OEL – UPUN (TOP) – Hafoin tama ba periodu Estadu emerjénsia ba dala ha’at nian, Ambeno oan hamutuk nain 25 oras ne’e kumpre hela kuarentena obrigatóriu iha otel Oel-Upun (Oe-Upu) durante loron 14 nia laran nu’udar medidas prevensaun ba propagasaun moras virus corona (Covid-19) iha rai-ketan ne’e.
Molok ema nain 25 tama ba kuarentena, ekipa Covid-19 ne’ebé lidera husi Sekretáriu Rejionál Saúde Ambeno, Manuel da Costa halo seremónia reintegrasaun ema nain 13 ba familia.
Portavoz ekipa Covid-19 Oe-Kusi Ambeno, Luis de Jesus Neno kontinua husu ba sidadaun sira liliu joven sira iha Oe-Kusi Ambeno tenke respeita nafatin regra Estadu emerjénsia nian, no labele halo movimentu iha área fronteira sira, tanba nasaun viziñu Indonézia iha parte Kefa, Atambua no Kupang moras ne’e maka’as hela.
“Husu ba imi ohin kumpre ona regulamentu sira durante semana rua, maibé bele fó informasaun ba familia no ema seluk tan atu hapara lai imi nia movimentu ba jalan tikus, ha’u hare karik ita bazeia ema atu tama husi ne’eba itoan maibé, jalan tikus mak maka’as. Di’ak liu para lai tanba terus ita hotu terus,” hateten Luis Neno ba sidadaun kuarentena sira ne’ebé remata ona kumpre loron 14 iha fatin kuarentena Oel-Upun, Oe-Kusi Ambeno, Segunda 10 Agustu 2020.
Iha fatin hanesan, Sekretáriu Rejionál Saúde, Manuel da Cosa husu ba parte hotu presija koopera malu hodi bele prevene mora Covid-19 iha Oe-Kusi Ambeno.
“Ita hotu espera ba oin sei laiha tan, agora ita hahu tama ona ba estadu emerjensia da ha’at ne’e hanesan fó alaram ba ita atu tau atensaun maka’as ba fronteira sira,” hateten Manuel.
Estadu desidi ona Estadu emerjénsia ba dala ha’at nian, maibé frontliner hamutuk nain 79, inklui jornalista sira ne’ebé durante ne’e hala’o reportazen iha frontline mós to’o oras ne’e seidauk hetan sira nia direitu.
