NUMBEI (TOP) – Dadus husi edukasaun Rejiaun Administrativu Espesial Oe-Kusi Ambeno (RAEOA) hatudu eskola hamutuk 97 mak eziste iha rai-ketan ne’e, maibé foin rezista eskola 3 mak priense ona kriteria governu nain hodi hahu ona prosesu aprendizajen hanesan baibain.
Diretór Edukasaun Rejiaun Administrativu Espesial Oe-Kusi Ambeno (RAEOA), Daniel Maunu katak eskola 3 ne’ebé atu reativa mak hanesan eskola CAFÉ, ESSAO no Eskola Tekniku Vokasional Lifau (ETVL), no eskola sira seluk seidauk bele reativa, tanba seidauk priensia kriteria sira.
“Abertura reativasaun ne’e Kinta 13 Agostu 2020, komvite ami fahe ba prezidente autoridade mak sei loke direitamente,” hateten diretór Daniel ba jornalista sira iha Oe-Kusi Ambeno, Kuarta 12 Agostu 2020.
Diretór Eskola Sekundária Katólika Santo António Oe-Kusi Ambeno, Padre Albino Marques. Foto The Oe-Kusi Post/Abilio Elo Nini.
Iha parte seluk diretór Eskola Sekundária Katólika Santo António Oe-Kusi Ambeno, Padre Albino Marques katak nia estudante sira hamutuk nain 745 mak oras ne’e preparadu ona hodi tama fali ba eskola, tanba eskola ne’e rasik priense ona kriteria husi governu hodi hahu ona prosesu aprendizajen.
“Ami prepara kleur ona, hahu iha fulan juñu primeiru komesa prepara limpeza, limpeza ne’e hetan ajuda husi kompañia PAX durante semana ida no segundu ami hamutuk ho alunus sira mai limpeza servisu iha area eskola laran no terseiro halo tangki fase liman,” nia esplika.
“Tangki ne’e halo ba fatin 3 ida ba sekundária, no pre-sekundária no ida ba eskola primaria, tanba iha ne’e komplex ida de’it, no kuartu ami prepara sala de aula atu kumpre distansia sosial, kada klase iha alunu nain 20”.
Padre Paroku Igreja Nossa Señora Do Rosario Numbei ne’e esplika, eskola sekundária ne’e iha sala 18, no pre-sekundária iha sala 16 ho eskola primaria iha sala 6, ne’ebé ami fahe kada aula nain 20. No ikus liu mak ami prepara termu scan no seluk tan, ami prepara no prontu ona atu reativa prosesu aprendizajen”.
Author: Abilio Elo NiniWebsite:www.oekusipost.comEmail:Este endereço de email está sendo protegido de spambots. Você precisa do JavaScript ativado para vê-lo.
