DILI (TOP) - Prezidente Repúblika, José Ramos-Horta selebra desizaun istoriku simeira ASEAN ba dala-46 ne’ebé hala’o iha Kuala Lumpur rezulta nasaun membru sira hotu aseita ona Timor-Leste sai membru pleno ASEAN nian.
Selebrasaun ne’ebé PR Horta halo mak realiza Cocktail informál ida ba Embaixadór sira ASEAN nian hodi komemora desizaun istóriku ba admisaun Timor-Leste nu’udar membru membru Asosiasaun Nasaun Sudeste Aziatiku(ASEAN) ba dala 11 iha loron 28 Maio 2025.
Durante serimónia ne'e, Prezidente Ramos-Horta kondekora Kolár Orden Timor-Leste ne'ebé prestijiozu ba Sr. Wan Hadfi Lutfan bin Haji Abdul Latif, Embaixadór Extraordináriu no Plenipotentsiáriu Brunei Darussalam mai Timor-Leste iha Salaun ASEAN, Palásiu Prezidensial Nicolau Lobato iha loron 28 Maio 2025.
Selebrasaun ne'e realiza hafoin deklarasaun importante husi Prezidente ASEAN nian ne’ebé fó sai iha Simeira ASEAN ba dala 46 iha Kuala Lumpur, Malázia, iha loron 26-27 fulan-maiu tinan 2025, ne'ebé anunsiu ofisialmente desizaun kolektiva Líder ASEAN sira hodi admite Timor-Leste nu’udar Estadu-membru organizasaun nian ba dala 11. Adezaun kompletu sei formaliza iha Simeira ASEAN ba dala 47 ne'ebé programa ona ba fulan Outubru 2025.
Realizasaun ida-ne'e reprezenta kulminasaun dékada lima liu husi empeñamentu diplomátiku, hahú ho Prezidente Ramos-Horta nia diskusaun inisiál ho Ministru Negósiu Estranjeiru Indonézia nian, Sr. Adam Malik, iha Jakarta iha tinan 1974, no formaliza liuhusi karta intensaun Timor-Leste nian atu adere ba ASEAN iha tinan 2011.
"Admisaun ne'e reprezenta konkretizasaun mehi ida ne'ebé hahú liu tinan 50 liubá no no reflete dedikasaun metin husi líder Timor oan sira, molok no agora, ne'ebé fiar ba vizaun ASEAN nian," afirma Prezidente Ramos-Horta. "Ohin, ita selebra la'ós de'it ita-nia admisaun, maibé ita-nia kompromisu atu serbisu maka'as liután bainhira ita prepara atu kontribui ba komunidade ASEAN nia prosperidade komún no estabilidade rejionál.”
Prezidente Ramos-Horta kondekora Kolár Orden Timor-Leste nian ba Embaixadór Extraordináriu no Plenipotentsiáriu Brunei Darussalam mai Timor-Leste, Sr. Wan Hadfi Lutfan bin Haji Abdul Latif, nu’udar rekoñesimentu ba ninia servisu diplomátiku esepsionál dezde aprezenta karta kredensiál iha loron 15 fulan-jullu 2020.
Iha Embaixadór Wan Hadfi nia mandatu, relasaun bilateral entre Timor-Leste ho Brunei Darussalam hetan progresu ne'ebé laiha presedente liu husi vizita estadu resíproku entre Sua Majestade Sultan Brunei nian ho Prezidente Ramos-Horta, interkámbiu ministeriál estratéjiku sira, no asinatura akórdu importante sira ne'ebé kobre servisu aéreu, rekrutamentu trabalhador, no ezensaun vistu.
Realizasaun notável sira durante nia mandatu inklui reforsa kooperasaun iha ensinu superiór atraves projetu revizaun polítika TVET SEAMEO VOCTECH nian, kolaborasaun kuidadu saúde nian ne'ebé rezulta iha akreditasaun provizóriu ba Sentru Médiku Dili, habelar parseria setór privadu nian ne'ebé aumenta ne'ebé lidera husi kompañia sira hanesan Daikyo Industrial Gas, no partisipasaun inaugural Timor-Leste nian iha Konsellu Negosiu BIMP-EAGA.
"Embaixadór Wan Hadfi Lutfan exemplifika tradisaun diplomasia ne'ebé di'ak liu husi nia servisu dedikadu hodi hametin ligasaun entre Timor-Leste ho Brunei Darussalam," dehan Prezidente Ramos-Horta. "Nia esforsu sira iha tinan rua ne'e kria ona fundasaun ba kooperasaun ne'ebé sei benefisia ita-nia povu rua ba jerasaun sira tuir mai.”
Prezidente Ramos-Horta hato’o agradesimentu profundu ba Estadu-membru ASEAN hotu-hotu ba sira-nia solidariedade no apoiu ne’ebé metin durante jornada adezaun Timor-Leste nian, no mós ba parseiru dezenvolvimentu sira ba sira-nia kompromisu kontínuu.
Timor-Leste agora prontu atu asume nia responsabilidade tomak nu'udar membru ASEAN no kontribui ho signifikativamente atu hodi harii Komunidade ASEAN ne'ebé unidu, pasífiku, no reziliente.
