DILI (TOP) — Durante ne’e sempre rona de’it deklarasaun husi bankada opozisaun CNRT iha Parlamentu Nasionál katak, governu atual ne’ebé tonka husi partidu FRETILIN no lidera husi Primeiru-Ministru, Taur Matan Ruak ne’e violasaun Konstituisaun Repúblika Demokrátika Timor-Leste (RDTL), maibé akademista sira hamutuk 125 mós hahu ona dehan governu ne’e viola duni konstituisaun.
Movimentu akademiku mai husi univerisdade sira ne’ebé maka estabele iha Timor-Leste hanesan UNDIL,UNTL,UNITAL, KAFE, UNPAZ, IOB no DIT ne’e hamahon aan iha Prezidente Movimentu akademiku Pro-Konstitusional RDTL lidera husi Hugo Lourenço da Costa.
Hugo Lourenço katak, akademista sira nain 125 ne’e nu'udar kanal akademiku sira bele diskuti para fó solusaun ba governu atu bele fanun sira iha situasaun defisil ida ne’e.
"Ho situasaun sira ne'e komesa ladun kondis ona ho situasaun ne'ebé mak povu infrenta, ho ida ne'e maka hahu hafanu ami atu estabelese MAPK ida ne'e, nakloke ba ema hotu, ba sé mak hakarak tama bele tama ne'e la’os obrigatoriu,” katak Hugo Lourenço da Costa ba The Oe-Kusi Post (TOP) iha salaun Esperansa, Ai-Mutin, Dili, Tersa 25 Maiu 2021.
Nia esplika MAPK ne’e sai hanesan kanal ida para akademista sira bele ko’alia ba malu no fó aspirasaun se la’e la’o mes-mesak se maka atu rona.
“Ita konsolida forsa sira para ita ko’alia ema bele rona ida ne'e maka objetivu ami nian" hateten Hugo.
Nia dehan, MAPK nia tarzetu maka primeiru hare konjuntura politika nia lala’ok, konjuntura politika iha Timor-Leste.
“Kuandu ita hahu husi golpe poder, ne'e ami konsidera ne'e ita viola tiha ona konstituisaun, faktu sira hatudu katak Prezidente Parlamentu to'o agora la posse ne'e ita konsidera oinsa? Tuir legal konstituisional ne’e oinsa? Nia iha legalidade ka la’e?,” Hugo esplika.
Lourenço konsidera konstituisaun ne'e, sai hanesan Biblia ba politika, entaun labele viola.
"Tamba ida ne'e maka ita haree katak ho situasaun empase ne'ebé mai tan ho Covid-19 no serka sanitaria dada ba beibeik,” nia afirma.
Nia dehan, ho situasaun ne'e mak timor leste hasoru loron-loron fanun MAPK atu hamrik defende povu iha Timor-Leste.
“Sei povu ne'e mesak de’it povu laiha koñesimentu, MAPK defende inan aman haruka ita eskola, hanesan ita Timor oan ita tenke iha solidariedade,” nia hateten.
Nia argumenta, sei buat hotu-hotu hein governu, governu fó saida mai populasaun sira, tenke fanun governante sira para sira hadia, diskuti didi’ak molok halo desijaun tanba situasaun ida ne'e maka perigu ba nasaun Timor-Leste.
Estajiariu
