DILI (TOP) — Ro besi tua ne’ebé aluga husi governu Timor-Leste liu husi Ministériu Transporte no Komunikasaun ho naran TRANSHIP II oras ne’e halo deputadu sira iha Parlamentu Nasionál, akuza malu.
Deputadu husi bankada Congresso Nacional de Reconstrução de Timor (CNRT), Domingos Carvalho de Araújo akuza deputada husi bankada Kmanek Haburas Unidade Nasional Timor Oan (KHUNTO), Olinda Guterres mós involve iha prosesu negosiasaun hodi aluga ro ne’e mai Timor-Leste ne’ebé foin lalais atu atraka de’it iha portu Atauro susar tebes. Tanba susar atu atraka maka ikus mai hafahe tiha viajen Primeiru-Ministru, Taur Matan Ruak ho nia membru governu atual vise-ministru interior, António Armindo husi partidu KHUNTO.
Husi Dili PM Taur hamutuk ho nia membru governu sira inklui konseleiru masimu partidu KHUNTO José dos Santos Bucar sa’e ro TRANSHIP II ne’e, maibé fila husi Atauro ba Dili, ida-idak la’o ninian, sira la’o fahe malu, la’o namkari. PM Taur fila ho ro Kay Rala Xanana Gusmão, no José dos Santos Bucar ho António Armindo fila ho aviaun.
Notisia relevante: Ba ho ro TRANSHIP II, fila ho aviaun
“Parese ha’u hatene ita boot involve hotu iha ro TRANSHIP II ne’e karik, kuandu ha’u temi ona aluga ro TRANSHIP II ne’e ita sente alerjia, parese ita involve ona. Ha’u hateten osan rihun $220 mais $ rihun 30 ba kombustivel ne’e total hamutuk rihun $250 nusa maka la haree ba ema sira kbiit la’ek sira, ema sira hadia veteran sira, faluk sira ne’e,” deputadu Domingos Carvalho de Araújo akuza deputada Olinda Guterres iha sesaun plenaria Parlamentu Nasionál, Dili, Tersa 06 Jullu 2021.
“Ha’u kuandu temi ona ro TRANSHIP II deputada Olida Guterres alerjia ha’u hatene ona. Deputada Olinda Guterres involve iha laran, lalika bainhira kuandu ita ko’alia faktu loloos ne’e ita sempre interven iha laran kona-ba saida nian. Ro TRANSHIP II agora la di’ak ona, tinta sira nakloke tan. Bainhira ita la’o tuir dalan tasi ibun Farol nian ita hateke bar o TRANSHIP II momoos hela ida ne’e ita sei defende nafatin,” deputadu Domingos afirma.
Hatan kona-ba akuzasaun ne’e, deputada Olinda Guterres defende uluk Ministru Transporte no Komunikasaun (MTK), José Agustinho da Silva nu’udar membru governu mai husi partidu KHUNTO katak nia seidauk involve ninia aan ba iha Ministériu Transporte no Komunikasaun ne’e, maibé partidu KHUNTO maka ba lidera iha MTK ne’e.
“Ita boot sira haree ba ita boot sira nia aan CNRT agora iha ne’ebé? KHUNTO maka agora iha ne’ebá partidu CNRT sira nain rua ne’e agora iha ne’ebe lori osan sira ne’e ba iha ne’ebé? Imi temi ha’u nia naran katak ha’u involve aan saida iha MTK. Ita boot matenek maka la tur iha ne’eba, ita boot nia inkapasidade maka la ba tur iha ne’ebá ne’e. Ita boot sira dehan katak ha’u involve ha’u nia partidu KHUNTO,” responde deputada Olinda.
Deputadu Olinda mós lakohi tuur nonok hodi fila akuza fali CNRT ne’ebé tuir nia katak, durante ne’e foti osan barak mós hodi goja tun-sa’e tantu iha rai-laran, no rai-liur.
“Ko’alia took fo’er ka moos haree lai, CNRT iha ne’e foti osan bar-barak tiha, miliar ba miliar agora dun fali ha’u maka ba involve fali iha kazu ro TRANSHIP II ne’e”.
Projetu ro TRANSHIP II ne’ebé durante prosesu negosiasaun ne’e bankada FRETILIN nonok de’it, maibé iha semana hirak liuba deputadu husi FRETILIN nian mós loke ibun ona kona-ba ro ne’e.
Notisia relevante: Bankada FRETILIN foin ko’alia hapara ro TRANSHIP II
