DILI (TOP) — Movimentu Estudante Tane Oe-Kusi (METO) ezije ba governu atu hapara ro “besi-tua” TRANSHIP II husi Dili ba Oe-Kusi Ambeno, tanba konsidera ro “besi-tua” ne’e bele lori dezastre ba populasaun sira.
Tuir METO nia observasaun katak, ro “besi-tua” ne’e dala barak ona susar atu atraka ba portu sira iha Dili no Atauro. Tanba ne’e, porta voz METO, Calisto Cono ezije ba governu liu-liu Ministru Transporte no Telekomunikasaun (MTK) José Agustinho da Silva atu hapara tiha operasaun “besi-tua” ne’e tanba fó risku ba povu.
“Tanba ne’e, iha portu Atauro, ro TRANSHIP II difisil tebes atu atraka tanba kondisaun la di’ak, maibé governu nafatin obriga ro ne’e kontinua halo operasaun husi Dili ba Oe-Kusi Ambeno, no Atauro. Ami husu ba governu di’ak liu hapara tiha lai ro ne’e nia operasaun, tanba bele lori risku boot ba povu sira,” hateten porta voz METO, Calisto Cono liu husi konferénsia ba imprensa iha Jardin 05 de Maiu, Dili, Segunda 12 Jullu 2021.
Ho kondisaun ro ne’e susar atu atraka ba portu sira, METO husu ba Ministru Transporte no Telekomunikasaun (MTK) hapara tiha ro ne’e nia operasaun, no husu mós ba Prezidente Autoridade ba Rejiaun Administrativu Espesial Oe-Kusi Ambeno (RAEOA), Arsenio Paixão Bano atu bandu ro ne’e tama iha Oe-Kusi Ambeno.
“Tanba bainhira mosu risku, povu sira husi Oe-Kusi Ambeno maka sei hetan nia impaktu boot liu”.
METO mós husu ba xefe governu atu tau atensaun ba kondisaun ro ne’e hodi labele hamosu vitima ba povu sira, no husu mós ba FONGTIL no KAK atu kontinua halo investigasaun klean liutan kona-ba prosesu aluga ro ne’e kuandu mosu iregularidade balun tenke prosesa lalais autor sira ne’ebé iha prosesu negosiasaun ba aluga ro ne’e.
Hatan ba preokupasaun ne’e, Diretor Nasional Transporte Maritima (DNTM) Lino Barreto hateten, motivu ro ahi TRANSHIP II hasoru problema itoan iha atraka ne’e, tanba situasaun klima maka la permite.
“Nia movimentu husi Oe-Kusi Ambeno mai Dili ho situasaun anin maka’as, entaun labele tama iha fatin ne’ebé maka atu atraka ba,” Lino Barreto argumenta.
Lino Barreto defende “besi-tua” ne’e kata, iha kondisaun di’ak maka halo viajen ba-mai Dili no Oe-Kusi Ambeno.
Ro besi tua ne’ebé aluga husi governu Timor-Leste liu husi Ministériu Transporte no Komunikasaun ho naran TRANSHIP II oras ne’e halo deputadu sira iha Parlamentu Nasionál, akuza malu.
Notisia relevante: CNRT akuza deputada Olinda Guterres involve iha aluga ro TRANSHIP II
Deputadu husi bankada Congresso Nacional de Reconstrução de Timor (CNRT), Domingos Carvalho de Araújo akuza deputada husi bankada Kmanek Haburas Unidade Nasional Timor Oan (KHUNTO), Olinda Guterres mós involve iha prosesu negosiasaun hodi aluga ro ne’e mai Timor-Leste ne’ebé foin lalais atu atraka de’it iha portu Atauro susar tebes. Tanba susar atu atraka maka ikus mai hafahe tiha viajen Primeiru-Ministru, Taur Matan Ruak ho nia membru governu atual vise-ministru interior, António Armindo husi partidu KHUNTO.
Husi Dili PM Taur hamutuk ho nia membru governu sira inklui konseleiru masimu partidu KHUNTO José dos Santos Bucar sa’e ro TRANSHIP II ne’e, maibé fila husi Atauro ba Dili, ida-idak la’o ninian, sira la’o fahe malu, la’o namkari. PM Taur fila ho ro Kay Rala Xanana Gusmão, no José dos Santos Bucar ho António Armindo fila ho aviaun.
Notisia relevante: Ba ho ro TRANSHIP II, fila ho aviaun
Hatan kona-ba akuzasaun ne’e, deputada Olinda Guterres defende uluk Ministru Transporte no Komunikasaun (MTK), José Agustinho da Silva nu’udar membru governu mai husi partidu KHUNTO katak nia seidauk involve ninia aan ba iha Ministériu Transporte no Komunikasaun ne’e, maibé partidu KHUNTO maka ba lidera iha MTK ne’e.
Projetu ro TRANSHIP II ne’ebé durante prosesu negosiasaun ne’e bankada FRETILIN nonok de’it, maibé iha semana hirak liuba deputadu husi FRETILIN nian mós loke ibun ona kona-ba ro ne’e.
Notisia relevante: Bankada FRETILIN foin ko’alia hapara ro TRANSHIP II
