AMBENO (TOP) – Kareta Estadu tolu (3) iha Rejiaun Administrativu Espesial Oe-Kusi Ambeno (RAEOA) soke malu, tanba “ansi” atu ba han kalan (jantar) hamutuk ho embaixador Korea Sul iha portu Iwao Kitahara Mahata.
Asidente ne’e la rezulta ema mate, no kareta 3 ne’ebé soke malu ne’e maka hanesan kareta ba Sekretáriu Rejional Adjuntu Prezidente Autoridade ba asuntu Sosial ho nia xapa matrikula, 03-899 ZEESM-TL, Sekretáriu Rejional Administrasaun ho nia xapa matrikula 07-899 ZEESM-TL, no kareta ba Sekretáriu Rejional Komersiu no Industria ho nia xapa matrikula 10-899 ZEESM-TL.
Bazeia ba informasaun balun ne’ebé The Oe-Kusi Post (TOP) asesu, asidenti tráfiku ne’e akontese iha Kinta 5 Novembru 2020 oras tuku 7:30 kalan iha estrada besik ponte Kruz atu ba diresaun portu Iwao Kitahara Mahata.
Kareta 3 ne’e sai husi diresaun jardin Oe-Bau atu ba han kalan hamutuk ho embaixador Korea Sul ho diretor KOICA iha portu (pelabuhan) Iwao Kitahara iha Mahata, maibé to’o dalan klaran iha ponte Kruz besik loja China nian ne’e, ema tau ai no fatuk iha estrada klaran hodi transporte privadu no públiku labele liu husi estrada ne’e, tanba sarani sira halo hela prosesaun ba estatua Nossa Senhora liu husi dalan ne’e.
“Kondutor ba kareta Sekretáriu Rejional Komersiu nian maka uluk no trava derepente, tanba hare ai no fatuk iha estrada klaran. Husi ne’e maka mosu soke malu,” hateten kondutor ba kareta Sekretáriu Rejional Administrasaun ba TOP iha kuartel jeral PNTL Oe-Kusi Ambeno foin lalais.
Akontesimentu ne’e akontese, polisia tranzitu mós to’o kedas fatin akontesimentu hodi hala’o sira nia serbisu, maibé mosu kedas intervensaun husi
Prezidente Autoridade ba RAEOA, Arsenio Paixão Bano ho nia membru sira atu polisia tranzitu tenke devolve kedas kareta estadu sira ne’e, maibé polisia tranzitu lakohi ho razaun kareta sira ne’e kontra regras tranzitu nian.
Nune’e, iha loron Sesta 6 Novembru 2020 dadersan, Xefe Gabinete nain tolu husi Sekretáriu Rejional 3 halo karta dala tolu tutuir malu hodi husu ba polisia tranzitu atu fó fila kareta 3 ne’e, no ikus mai iha parte lorokraik maka polisia tranzitu mós foin entrega hikas kareta sira ne’e ba membru autoridade sira.
