunidade hodi loke espasu ba atividade ekonomia tenki la’o para hare hosi aspeitu ekonomia labele mate iha tempu susar hanesan agora daudaun ne’e,” nia esplika.
Ikus nia reforsa tan, maibé kuandu governu nafatin mantein ho polítika ida ne’e maka sei fó impaktu total ba setór ekonomia no sei lori nasaun ne’e ba kategoria nasaun failladu.
“Nasaun ne’e sei monu ba situasaun ida frazíl, programa kurtu prazu ne’ebé governu implementa daudaun hanesan sesta bazíka, hanesan subsídiu família ne’e sei la ajuda povu (rekupera ekonomia tanba mezmu durante ne’e programa sira ne’e hala’o maibé povu kontinua halerik ba ai han). Dalan uníku maka loke oportunidade para povu bele hala’o nia atividade ekonomia,” nia hakotu.
