TUIR PARADIGMA FILOZOFIA ETIKA JURGEN HABERMAS
Introdusaun:
Hare ba situasaun rai laran, drama polemika politika nebe mosu halo ema konfuzaun ba faktus nebe maka los. Iha politika drama halo ema hanoin ba oin atu tau konfiansa ba se maka diak hodi lori nasaun ba oin. Husi diferensia polemika sira nebe maka akontese iha drama palku politika halo ema hotu rame-rame hodi hare drama nebe maka diak liu no besik liu ba rona nain ou hare nain sira. Iha demokrasia ida ne’’e, los katak fo liberdade ba ema hotu atu hato ninia sujestaun, openiaun nebe diak no justu kona ba aktus nebe akontese ou iha rai laran. Maibe husi parte seluk mos dala ruma Liberdade (demokrasia), bele halo mos ema lakon ninia sentidu umanu respeita malu no ikus sala utiliza demokrasia (liberty) hodi haluhan tiha etiket respeitu malu “dala ruma”. Tanba lakon konsiensia no dominam ona ho emosional. Iha openiaun ida ne’e ita la prefere ba se mak “los” no se maka “sala”, diferensia hanoin ne umanu, maibe buat nebe importante maka oinsa ita nafatin aplika etiket nebe maka diak iha komunikasaun nia laran. Tanba husi komunikasaun nebe maka diak sei fo mos nia resultado nebe maka diak mos. Tuir mai ita sei haklean liu tan oinsa maka filsuf Habermas nia hanoin kona ba etika komunikasaun.
Se maka jurgen Habermas:
Jurgen habermas filsuf ida. Nia husi sidade Dusseldorf, Alemana, nia moris iha tinan 1929. Nia halao tempo jovem iha sidade kiik ida naran Gummersbach, besik sidade Dusseldorf iha alemana. Iha nia tempo jovem nia esperensia kedas funu mundu daruak no mos ukun rezime Adolf Hittler nian iha momentu ne’eba. Saida maka Habermas hateten kona ba oinsa maka komunikasaun (ethics) importante? ita hatene katak komunikasaun sai hanesan baze fundamentalismo umanu nian nebe maka lori ema hodi kuinese malu no sai amigo. Iha komunikasaun entre sujeitu ida ho sujeitu seluk sempre iha diferensia polemika, maibe ho diferensia pelemika sira nebe iha, laos kerdijer hodi hafahe ema nia relasaun umanu, maibe oinsa maka komunikasaun sai hanesan ponte ida hodi hatene malu iha situasaun nebe diferensia ba hanoin ne’e buat ida ke normalidade. Tanba ita umanu, liafuan seluk hanaran (animal rasionale) signifika katak ema sempre iha relasaun ba malu liu husi komunikasaun nebe maka diak hodi ajuda malu iha tempo situasaun nebe maka mosu diferensia polemika ba hanoin. Tuir habermas, ema hotu-hotu iha Liberdade hodi atinji ninian direitu patriotizmo konstituisional (verfassungspatriotismus), tanba husi paradigma politika konstituisional nebe prefere liu ba direitu ema ida-idak nian nebe maka partisipa/hola parte iha diskusaun kona bonum commune.
Komunikasaun: Resultado Bonum Commune
Liafuan Bonum Commune mai husi lingua latinu hanesan tema ida husi ramu filozofia etika nebe maka mosu iha tempo Yunani no Romawi liu ba. Filsuf Yunani kuno no Romawi sira hanesan Plato, Aristoteles no Cicero hahu tona koalia ona kona ba saida maka bonum Comune. Bonum Comune hanesan prinsipio ida ba moris diak (bem comum) nebe presiza haburas iha nasaun nia laran. Tuir Cicero, moris hakmatek (bem commom) hanesan prinsipio ida iha sociedade laran ema sempre iha espiritualidade nebe maka diak liu-liu iha parte komunikasaun ho asaun nebe mak diak hodi bele fo benefisiu ba moris sociedade no nasaun nia diak. Ho liafuan seluk hanesan Aristoteles dehan eudaimonia, signifika ema hetan haksolok nebe maka as tebes(ho lingua indonezia dehan kebahagiaan tertinggi) ho haksolok nebe maka as iha sociedade laran hodi atinji ba moris nebe maka diak no hakmatek. Ho prinsipio hametin moris diak nebe hahu husi oinsa ema halo dialogo nebe diak tuir etika nebe maka valid hodi fo benefisiu ba ema iha sociedade no nasaun nia laran rasik.
Nasaun nebe maka diak presiza hahu husi komunikasaun nebe maka diak. Tanba ho Sistema komunikasaun nebe diak halo ema hatene oinsa maka hatene respeita malu. Respeita malu laos katak hare ba pesoal ida nia kareira intelektual boot, maibe hare ba oinsa ia umanu ida nebe maka hetan estatus (martabat) hanesan ema. Diferensia ba openiaun laos buat at, ida nebe mak la diak maka lakon konsiensia etiket respeita malu. Hahalok ida ne’’e maka presiza toma atensaun boot bainhira hahu komunikasaun. Tanba bainhira ita hahu koalia dala ruma nakonu ho sentidu nervosu, ita rasik lakon konsensia ba liafuan no ikus ita nia liafuan bele perigu mai fali ita.
Ita hatene katak bainhira iha drama politika sempre iha diskursu entre grupo pro (konkorda) no kontra (diskonkorda) bainhira hato expresaun ruma. Diferensia pensamentu iha Sistema demokrasia ne normal. Tanba diferensisaun sai baze ba direitu konstituisional.
Habermas: Komunikasaun baze Fundamentus Etika
Iha parte ida ne’’e ita husu saida maka etika komunikasaun? Etika komunikasaun hanesan parte ida husi filozofia atu estuda kona ba hahalok ou etiket “moral” umanu nian. Dala barak ema hotu hatene. Ema hotu moris ho tempo nebe maka lahanesan, balu uluk no balu ikus no balu sei mai. Importante maka oinsa iha komunikasaun ba malu presiza etiket nebe maka diak, atu hatudu nafatin identitatas (culture) timor nian nebe maka diak iha parte respeita malu. Diferensia hanoin laos falhansu ida mai ita atu halakon esperitualidade respeita malu ne sala. Ho ida ne’e, ita hotu tenki hatene katak:
…….Diferensia ideas sempre hamosu Polemika “Hanoin” ne’e mak hanaran politika. Importante Maka Etiket (Ethics) Respeitu Malu Presiza Toma Atensaun Hamutuk Tanba Ida Ne Maka Fundamentalismo husi cultura Politika Timor nian rasik…….
Tanba ita hatene katak Timor-leste hanesan nasaun ida nebe maka ho nia cultura nebe ke kuinesidu ho respeita malu. Respeita malu iha parte ne refere liu ba iha komunikasaun nebe mak diak. Ho komunikasaun nebe maka diak, halo ema hatene se mak nia maluk koalia. Husi komunikasaun nebe maka diak, lori ema ba hanoin nebe maka kreativu no ikus mai hetan mos resultado nebe maka diak. Tuir habermas rasik komunikasaun hanesan meos ida hodi lori ema hatene se mak nia konta debate.
Saida Maka Mentalidade (Ethics) Moral kona ba diferensia ideas
Ohin loron ita hare ba ita nia rain, mentalidade moral presiza hare hamutuk. Dala ruma ema sala haluhan etika komuniaksaun. Tanba sa? Ita bele asisti husi media, Youtube, facebook, whatsapps, TV, buat nebe mak la lao los sempre diferensia kritika nst. Ita hatene katak iha demokrasia ida ema hotu tenki hakruk ba lei nebe mak vigora ona iha konstituisaun RDTL. Ema ou sidadaun hotu-hotu tenki hakruk ba lei nebe mak iha ona se mak sala no la tuir lei nebe mak vigora oha iha konstituisaun mak nia tenki kumpri sansaun nebe mak tuir lei haruka laos fila trata malu iha media. Media laos fatin atu trata malu, maibe media fatin atu hato ita nia sugentaun nebe mak diak hodi kontribui ba nasaun ne’’e. Mental moralidade nebe mak diak tenki iha aplikasaun atu nune la iha krime entre sosiadade ho governo. Ho esperitu dedikasaun nebe mak diak forma juventude sira moris iha paz no estabilidade iha hakmatek nia laran. Nudar nasaun nebe mak foin hamrik, ita presisa tebes virtue nebe mak diak atu nune lori nasaun no povo nia naran ba oin nafatin, ita labuka atu sai sidade liu nasaun seluk maibe ita presisa moral nebe mak diak atu nune sai exemplo ba nasaun seluk katak ita mos bele. Ohin loron mosu akujasaun no aktus oi-oin tanba ema sala uja maneira direitu democrasia ne halo tuir ida-idak nia hakarak. Iha parte ne’e nasaun iha responsabilidade boot hodi fo hanoin ba nia povo. Povo laos lahatene saida mak etika {etiket} maibe nudar aman ba nasaun governo iha orden soberania iha direitu hodi fo hanoin no halo mudansa positive ba nia povo sira.
Tempo agora laos ita atu sura ita nia kole iha funu nia laran. Tempo agora to ona atu ita hanoin ba desenvolvimentu ba rai ne’’e hanesan bainhira sei iha nakukun nia laran mehi ho espiritu patriotismo katak hakarak lori nasaun ho povo sai husi nakukun nia laran hodi moris hakmatek paz no estabilidade. Nasaun nebe mak ita hanaran demokrasi katak fo Liberdade total ba ema ida-idak (individo) iha direitu atu hadia no kontribui ba nasaun ne’e. Tanba ne’e, hanesan sidadaun Timor oan hotu-hotu tenki hakruk ba lei nebe mak vigora ona atu nune nasaun laos sai fatin eskploitasaun maibe fatin atu moris hakmatek.
Husi Diferensia Ideas hamosu paradigma foun
Hanesan ita hatene katak diferensia ideas ne’e parte ida husi objetivu humanism nian. Husi diferensia ideas sira mosu buat ida ema hanaran dehan dialogo ba buka solusaun, laos katak buka se mak los no se maka sala. Dialogo mai husi politika drama ida ema hanaran grupo kontra ho grupo mantein openiaun. Husi grupo rua nebe diferensia ideas maka hamosu polemika.
Husi dialogo ema hahu ho komnikasaun. Tanba ida ne’e maka komunikasaun sai hanesan autor ida nebe importante atu sai sasukat iha drama politika, lori ema hatudu nia intelejensia hanesan politikus nebe maka diak no hatene respeita ema seluk nia hanoin, ida ne’’e maka ema hanaran etika (ethics), respeita kritika, openiaun ema seluk husi hatudu etika nebe maka diak hanesan humanismu nebe politikus.
Hanesan umanu, dala barak sei iha “ego” individual nebe maka sei kesi metin iha an, importante maka iha diferensia ideas tenki loke an hodi nafatin tau respeita no kuda etika nebe diak hodi hattudu moral humanu nebe maka diak ba mos ema seluk (lawan bicara).
Ho hahalok respeita ideas ema seluk hamosu ona paradigma foun, nebe diak atu ema hotu nafatin toma atensaun katak hahalok respeita malu nudar paradigm ida nebe importante iha vida humanism rasik.
Vantagem Husi Etika Respeita Malu
Etika respeita malu hanesan umanu laos buat nebe maka foun iha ita nia rain. Hare husi tempo uluk nanis ita nia bei-ala sira kuda ona hahalok ka paradigm ida ne’e. hanesan jerasaun foun presiza kuidado fini ne’’e tanba respeita malu laos lori sasan “osan” hodi sosa, maibe dala ruma mos ema difisil halao tanba sei nakonu hela ho egoisme individual humana nian.
Husi “ego” individual nebe maka kesi an metin, halo ema difisil atu hakat ba hanoin nebe maka universalismo hodi hadia no kuda paradigm nebe foun. Laos difisil maibe ne’e presiza hahu, tanba iha drama politika kada vez halo ema lakon ninia konsiensia nebe diak no ikus mosu “emosional” no halakon etika respeita malu.
Tanba ho ida ne’e, presiza ita hotu nia konsiensia atu nafatin tau etika respeita malu ba iha ida-idak nia an, tanba ita hotu iha lian ida karik dehan sempre menus iha an rasik, tanba ida ne’’e presiza respeita mos ema seluk nia ideia. Ida ne’’e maka humanism ida nebe mak diak ba futuru.
Conclusaun:
Hanesan ita temi iha leten katak hahalok nebe diak hatudu respeita ema seluk nia openiaun hanesan meus ida nebe maka importante iha vida humanu nian. Hahalok respeita malu laos buat todan ida iha vida politika maibe kada vez mos sai todan se baibhira ema sala uja komunikasaun nebe maka la laos tuir etika nebe maka diak.
Habermas iha nia diskursu hateten etika komunikasaun sai hanesan baze fundamentaliha drama politika diskursu nian. Importante iha diskusaun nia laran presiza konsiensia husi ema atu hatudu nia respeitu ba nia maluk nebe maka kontra iha diskusaun nia laran.
Ho ida ne’’e ita hatene katak etika respeita malu hanesan hahalok ida nebe maka importante tebes hodi ita nafatin fo respeita bae ma nebe maka hanesan mos ho ita rasik. Tanba ita iha forma ida nebe maka hanesan no la iha diferensia. Diferensia maka hanoin, no husi hanoin forma ema sai ema nebe maka politika diak iha nasaun ida nia laran.
Husi: Hermenegildo Da Costa Tilman
Alumni Universitas Sanata Dharma Yogyakarta, Indonesia