DILI (TOP) — Konselleiru Másimu Partidu Kmanek Haburas Unidade Nasionál Timor Oan (KHUNTO), José Dos Santos Naimori Bucar hateten, tuir loloos sira atu ba halo juramentu iha foho Ramelau kleur tiha ona, maibé seidauk halo hela de’it, tanba kauza husi krize politika, no moras Covid-19 iha rai-laran.
“Tuir loloos ita (ami) nia juramentu ba Ramelau ne’e kle’ur tiha ona, maibé tanba fallansu itoan iha (mosu) moras covid-19, ida ne’e mak halo atraza to’o agora ita sei hein. Más agora membru governu sira simu hotu ona vasina entaun, loron 14 Agostu tinan ida ne’e tenki lori sira ba iha Ramelau,” Naimori hateten ba jornalista iha seremonia komemorasaun loron aniversariu partidu KHUNTO nian ba dala-10 iha Manleuana-Dili, Domingu 04 Jullu 2021.
Nia argumenta, membru governu hamutuk 14 inklui reprezentante povo (deputadu KHUNTO) nian na’in 5 daudaun ne’e iha kondisaun fíziku liliu imunidade estavel ona hafoin simu vasina, tanba ne’e iha loron ne’ebé determinadu sei lori hotu ba hala’o seremoniá ritúal ne’ebé maka sempre ko’alia iha tempu kampaña eleitoral.
Parte balun konsidera juramentu Ramelau ne’e nu’udar estratéjia politika ida ba KHUNTO hodi buka votus tantu iha eleisaun prezidensial no parlamentar, maibé Konseleiru mazimu partidu KHUNTO rejeita total hodi dehan juramentu ne’e nu’udar promesa ne’ebé deklara tiha ona.
“La’e, lahanesan ne’e, tuir loos juramentu ne’e iha tinan kotuk atu ba, preparasaun atu ba mosu fali Covid-19, ida ne’e maka halo atraza to’o agora no impase polítika (kríze polítika) ne’ebé ita hotu hasoru, tanba iha momentu atu ba, maibé membru governu hosi KHUNTO balun seidauk simu tomada de posse tanba ida ne’e mak ita (ami) dada to’o agora,” Naimori rejeita.
Maske nune'e, Naimori promete dala tan katak, sei lori duni nia membru governu ho deputadu sira husi partidu KHUNTO hodi ba halo juramentu iha foho Ramelau iha loron 14 Agostu 2021.
“Falta fulan ida, sei halo tan historia furak ida ne’ebé maka partidu KHUNTO halo promesa tiha ona iha kampaña sei lori sei lori membru Governu sira ba iha foho Ramelau sei monu iha sabadu 14 Agusto 2021 agora".
Nia dehan, nia rasik mós la merese atu sai iha palku ne’e, maibé lori bou sira nia brani, matenek no serbisu maka ohin loron fó oportunidade nia mós bele sa’e ko’alia iha palku ne’e. Tanba KHUNTO hakarak aprende no KHUNTO hakarak la’o tuir maun sira nia ain fatin.
“Tanba ida ne’e maka Partidu KHUNTO hakarak respeita ba partidu hotu-hotu no Partidu A ka B maka aat no laiha ida maka diak liu hotu-hotu hanesan sei iha partidu ruma maka aat karik hatete ba katak Partidu KHUNTO maka aat. Tanba ami atu respeita no tane nafatin ita bo’ot sira”.
Nia promete dala rua ona, iha kampaña eleisaun antesipada fó-sai ba públiku katak bainhira ka'er ukun sei lori membru governu hosi KHUNTO ba halo juramentu ba foho Ramelau.
Kuadru partidu KHUNTO ne’ebé maka sai membru governu kompostu Vise-Primeira Ministra no Ministra Solidariedade Sosiál no Inkluzaun (MSSI) hosi Armanda Berta dos Santos, Ministru Transportes no Komunikasaun (MTK) José Agustinho da Silva, Ministru Agrikultura no Peska (MAP) Pedro dos Reis, Vise-Ministru Negósiu Estranjeiru no Kooperasaun (MNEK) Julião da Silva, Vise-Ministru Edukasaun, Juventude no Desportu (MEJD) António Guterres, Vise-Ministru Obras Públikas (MOP) Nicolau Lino Freitas Belo, Vise-Ministru Agrikultura no Peska (MAP), Abílio Xavier de Araújo, Vise-Ministru Interiór (MI) António Armindo, Sekretáriu Estadu Formasaun Profisionál no Empregu Alarico do Rosário, Sekretáriu Estadu Terra no Propriedade Mário Ximenes, Sekretáriu Estadu Peska Elídio de Araújo, Sekretáriu Estadu Protesaun Sivíl, Joaquim José Gusmão dos Reis Martins.
Naimori hato’o asuntu ne’e, halo militante no simpatizante basa-liman tanba kuadru sira tenke komprimenta moto “Tane O Emar, Tane Lisan no Tane Rain” entaun tenke halo juramentu iha Ramelau. Nune’e, Naimori fó-sai katak, kuadru partidu KHUNTO ne’ebé envolve iha ukun tenke halo juramentu iha foho Ramelau ne’ebé lokaliza iha munisípiu Ainaro hodi serví povu no nasaun ho fuan no laran-moos.
