HO JEAN PAUL SARTRE
Elvito Soares Martins;
Estudante III Ano Filosofia, ISFIT (institutu Filosofia e Teologia Fatumeta)
Nação nebé uza sistema democracia, nia princípio mak liberdade. Democrasia ita hotu hatene mai husi lian grego, forma husi liafuan rua (2) demos no kratos, ho nia significado demos: povo no kratos: poder, katak poder ne’e povo nian (Blackwell, 2004: 168). Iha artigo simples ida ne’e, hau koko atu hare liberdade iha sociedade democratico Timor Leste ho pensamneto liberdade husi Filósofo Jean Paulo Sartre nian.
Liberdade iha nasaun democrática ita bele dehan liberdade dependente, tamba liberdade depende ba lei. Lei dehan ida ne’e livre então ita bele halo, maibe lei dehan la livre maibe ita halo ita hetan sanção. Iha ita nia constituição art. 41.0 to’o art. 450 fo liberdade ba ita, maibe liberdade ne’e ita halo liu ka fora husi constituição ne’e katak ita viola. Ne’e mak liberdade iha sistema Democrasia.
Atu hare no hatene klean konaba liberdade iha sosiedade democrático ho pensamento Sartre, uluk nanain mai ita hatene se los mak Sartre ne’e rasik.
Se mak Jean Paulo Sartre?
Jean Paul Charles Aymard Sartre Filósofo ida nebé identifica hanesan mos existencialista, moris iha loron 21 fulan Junho tinan 1905, husi aman Jean Baptiste Marye Aymard Sartre no inan Anne Marie Schweitzer. Iha 1906 nia aman mate husik hela nia ho nia inan. Liu tiha nia aman nia mate, Sartre ho nia Inan muda ba cidade ida naran Meudon, hodi moris hamutuk ho nia Avo Charles Schweitzer (Jolivet, 1968: 9). Sartre hetan kuidadu makas husi nia Avo, no nia avo sempre hakas nia iha educação ho rigoroso tebes. Sartre continua nia estudo básico iha tinan 1921 iha Liceu Louis-le-Grand, (Paris) no iha ne’eba mak nia hatene fenomenologia Henri Bergson nian. Bergson hanesan mos Filósofo bo’ot ida iha França no nia mak apresenta ba Sartre kona ba fenomenologia no Sartre hametin ka aumenta tan husi Edmund Husserl no Soren Kierkegaard.
Sartre hahu fila fali nia estudo ensino superior iha tinan 1924 iha filosofia iha Paris. Iha nia curso ida ne’e, nia conhece ema nain rua, nebé hola parte iha nia moris ka formasaun mak hanesan filósofo, sociológo no intelectual Francês Raymond Aron no filósofa existencialista no feminista Simone de Beauvoir nebé sai compainheira permanente iha Sartre nia vida. Sarte mate iha tinan 1980, no obras principais husi Sartre mak hanesan: A náusea (1938), O ser e o nada (1943), O existencialismo é um humanismo (1945), Critica da Razão dialética (1960), ho tan obra sira seluk. (Cardoso. dkk, 2014: 269)
Liberdade Tuir Sartre Nian
Sartre nia pensamento kona ba liberdade ne’e importante tebes iha época segunda guerra mundial, tamba sociedade sira iha hela situação abalado (la hakmatek ka nakdedar) nune’e ema la sente livre tamba tauk. Husi ne’e mak Sartre elabora nia obra ida kona ba “O Ser e o Nada no mos O existencialismo é um humanismo”. Nia critica tamba akuza ema ka halo ema sai maten/bila-an ka la husik ema, no halo ema sai desespero (estado la iha compaixão no iha deit violento) no nia critica mos ba hahalok ne’ebe fo importansia ka énfaze ba reputasaun nebé la diak kona ba humano.
Tuir Sartre ema ne’e moris atu hili “escolha” (Sartre, 1980: 545.) no liu husi nia hili ne’e depende saida mak nia hili atu halo, atu nune’e nia bele manisfesta ninia presença iha mundo ida ne’e, tamba buat ne’ebe acontece iha ita nia moris ne’e hanesan consequencia ida husi ita nia hili (escolha) ne’e rasik. Nune’e individo ka ema ida iha nia liberdade atu hili, atu nune’e nia bele halao opção sira nebé nia opta ona iha nia moris. Liberdade la iha tan sentimento angústia. Tuir autor sentimento angústia (iha relação/hare fila fali) ba realidade, tamba realidade ida nebé halo ema tauk ne’e sei la hotu iha nia moris (Sartre, 1970: 5).
Sartre afirma ita ema moris ne’e atu sai livre (Sartre, 1980:543), la iha limite ba liberdade individual. Nune’e individo iha nia liberdade atu muda nia moris, nia hakarak, no livre atu buka buat foun ba nia existencia, la iha tan sentimento angustia. Nune’e Sartre uza termo angústia atu descreve reconhecimento total ba liberdade, atu hili no confronta cada individou no atu dezafia iha momento balu kona ba nia existência (Sartre, 1970:6). Tuir Sartre, ita ema mak sai fundamento ba ita nia decisão ka ita nia desejo sira. Maibe responsabilidade mak consciência ba liberdade (Sartre 1980: 678). Tanba ne’e, tuir Sartre quando ita hili ona tenke lao hamutuk ho responsabilidade “ser livré, também ser responsável” (Sartre, 1980:545). Atu dehan deit, ba liberdade la iha limitação no liberdade tuir Sartre tenke iha responsabilidade. Ita hili diak ka at ne’e ita nia liberdade maibe tenke iha responsabilidade atu buat nebé Ita hili hodi bele alcansa nia objetivo.
Liberdade Iha Sociedade Democrática TL
Ita hotu hatene katak Democrasia ninia caracter mak Liberdade. Loos duni katak iha democrasia iha liberdade, maibe liberdade nebé dentro iha democrasia ne’e iha nia limitasaun. Ita bele dehan liberdade em fronteiras, laos liberdade sem fronteiras. Tamba ita moris iha sociedade ida ita tenke iha senso comum. Husi senso comun ne’e mak limita ita nia liberdade pessoal, no husi senso comum ne’e mak hili democrasia, no democrasia nia base fundamento mak constituição. Ita nia Constituição RDTL art. 410 to’o 450 fo liberdade mai ita, ao mesmo tempo limita mos ita nia liberdade pessoal. Tamba ita tenke lao tuir constituição, wainhira ita sei nu’udar sidadaun ida iha Rai ida ne’e. Nune’e labele uza liberdade nebé iha sai fali ba libertinazem, kuando ita uza liberdade sai ba libertinazem nia consequência ita sei simu. Tuir Sartre “ita uza liberdade tem que iha responsabilidade” (Sartre, 1980: 545).
Iha art. 46.0 CRDTL cidadão ida-idak iha direito ba participação política. Nune’e ita iha liberdade atu sai nai ulun, sai buat hotu, kaer cargo oi-oin maibe tenke iha responsabilidade ba ita nia cargo ka knaar nebé iha. Labele sai bo’ot atu fo ksolok an, maibe sai bo’ot atu hare mos ema seluk (povo). Ida ne’e mak ita nia responsabilidade.
Nai ulun sira tenke hatene katak, sai ukun nain nia base mak Constituição. Atu nune’e, iha responsabilidade ba nia povo, labele dehan hau iha liberdade atu ukun no liberdade iha arte hodi intrepreta constituição. Wainhira la tuir Constituição ne’e ita hatudu ona ita nia liberdade pessoal no iha liberdade pessoal ita hatudu ita nia egoista. Nune’e afirma husi Spinioza “É o próprio egoísmo que impele os homens a se uniram” (Padovani & Castagnola, 1972: 300). Iha ne’e ita bele hateten katak, egoismo halo ita la hamutuk hodi hamosu impasse oi-oin no impasse mosu babebeik tamba ita iha liberdade maibe iresponsabilidade no la kumpri Constituição.
Iha nação Democratico liberdade la iha tan angústia (sentimento tauk). Iha ita nia Constituição RDTL art. 440 koalia kona ba liberdade de circulação. Maibe ohin loron saida mak acontece? Cidadão ida-idak hatudu nia presunçoso, hodi limita nia liberdade rasik. Iha artigo 40.0 CRDTL kona ba liberdade de expressão e informação, moris iha nação democrático cidadão hot-hotu livre atu expressa saida mak nia hakarak maibe expressa em termos da lei. No iha artigo 42.0 CRDTL kona ba liberdade de reunião e de manisfestação, maibe dalaruma ema sente tauk atu halo manifestação. Tauk ida ne’e, será que nação ne’e laos nação democráratico? Tuir Sartre “sentimento tauk ida hanesan ne’e, quando acontece ba ema ida nia sei la haluha iha nia moris” (Sartre, 1970, pag 5). Nune’e Sartre afirma “você é livre, escolha, ou seja, invente. Nenhuma regra de uma moral genérica pode indicar o que devemos fazer; [...].” Portanto, na medida em que o homem criando-os e torna-se responsável por tudo o que fizer na sua vida (Cardoso, 2019:20).
Ohin loron ita hasoru Moras pandemia mundial Covid-19, limita mos ita nia liberdade, iha ita nia nação hasai Estado de Emergencia “EE” no ohin loron sai tan ba Serca sanitária “SS” limita buat hotu, maibe limita liberdade ida ne’ebe bele fo mos beneficio ka fo moris ba ema, laos atu hamate no haterus ema. Ita lais atu foti decisão “SS” hodi limita tiha buat hotu, maibe ita la garantia ba ema nia moris, los duni ita limita liberdade de circulação atu prevene ita husi moras, maibe limita ho responsabilidade, atu SS ne’e garantido duni, se lae ita aumenta EE no SS to’o dala atus, popolusaun mos menus, laos causa husi Covid-19 maibe tamba deit EE + SS.
Ho dalan EE ho SS karik la efetivo ba vida no desemvolvimento, husu atu ho maneira seluk, atu nune’e labele prevene ida no hamate ida seluk. Tuir Jokowi dehan “ jangan sampai yang kena virus 1 orang di 1 RT, yang lockdown 1 kota” (Detikcom, https://news.detik.com/berita/d-5371215/). Atu afirma deit katak los duni ita tenke muda ita nia maneira de SS, lolos ne’e ema ida mak kona corona iha suco ida, nusa ita la lockdown iha suco ne’e deit hodi husik suco seluk no municipio seluk livre halo actividade. No lokcdown iha suco ka bairo nee deit facilita ita atu controla no la hamate desemvolvimento ba suco seluk ou municipio seluk. Jokowi dehan tan “Selain menyuruh pakai masker, mengimbau pakai masker, tapi juga membagi masker,". Ida ne’e atu hateten katak, bainhira aumenta SS tenke garantia ba ema nia moris no mos hanoin ema seluk nia moris. Laos koalia deit kona ba SS, maibe fahe mos hahan ba ema sira ne’ebe sofre ba SS. Labele husik povu hein to halerik ba hahan mak foin hakfodak. “Ita nia responsabilidade iha ne’ebe?”
Los duni Jhon F. Kennedy dehan “ não perguntes o que a tua pátria pode fazer por ti, mas pergunta o que tu podes fazer por ele” (Reilly & Dugard, 2013), nune’e tulun malu hodi moris iha nação democrático ho liberdade ida nebé iha responsabilidade ba ita nia an no ba nação.
Conclusão
Liberdade katak moris tuir ita nia hakarak, maibe tenke iha responsabilidade, livre foti decisão maibe tenke iha mos responsabilidade ba decisão nebé ita foti. Moris iha sociedade ida presija ita nia contribuição. Nune’e labele halo liberadade ne’ebe ita iha sai libertinazem. Ita iha liberdade atu moris no halo buat hotu, maibe tenke tuir ita nia constituição. Democrasia nia base fundamento mak constituição.
Hanesan jovem, nai-ulun, estudante halo buat nebé ema seluk mos bele sente nia diak, ka bele fo moris mos ba ema seluk. Iha tempo hanesan ohin loron, saida mak ita tenke halo ba ita nia maluk sira, se liberdade ne’e iha ita nia an rasik… livre halo buat hotu atu alcansa felicidade, maibe labele feliz iha ema seluk nia sofrimento.
Liberdade laos aproveitamento, ita moris livre laos aproveita hodi halo ema seluk sofre, nune’e labele aproveita iha situasaun saida deit, wainhira ita sente livre ema seluk sente angustia no sofre.
Nb: Artigu Simples ida ne’e rejultadu travalho (oinsa hakerek artigu) materia Seminar I, iha Fakuldade Filosofia ISFIT, Ho Dosente, Elidio Agusto Guterres.