DILI (TOP) — Xefe Estadu Maior Jenerál FALINTIL-Forsa Defeza Timor Leste (F-FDTL), Tenente Jenerál Lere Anan Timur, deklara sei konsulta uluk ho líder rezisténsia sira liuliu ho líder karismátiku Kay Rala Xanana Gusmão no partidu FRETILIN maka foin desidi atu kandidata aan ba Prezidente Repúblika período 2022-2027.
“Ate agora seidauk pronúnsia atu kandidata aan ba prezidente repúblika tanba ha’u sei militár, ema seluk mak kandidata aan más ha’u ko’alia beibeik ona iha maun no iha aman ne’ebé ha’u mós tenki rona sira, i ha’u nia maluk sira ne’ebé mai hamutuk hosi ai laran, ami sei konsulta malu depois kandidata la kandidata ne’e ha’u hanoin katak problema la iha tanba demokrásia,” Tenjen (Tenente Jenerál) Lere hateten ba jornalista iha kuartél jerál F-FDTL Fatuhada, Segunda 28 Juñu 2021.
“Ha’u repete tan dala ida ami sira ne’ebé mai hosi ai laran, nu’udar maun alin ami sei konsulta malu liuliu ho ha’u nia maun Xanana, no ha’u mós uluk membru Comíte Centrál Fretilín (CCF), sobrevivente úniku segundu jerasaun ha’u sei moris, sé kandidata karik ha’u sei ba konsulta FRETILIN,” Lere afirma.
Antes ne’e, observadór polítiku hosi Universidade ba Pás (UNPAZ), Adolmando Soares Amaral prefere José Ramos Horta bele kandidata aan ba PR hodi kompete iha eleisaun prezidénsial 2022.
Notisia relevante: Akademista prefere Horta kandidata aan ba PR
Tanba tuir nia katak, durante mandatu prezidente repúblika Lu Olo imajen Timor Lorosa’e iha mundu internasionál monu, tanba ne’e atu hiit hikas fali imajen ou naran Timor Lorosa’e povu presiza figura ne’ebé bele iha inflúensia ba mundu internasionál.
“Iha buat rua importante maka presiza ita hare, ita iha problema rai laran (impase polítika) no mós problema iha nível internasionál. Agora daudaun iha oitavu governu ho mandatu Prezidente Lú Olo nian Timor Lorosa’e nia imajen iha mundu internasionál monu loos, tanba ne’e atu hiit fila-fali naran Timor Lorosa’e iha mundu povu tenki buka figura ne’ebé bele iha inflúensia ba mundu, ha’u nia hanoin naran rua (Ramos Horta-Agio Perreira entre sira na’in rua bele kandidata aan ba PR) bele ajuda hadi’a fali imajen Timor iha mundu,” nia hateten.
Maibé se halo kaderizasaun alternativu seluk maka eis Ministru Prezidénsial Konsellu Ministru hanesan líder jerasaun foun ne’ebé mós iha esperiensia no serve ka'er ukun hodi bele liberta povu hosi inserteza polítika ne’ebé la’o kle’ur ona.
“Mas sé ita hakarak atu kaderiza jerasaun foun, alternativu seluk Agio Pereira bele ba hodi kontinua jerasaun tuan sira nia misaun ba oin,” katak Lere.
Entretantu, iha loron 26 Juñu liuba rezultadu konferensia partidu KHUNTO nian anunsia no ofisializa ona Armanda Berta dos Santos kanidata aan hodi kompete iha eleisaun prezidensial ne’ebé sei akontese iha tinan 2022.
